ގިނަ އަދަދެއްގެ ދަރިވަރުން ޕައިލެޓްކަން ކިޔަވައިގެން އައިސް, ވަޒީފާ ނުލިބި ތިބެން ޖެހުމުގެ ސަބަބުން ކުރިއަށް އޮތް ތަނުގައި ގައުމީ ބޮޑު މައްސަލައެއް ފެންމަތިވެދާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.
މިއަދު ޓްރާންސްޕޯޓް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަމީން އިޝާރާތް ކުރެއްވީ ކުރީ ސަރުކާރުގައި ސްޓޫޑެންޓް ލޯނު ސްކީމުގެ ދަށުން ޕައިލެޓްކަން ކިޔަވަން 479 ދަރިވަރުންނަށް ލޯނު ދިނުމަށެވެ.
"އަޅުގަނޑު ގަބޫލުކުރާ ގޮތުގައި ރާއްޖޭގައި ޕައިލެޓް ޓްރެއިނިން ހަދަމުންދާ ކުދިންގެ އަދަދަށް ބަލާއިރު, މިކަމަކީ ގައުމީ ބޮޑު މައްސަލައަކަށް ކުރިއަށް އޮތް އަހަރެއް ދެ އަހަރެއްހާ ދުވަސް ތެރޭގައި ވާނެ ކަމަށް ލަފާ ކުރެވޭ, ނޫނީ ޔަގީންކުރެވޭ މައްސަލައެއް،" އަމީން ވިދާޅުވި އެވެ.
އަމީން ވިދާޅުވި ގޮތުގައި ސިޔާސީ ގޮތް އެކަހެރިކޮށް, ސިވިލް އޭވިއޭޝަނުގެ ޒިންމާ ނަގާފައި އޮތް ނަމަ މިކަން ބޮޑު މައްސަލައަކަށް ނުވާނެ އެވެ. އަދި މިކަމުގެ ސަބަބުން ނިކުމެދާނެ ނަތީޖާ, ބެލެނިވެރިންނާއި ދަރިވަރުންނަށް ކިޔައިދިނުމަކީ ސިވިލް އޭވިއޭޝަނުން ކުރަންޖެހޭ ކަމެއްގެ ގޮތުގައި މިނިސްޓަރު ފާހަގަ ކުރެއްވި އެވެ.
"ގައުމެއްގެ ނިސްބަތުން ސްކޮލާޝިޕް ސްކީމުތަކަށް ހުޅުވާލަން ވާނީ އެ ގައުމަކަށް ބޭނުންވާ ނުވަތަ ކިޔަވައިގެން އަންނަ ކުދިންނަށް ފުރުސަތުތަކެއް ވެސް އޮންނާނެ ގޮތަކަަށް ސަރުކާރުގެ ނިޒާމު ބައްޓަން ކުރެވިގެން،" އަމީން ވިދާޅުވި އެވެ.
އޭނާ ވިދާޅުވީ 400 ސްކޮލާޝިޕަށް ހުޅުވާލިއިރު 60 ކެޑޭޓް ޕައިލެޓުން ވަޒީފާ ނުލިބިފައި ރާއްޖޭގައި ތިބި ކަމަށާއި އެ ފުރުސަތު ހުޅުވަލިއިރު 200 ކުދިން ދުނިޔޭގެ އެކި ތަންތަނުގައި ޕައިލެޓް ޓްރެއިނިން ހަދަން ތިބިކަން އެނގިވަޑައިގަންނަވާ ކަމަށެވެ.
ނޫސްވެރިންގެ ބައްދަލުވުމުގައި އަމީން ވަނީ ޕައިލެޓް ޓްރެއިނިން ހަދައިގެން އަންނަ ދަރިވަރުންނަށް ދޭނެ ވަޒީފާއެއް ރާއްޖޭގައި ނެތްކަން ފާހަގަކުރައްވާފަ އެވެ.
"ޓްރެއިނިން ހަދައިގެން އަންނަ ކުދިންނަށް ރާއްޖެއިން ކިހާވަރަކަށްތޯ ވަޒީފާ ދެނީ. އެއްވެސް އެއާލައިނަކަށް ހުރިހާ ކެޑޭޓް ޕައިލެޓުން ލައިގެންނެއް އެއާލައިނެއް ނުހިންގޭނެ. ވަޒީފާގެ ފުރުސަތު ހުޅުވާލެވެމުން ދަނީ މޯލްޑިވިއަނާއި ޓީއެމްއޭއިން. މި ދެ ބައި މީހުންގެ ތަފާސްހިސާބުވެސް އެވްރެޖްކޮށްލީމަ 30 އަށްވުރެ މައްޗަކަށް ނާރާ ވަޒީފާގެ އަދަދު،" އަމީން ވިދާޅުވި އެވެ.
އޭވިއޭޝަން ދާއިރާގެ ތަޖުރިބާ ލިބިވަޑައިގެން ހުންނެވި އަމީން ވިދާޅުވީ ދުނިޔޭގެ އެއްވެސް ގައުމެއްގައި ކެޑޭޓް ޕައިލެޓުންނަށް ވަޒީފާ ނުލިބޭ ކަމަށެވެ. އޭގެ ސަބަބަކީ ހުރިހާ ގައުމެއްގައި ވެސް ކެޑޭޓް ޕައިލެޓުންގެ ބޮޑު ބެކްލޮގެއް އޮންނާތީ އެ ގައުމުތަކުން އެ ގައުމެއްގެ ކުދިންނަށް އިސްކަންދޭތީ ކަމަށް އަމީން ވިދާޅުވި އެވެ.
ދިއޭވިއޭޝަންގެ އެންޓްރީ ލެވެލްގެ ޓްރެއިނިން ހަދައިގެން އަޔަސް ތަޖުރިބާ ނެތުމުން ވަޒީފާ ނުލިބެނޭކަން އޭނާ ފާހަގަކުރެއްވި އެވެ. އޭނާ ވިދާޅުވީ އެއާލައިނެއްގައި އުޅެފައި, ކެޕްޓަނުންނަށް ވީމަ ލިބޭނެ ފުރުސަތުތައް ވެސް ގިނަ ވާނެ ކަމަށެވެ.
މިނިސްޓަރު މިހެން ވިދާޅުވިއިރު, ކުރީ ސަރުކާރުން ދީފައިވާ އެއްވެސް ސްޓޫޑެންޓް ލޯނެއް އަތުނުލާން ވަނީ ނިންމާފަ އެވެ. އަދި އެއް ދާއިރާއަކުން ގިނަ ދަރިވަރުންނަށް ލޯނު ލިބުމުން, އޭގެ ތެރެއިން ބައެއް ދަރިވަރުން މިހާރު ދަނީ ކިޔަވަން ބޭނުންވާ ދާއިރާ ބަދަލުކޮށްފަ އެވެ.
