ރައްޔިތުންގެ މަޖިލީހުގެ އިންތިހާބުގައި ވ. ފެލިދޫ ދާއިރާއަށް ވާދަކުރައްވާ މިދިޔަ ސަރުކާރުގައި ރައީސުލްޖުމްހޫރިއްޔާގެ ޗީފް އޮފް ސްޓާފަކަށް ހުންނެވި އަލީ ޒާހިރުއަށް ތާއީދު ކުރުމަށް އިދިކޮޅު މައި ޕާޓީ, މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ނިންމައިފި އެވެ.
އެމްޑީޕީން މިއަދު އާއްމުކުރި ލިއުމެއްގައި ބުނީ އަލީ ޒާހިރަށް ތާއީދުކޮށް އޭނާއަށް ވޯޓު ދިނުމަށް އެ ޕާޓީގެ މެމްބަރުންގެ ކިބައިން އެދިފަ އެވެ.
ދާއިރާއަށް ވާދަކުރާ ކެންޑިޑޭޓުން
- ހުސައިން ޒައިދު އާރިފް (އަމިއްލަ ގޮތުން)
- އަލީ ޒާހިރު (އަމިއްލަ ގޮތުން)
- ޝުޖާއު އަލީ (ޑިމޮކްރެޓްސް)
- އާދަމް ޒާހިރު (ޕީއެންސީ)
އަލީ ޒާހިރަކީ ކުރީގެ ރައީސް އިބްރާހިމް މުހައްމަދު ސޯލިހުގެ އެންމެ އަރިސް އެއް ބޭފުޅެއްގެ ގޮތުގައި ހުންނެވި އެ ސަރުކާރުގައި ހުންނެވި ބޭފުޅާ އެވެ. އަދާލަތު ޕާޓީގެ ނައިބު ރައީސްކަން ވެސް އަލީ ޒާހިރު ކުރެއްވި އެވެ.
އަލީ ޒާހިރު ކުރިން ވިދާޅުވެފައިވާ ގޮތުގައި ޗީފް އޮފް ސްޓާފްގެ މަގާމުގައި ހުންނެވީ އޭނާ ނިސްބަތްވާ ޕާޓީގެ ސްލޮޓެއްގައި ނޫނެވެ. އެއީ ކޯލިޝަނުގެ ތެރެއިން އަދާލަތަށް ކަނޑައަޅާފައި އޮތް މަގާމެއް ނޫން ކަމަށާއި، އެ މަގާމަށް އޭނާ އައްޔަނުކުރެއްވީ ސީދާ ސޯލިހު ކަމަށް ވިދާޅުވި އެވެ.
ފުވައްމުލަކަށް ނިސްބަތްވެވަޑައިގަންނަވާ އަލީ ޒާހިރު ވަނީ ގާނޫނީ ދާއިރާތިން މަތީ ތައުލީމު ހާސިލުކުރައްވާފަ އެވެ.
ރާއްޖޭގެ އެންމެ އާބާދީ މަދު އަތޮޅުގެ ގޮތުގައި އޮތް ވ. އަތޮޅުގައި އޮތް ތިން ރަށެއް މި ދާއިރާގައި ހިމެނެ އެވެ. އެއީ, ވ. ފެލިދޫ, ވ. ފުލިދޫ އަދި ވ. ތިނަދޫ އެވެ.
ހިނގަމުންދާ 19 ވަނަ މަޖިލީހުގައި ފެލިދޫ ދާއިރާގެ ގޮނޑި ފުރުއްވީ ޕީއެންސީގެ ފަރާތުން ފަޒުލް ރަޝީދެވެ. އޭނާ އާބަންކޯގެ މެނޭޖިން ޑިރެކްޓަރު ކަމަށް ވަޑައިގަތީ އެ މަގާމުން އިސްތިއުފާ ދެއްވުމަށް ފަހު އެވެ.
