އަންނަ އަހަރު އޮންނަ ރައްޔިތުންގެ މަޖިލީހުގެ އިންތިހާބުގައި ވ. ފެލިދޫ ދާއިރާއަށް ވާދަކުރައްވާނެކަން މިދިޔަ ސަރުކާރުގައި ރައީސުލްޖުމްހޫރިއްޔާގެ ޗީފް އޮފް ސްޓާފަކަށް ހުންނެވި އަލީ ޒާހިރު އިއުލާނު ކުރައްވައިފި އެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ އެންމެ އަރިސް އެއް ބޭފުޅެއްގެ ގޮތުގައި ހުންނެވި އަދާލަތު ޕާޓީގެ ނައިބު ރައީސްކަން ވެސް ކުރެއްވި އަލީ ޒާހިރު ވަނީ އެކަން މިރޭ އިއުލާނު ކުރައްވާފަ އެވެ.
"މިފެށޭ 20 ވަނަ ރައްޔިތުންގެ މަޖިލީހުގައި ވ. ފެލިދޫ ދާއިރާގެ ރައްޔިތުން ތަމްސީލުކޮށް، ދާއިރާގެ އަޑު މަޖިލީހުގައި އިއްވުމަށް އެ ދާއިރާއަށް ވާދަކުރުމަށް ގަސްތުކޮށް އެކަން އިއުލާން ކުރަމެވެ. ދާއިރާގެ ރައްޔިތުންނާ ހެޔޮއެދޭ ފަރާތްތަކުގެ އެއްބާރުލުމަށް އެދެމެވެ," އޭނާ އެކްސްގައި ކުރެއްވި ޕޯސްޓެއްގައި ވިދާޅުވެފައިވެ އެވެ.
ފުވައްމުލަކަށް ނިސްބަތްވެވަޑައިގަންނަވާ އަލީ ޒާހިރު ވަނީ ގާނޫނީ ދާއިރާތިން މަތީ ތައުލީމު ހާސިލުކުރައްވާފަ އެވެ.
އަލީ ޒާހިރު ކުރިން ވިދާޅުވެފައިވާ ގޮތުގައި ޗީފް އޮފް ސްޓާފްގެ މަގާމުގައި ހުންނެވީ އޭނާ ނިސްބަތްވާ ޕާޓީގެ ސްލޮޓެއްގައި ނޫން ކަމަށެވެ. އެއީ ކޯލިޝަނުގެ ތެރެއިން އަދާލަތަށް ކަނޑައަޅާފައި އޮތް މަގާމެއް ނޫން ކަމަށާއި، އެ މަގާމަށް އޭނާ އައްޔަނުކުރެއްވީ ސީދާ ސޯލިހު ކަމަށް ވިދާޅުވި އެވެ.
ރާއްޖޭގެ އެންމެ އާބާދީ މަދު އަތޮޅުގެ ގޮތުގައި އޮތް ވ. އަތޮޅުގައި އޮތް ތިން ރަށެއް މި ދާއިރާގައި ހިމެނެ އެވެ. އެއީ, ވ. ފެލިދޫ, ވ. ފުލިދޫ އަދި ވ. ތިނަދޫ އެވެ.
ހިނގަމުންދާ 19 ވަނަ މަޖިލީހުގައި ފެލިދޫ ދާއިރާގެ ގޮނޑި ފުރުއްވީ ޕީއެންސީގެ ފަރާތުން ފަޒުލް ރަޝީދެވެ. އޭނާ އާބަންކޯގެ މެނޭޖިން ޑިރެކްޓަރު ކަމަށް ވަޑައިގަތީ އެ މަގާމުން އިސްތިއުފާ ދެއްވުމަށް ފަހު އެވެ.
