އެއްގަމު އުޅަނދުތަކަށް ޑޮމެއިން ވިއްކަން އަލުން ފަށަން ނިންމާފައިވާ ކަމަށް ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވެއްޖެ އެވެ.
ޑޮމެއިންގެ މައްސަލައަކީ އޭނާ މިނިސްޓަރުކަމާ ހަވާލުވިއިރު ވަރަށް ބޮޑުވެފައިވާ މައްސަލައެއް ކަމަށާއި މި ސަރުކާރުން ވެރިކަމާ ހަވާލުވިއިރު 200 އެއްހާ ޑޮމެއިންއާ ގުޅޭ ހިދުމަތްތަކަށް އެދިފައިވާ ކަމަށް މިއަދު ބޭއްވި ނޫސްވެރިންގެ ބައްދަލުވުމެއްގައި އަމީން ހާމަކުރެއްވި އެވެ.
އަދި، ކުރީގެ ސަރުކާރުން އެ ހިދުމަތް ހުއްޓުވާފައި އޮތް ނަމަވެސް ރަނގަޅު ގޮތުގައި ޑޮމެއިން ނަގާފައިވާ ފަރާތްތަކަށް އެކަމާ ގުޅޭ ހިދުމަތްތައް ލިބެން ޖެހޭނެ ކަމަށް ގަބޫލުކުރައްވާ ކަމަށްވެސް މިނިސްޓަރު ވިދާޅުވި އެވެ.
"އެގޮތުން އެ މަސައްކަތް މިހާރު ވާނީ މިނިސްޓްރީގެ ތެރޭގަ ފެށިފަ، އެ 200 ފަރާތަށް ސީދާ އެ ހިދުމަތް ނުދެވުނު ނަމަވެސް ވެރިފިކޭޝަން ޕްރޮސެސްގެ ތެރެއިން ޑޮމެއިންގެ ހިދުމަތް އަޅުގަނޑުމެން ސަރުކާރާ ހަވާލުވިފަހުން ވާނީ ފަށާފަ" އޭނާ ވިދާޅުވި އެވެ.
އޭގެއިތުރުން، ކުރީ ސަރުކާރުން ދޫކޮށްފައިވާ ޑޮމެއިންތަކުގެ ސައްހަކަން ކަށަވަރުކުރާނެ ގޮތެއް ހޯދުމުގެ މަޝްވަރާ ފެށިފައިވާ ކަމަށް ވިދާޅުވެ އަމީން ވަނީ ގަވާއިދުގެ ތެރެއިން އާންމުންގެ މައްސަލައެއް ނެތި ދޫކޮށްފައިވާ ޑޮމެއިންތައް ކެންސަލް ނުކުރައްވާނެ ކަމުގެ ޔަގީންކަން ދެއްވާފަ އެވެ.
"އަޅުގަނޑުމެން ޑޮމެއިންގެ ހިދުމަތް ފަށާނަން ވަރަށް އަވަހަށް، ގާތްގަނޑަކަށް ކުރިއަށް އޮތް ދެތިން މަސް ދުވަހުގެ ތެރޭގަ އަޅުގަނޑުމެން ޑޮމެއިންގެ ހިދުމަތް ފަށާނަން"
މިނިސްޓަރު އިތުރަށް ވިދާޅުވީ އެ ހިދުމަތް ދެން ފަށާނީ ޒަމާނަށް ފެތޭ ތަފާތު ކޮންސެޕްޓަކާ އެކީގައި ކަމަށެވެ.
ޑޮމެއިން ބޭނުންކުރުމުގެ ގަވާއިދާ ހިލާފަށް ޑޮމެއިންތައް ދޫކުރަމުންދާ ކަން ފާހަގަކުރިގެން ކަމަށް ބުނެ ޓްރާންސްޕޯޓް މިނިސްޓްރީން ޑޮމެއިން ވިއްކުން ހުއްޓުވީ މިދިޔަ ސަރުކާރުގައި ރައީސް އޮފީހުންނެވެ.
އޮގަސްޓު 29، 2023 ގައި އޭރުގެ މިނިސްޓަރު އައިޝަތު ނަހުލާއަށް ރައީސް އޮފީހުން ފޮނުވި ސިޓީގައި ފާހަގަކޮށްފައިވާ މައްސަލަތަކުގެ ތެރޭގައި ޑޮމެއިން ގަވާއިދުގައިވާ ފަދައިން ޑޮމެއިން ވިއްކުމާ ގުޅޭ މައްސަލަ ހައްލުކުރުމަށް ކޮމިޓީއެއް އެކުލަވާލާފައި ނެތުމާއި، އާންމުކޮށް އިއުލާން ކުރުމެއް ނެތި ޑޮމެއިން ވިއްކުން ހިމެނެ އެވެ.
