ބާސެލޯނާ (ޖެނުއަރީ 3) - ޖަރުމަންގެ އިންވެސްޓަރުންތަކެއް ބާސެލޯނާ އަށް ދައްކަން ޖެހޭ ފައިސާ ނުދައްކާ މައްސަލައެއްގައި އެ ކުލަބުން އިންވެސްޓަރަކާ ދެކޮޅަށް ދައުވާކުރަން ނިންމައިފި އެވެ.
މިދިޔަ ޖޫން މަހު ބާސެލޯނާއާ އެކު ޖަރުމަންގެ ލިބޭރޯ ކުންފުނިން ސޮއިކުރީ 60 މިލިއަން ޔޫރޯގެ ޑީލެއްގަ އެވެ. ނަމަވެސް މީގެ ތެރެއިން މިހާތަނަށް ދައްކާފައިވަނީ 20 މިލިއަން ޔޫރޯ އެވެ.
މި ސީޒަންގެ ނިޔަލަށް ލޯން އެއްބަސްވުމެއްގެ ދަށުން ގެނައި ދެ ކުޅުންތެރިންކަމަށްވާ ޔޮއާއޯ ކާންސެލޯ އާއި ޔޮއާއޯ ފެލިކްސްގެ ޑީލް އަށް ސްޕެނިޝް ލަލީގާ އިން ހުއްދަދިނީ، ލިބޭރޯ އިން ފައިސާ ދައްކާނެ ކަމަށް އެއްބަސްވުމުންނެވެ. ނަމަވެސް އެކުންފުންޏަށް ދެ ފަހަރެއްގެ މަތިން ފައިސާ ދައްކަން ޖެހޭ މުއްދަތު އިތުރުކޮށްދިންނަމަވެސް އެކަން ކޮށްފައެއް ނުވެ އެވެ.
ބާސެލޯނާ އިން މިހާރުވަނީ ކޯޓަށް މި މައްސަލަ ވައްދަން ނިންމާފަ އެވެ. ޖަރުމަންގެ ކުންފުންޏާ ދެކޮޅަށް ދައުވާ ކުރުމަށް މިހާރު އެ ކުލަބުން ވަނީ ނިންމާފަ އެވެ.
އިންވެސްޓަރުން ފައިސާ ނުދައްކާތީ ބާސެލޯނާ އިން ކަންބޮޑުވުން ފާޅުކުރަމުން އަންނަ އެންމެ ބޮޑު ސަބަބަކީ ކުރިއަށް އޮތް ޓްރާންސްފާގައި ކުލަބުން އާ ކުޅުންތެރިން ހޯދުމަށް ހޭދަކުރެވޭނެ ގޮތްތައް މަދުވުމެވެ. މިހާރުގެ ހާލަތަށް ބަލާއިރު، ކުލަބަށް އާ އިންވެސްޓަރުން ބޭނުންވެ އެވެ.
ބާސެލޯނާގެ ރައީސް ޖޮއާން ލަޕޯޓާ ވިދާޅުވީ އާ އިންވެސްޓަރުން ހޯދޭނެކަމުގެ އިތުބާރު އެބައޮތް ކަމަށާއި، ބާސެލޯނާ އަށް ބޭނުންވާ ކުޅުންތެރިން ގަނެވޭނެ މަގު ފަހިކޮށްދެއްވާނެ ކަމަށެވެ.
ސްޕެނިޝް ލީގުގެ އެންމެ ފަހުގެ ޗެމްޕިއަން، ބާސެލޯނާ އަށް އާ ކުޅުންތެރިން ރަޖިސްޓްރީ ކުރެވޭނީ އެ ކުލަބުގެ މާލީ ހާލަތު ރަނގަޅުކޮށްގެން ކަމަށް ލަލީގާ އިން ވަނީ އަންގައިފަ އެވެ.
