މުހިންމު މަސައްކަތްތަކެއް ނުނިންމާ ރައްޔިތުންގެ މަޖިލީހުގެ މިއަހަރުގެ ފަހު ދައުރުގެ އެންމެ ފަހު ޖަލްސާ މިއަދު ނިންމާލައިފި އެވެ.
ތިންވަނަ ދައުރުގެ ތަފާސްހިސާބުތައް ހިއްސާ ކުރައްވަމުން މަޖިލީހުގެ ރައީސް މުހައްމަދު އަސްލަމް ވިދާޅުވީ، ތިންވަނަ ދައުރުގައި ކުރުމަށް ހުރި މަސައްކަތުގެ ތެރެއިން 57.3 އިންސައްތަ މަސައްކަތް ނިމިފައިވާ ކަމަށެވެ.
މަޖިލީހުގެ މި އަހަރުގެ ޖަލްސާތައް ނިންމާލާފައި މިވަނީ، އާ ސަރުކާރުގެ ވަޒީރުންނަށް ރުހުން ނުދީ އެވެ. އޭގެ އިތުުރުން, މިނިސްޓްރީތަކުގެ މެންޑޭޓުތައް ފާސްކުރުމުގެ މައްސަލަ ވެސް އޮތީ ކޮމިޓީ މަރުހަލާގަ އެވެ. ވަޒީރުންނަށް ރުހުން ދެވެން އޮތީ މެންޑޭޓުތައް ފާސްކޮށްގެން ކަމަށް މެޖޯރިޓީ އޮންނަ އެމްޑީޕީގެ މެމްބަރުން ހާމަކޮށްފައިވެ އެވެ.
އަސްލަމް ވިދާޅުވި ގޮތުގައި ތިންވަނަ ދައުރުގައި ޖުމްލަ 38 ޖަލްސާއެއް ބާއްވައި ޖަލްސާތަކުގައި 93 ގަޑިއިރު ހޭދަކޮށްފައިވެ އެވެ.
އަދި، މި ދައުރުގައި ފަސް ބިލެއް ފާސްކޮށްފައިވާ ކަމަށް ވެސް އަސްލަމް ވިދާޅުވި އެވެ. އެ ބިލު ތަކަކީ
- އިންތިހާބުތަކާ ބެހޭ އާންމު ގާނޫނަށް އިސްލާހު ގެނައުމުގެ ބިލު
- ލޯކަލް ކައުންސިލްތަކުގެ އިންތިހާބުގެ ގާނޫނަށް އިސްލާހު ގެނައުމުގެ ބިލު
- ކުންފުނީގެ ބިލު
- އިންޑަސްޓްރިއަލް ރިލޭޝަންސް ބިލު
- މަސައްކަތުގެ މާހައުލުގެ ސަލާމަތާއި ސިއްހީ ރައްކާތެރިކަމުގެ ބިލު އެވެ
"ކުރީ ސަރުކާރުން ހުށަހެޅި 14 ބިލެއް މި ސަރުކާރުން އަނބުރާ ގެންގޮސްފައިވޭ، މި ދައުރުގައި ހުށަހެޅި 25 ގަރާރުގެ ތެރެއިން 6 ގަރާރެއްގެ މަސައްކަތް ނިމިފައިވޭ، ކޮމެޓީތަކުގައި 17 ގަރާރެއް އަދި ބަހުސް މަރުހަލާގައި ދެ ގަރާރެއް އެބައޮތް،" އަސްލަމް ވިދާޅުވި އެވެ.
މި ދައުރުގެ ތެރޭގައި މަޖިލީހުގައި ކުރިއަށް ދިޔަ މުހިންމު ގަރާރުތަކުގެ ތެރޭގައި:
- ދަރިމައިވުމުގެ މައްސަލައިގެ ފަރުވާ އާސަންދައގެ ދަށުން މިހާރަށްވުރެ ފަސޭހައިން، ފުޅާކޮށް ދިނުމަށް ގޮވާލައި ހުށަހެޅި ގަރާރު
- ނަފްސާނީ ގޮތުންނާއި ޖިސްމާނީ ގޮތުން އަންހެނުންނަށް ދިމާވާ މައްސަލަތަކުގެ ދިރާސާއެއް ހަދައި ކަމާ ގުޅޭ ސިޔާސަތުތައް އެކުލަވާލުމަށް ގޮވާލާ ގަރާރު
- ކުޑަކުދިންނަށް ކުރާ އަނިޔާ ހުއްޓުވުމަށް ކުޑަކުދިންގެ ރައްކާތެރިކަމަށް ދައުލަތުން މިހާރަށްވުރެ ސަމާލުވުމަށް ގޮވާލައި ހުށަހެޅި ގަރާރު
- އިޒްރޭލުން ފަލަސްތީނަށް ދޭ ހަމަލާތައް ކުށްވެރިކޮށް، ހަމަލާ ތައް ހުއްޓުވުމަށް ގޮވާލައި، ފަލަސްތީނަކީ މިނިވަން ދައުލަތެއްގެ ގޮތުގައި ބަލައިގަތުމަށް އެދި ހުށަހަޅާ ގަރާރު ހިމެނެ އެވެ.
މި ދައުރުގެ ތެރޭގައި ވަޒީރުންނަށް ކުރި 68 ސުވާލުގެ ތެރެއިން 51 ސުވާލުގެ މަސައްކަތް ނިމިފައިވާ ކަމަށް އަސްލަމް ވިދާޅުވި އެވެ. އަދި 17 ސުވާލެއްގެ ނޯޓިސް ފޮނުވާފައިވާ ކަމަށްވެސް އަސްލަމް ވިދާޅުވި އެވެ.
