ލަންޑަން (ޑިސެމްބަރު 29) - ޓޮޓެންހަމް ހޮޓްސްޕާސް އަށް ކުޅެމުން އަންނަ އާޖެންޓީނާގެ ޑިފެންޑަރު ކްރިސްޓަން ރޮމޭރޯ އަށް އަނިޔާވެ ފަސް ހަފްތާ އަށް ކުޅުމާއި ދުރުގައި ހުންނަން ޖެހިއްޖެ އެވެ.
ރޮމޭރޯ އަށް އަނިޔާވީ ހޮނިހިރު ދުވަހު ޓޮޓެންހަމް އިން އެވަޓަންގެ މައްޗަށް 2-1 ގެ ނަތީޖާއަކުން ކުރިހޯދި މެޗުގަ އެވެ.
ރޮމޭރޯ އަށް ނުކުޅެވުން ވާނީ ޓޮޓެންހަމް އަށް ލިބިގެންދާނެ ބޮޑު ހާސްކަމަކަށެވެ. އެއީ މި ވަގުތު ވެސް ޓޮޓެންހަމްގެ އަނިޔާގެ ލިސްޓު ދިގުވެފައި އޮތުމުންނެވެ.
އިޓަލީގެ އެޓަލަންޓާ ދޫކޮށް ޓޮޓެންހަމް އަށް ބަދަލުވެ، މޮޅު ކުޅުމެއް ދައްކަމުން އަންނަ، ރޮމޭރޯ އަށް އަނިޔާވުމާއި ގުޅިގެން ހެދި ޓެސްޓުތަކުން ދައްކާ ގޮތުގައި ރޮމޭރޯގެ ފައިގެ ފަލަމަސްގަނޑަށް ވަނީ އަނިޔާވެފަ އެވެ.
ޓޮޓެންހަމްގެ ކޯޗު އަންގޭ ޕޮސްޓެކޮގްލޫ، ދާދި ފަހުން ދިން އިންޓަވިއުއެއްގައި ބުނެފައިވަނީ އަނިޔާގެ މައްސަލަތަކާ ހެދި އަންނަ މަހު ހުޅުވޭ ޓްރާންސްފާ ބާޒާރުގައި ޓޮޓެންހަމް އިން އާ ކުުޅުންތެރިން ގަންނަން ހަރަކާތްތެރިވާނެ ކަމަށެވެ.
ލީގުގައި ރޭ ޓޮޓެންހަމް އިން ކުޅުނު މެޗުން ވަނީ ރަށުންބޭރުގައި ބްރައިޓަން އަތުން 4-2 އިން ބަލިވެފަ އެވެ. ޓޮޓެންހަމް މި ވަގުތު އޮތީ 19 މެޗުން 36 ޕޮއިންޓާ އެކު ލީގުގެ ފަސް ވަނައިގަ އެވެ.
