ރާއްޖޭގައި އެންމެ ޕްރޮފެޝަނަލްކޮށް، ބެޑްމިންޓަންގެ ކަންކަން ކުރިއަށްގެންދާ ރިވައިވަލް ސްޕޯޓްސް ކްލަބުން، ބ. އޭދަފުށީގައި ބެޑްމިންޓަން އިތުރަށް ފުޅާކުރުމަށް ދުރުރާސްތާ ޕްލޭނެއްގެ ދަށުން، "ރިވައިވަލް ސްޕޯޓްސް އޭދަފުށީ ބްރާންޗް" ގެ މަސައްކަތް ފަށައިފި އެވެ.
މި މަހު އެއް ވަނަ ދުވަހުން ފެށިގެން، ރިވައިވަލް ސްޕޯޓްސް އޭދަފުށީ ބްރާންޗްގެ ހަރަކާތްތައް ރަސްމީކޮށް ކުރިއަށްދާއިރު، މި ވަގުތު ވެސް 150 ކުދިން ވަނީ މި ޕްރޮގްރާމްގައި ބައިވެރިވެފަ އެވެ.
ރިވައިވަލް ސްޕޯޓްސް ކްލަބުން ނެރުނު ބަޔާނުގައި ބުނެފައިވަނީ، އެންމެ ބޮޑު އުންމީދަކީ އަރަމުން އަންނަ ކުޅުންތެރިންނަށް ވީ އެންމެ ރަނގަޅު ޓްރެއިނިން ފުރުސަތު ހޯދައިދިނުމާއި ގައުމަށް ކާމިޔާބާއި ރީތި ނަން ހޯދައިދޭން މަސައްކަތް ކުރާ އެތުލީޓުންނަށް މަގުކޮށައިދިނުން ކަމަށެވެ.
ރިވައިވަލް ސްޕޯޓްސް އޭދަފުށީގެ އެގްޒެކެޓިވް ކޮމިޓީގައި ހިމެނެނީ، ރައީސް، މުހައްމަދު އިކްރާމް، ނައިބު ރައީސުންގެ ގޮތުގައި، މުހައްމަދު އާރިފް އާއި ހުސެއިން ޒަޔާން ޝަހީދު ޒަކީ އަދި ޖެނެރަލް ސެކްރެޓަރީ އަކަށް އިބްރާހިމް ޝަހީދު، ހަޒާންދާރަކަށް އައިޝަތު ރިސްމީ އަދި މެމްބަރުންގެ ގޮތުގައި، ހުސެއިން މުހައްމަދު އާއި ހުސެއިން ރަމީޒް އެވެ.
ރިވައިވަލް އޭދަފުށީ ބްރާންޗުން ކުރިއަށްގެންދާނެ ފުރަތަމަ ބޮޑު ހަރަކާތަކީ، މި މަހު 18-20 އަށް އޭދަފުށީގައި ބާއްވާ އޯޕަން ބެޑްމިންޓަން މުބާރާތެވެ. އޭދަފުށި ޖޫނިއާ އޯޕަންގެ ނަމުގައި ބާއްވާ މި މުބާރާތް ކުރިއަށްދާނީ 9 އަހަރުން ދަށާއި 12 އަހަރުން ދަށާއި 14 އަހަރުން ދަށާއި 16 އަހަރުން ދަށް އަދި 18 އަހަރުން ދަށުގެ އަންހެން އަދި ފިރިހެން ކުޅުންތެރިންނަށެވެ.
މީގެ ހަތަރު ވަރަކަށް އަހަރު ކުރިން، 2019 ވަނަ އަހަރުގެ ޖުލައި އެއް ވަނަ ދުވަހު ފެށި ރިވައިވަލް ސްޕޯޓްސް ކްލަބްގެ ދަތުރުގައި މިހާތަނަށް ގިނަ ކަންތައްތަކެއް ވަނީ ހާސިލްކޮށްފަ އެވެ. ރާއްޖޭގެ ގައުމީ ލެވަލްގެ މުބާރާތްތަކުން، ގިނަ މެޑަލްތަކެއް ހޯދިއިރު، ބައިނަލްއަގުވާމީ ލެވަލްގައި ވެސް ވަނީ ކާމިޔާބު ހޯދައިފަ އެވެ. ޑިވެލޮޕްމަންޓް މަސައްކަތްތަކަށް ފޯކަސްކޮށް، އޭދަފުށީގައި ރިވައިވަލް އިން މި ފެށި ޕްރޮޖެކްޓް ކުރިއަށް އޮތްތަނުގައި ފުޅާކުރުމުގެ ވިސްނުން ރިވައިވަލް އިން ގެންގުޅެ އެވެ.
