ބާސެލޯނާ (ޑިސެމްބަރު 26) - ލޯން އެއްބަސްވުމެއްގެ ދަށުން ބާސެލޯނާ އަށް ކުޅެމުން އަންނަ ފުލްބެކް، ޖޮއާއޯ ކަންސެލޯ އެކުލަބުގައި މަޑުކުރުވަން 30 މިލިއަން ޑަލޮރު އެކުލަބުން ހޭދަކުރަން ޖެހޭނެކަމަށް ބެލެވިއްޖެ އެވެ.
މި ސީޒަން ފެށުމުގެ ކުރިން އިނގިރޭސި ޕްރިމިއާ ލީގުގެ މެންޗެސްޓާ ސިޓީގެ ކަންސެލޯ ބާސެލޯނާ އަށް ބަދަލުވީ ލޯން އެއްބަސްވުމެއްގެ ދަށުންނެވެ. ބާސެލޯނާ އިން ބޭނުންނަމަ މި ސީޒަނަށް ފަހު ކަންސެލޯގެ ކޮންޓްރެކްޓް ދާއިމީ ކުރެވޭ ގޮތަށް ހަދާފައިވާ އެއްބަސްވުމާ އެއްގޮތަށް އެ ކުޅުންތެރިޔާ ބާސެލޯނާގައި ބަހައްޓަން ކޯޗު ޒަވީ ހެނާންޑޭޒް ބޭނުންވެ އެވެ.
ކަންސެލޯ އަކީ މި ސީޒަންގައި ކޯޗު ޒަވީގެ ފުރަތަމަ އެގާރައިގެ މުހިންމު ކުޅުންތެރިއެކެވެ. އޭނާ ވަނީ މި ސީޒަންގައި ބާސެލޯނާ އަށް މުހިންމު ގޯލްތަކެއް ވެސް ޖަހައިދީފަ އެވެ.
ބާސެލޯނާއިން ކަންސެލޯގެ ކޮންޓްރެކްޓް އާކުރަން ބޭނުންނަމަ 30 މިލިއަން ޑޮލަރު ސިޓީއަށް ދޭން ޖެހޭނެ އެވެ. އެކަން ކުރުމަށް އެކުލަބަށް އޮތް އެންމެ ބޮޑު ގޮންޖެހުމަކީ ކުލަބުގެ މާލީ ހާލަތެވެ. އެކަމަކު، އެއްބަސްވުމެއްގެ ތެރެއިން ބަހާލައިގެން އެ ފީ ދައްކާ ގޮތަށް ވެސް ބާސެލޯނާ އިން އޮތީ އެ ޑީލާ މެދު ރުހޭ ގޮތަށެެވެ.
ބާސެލޯނާގެ މާލީ ހާލަތު ރަނގަޅުކުރުމަށް ކުލަބު މެޖޭންމަންޓުން އަންނަނީ އިތުރުކުރަމުންނެވެ. އެ ގޮތުން ސްޕޮންސަރުން އިތުރުކުރުމާއި ކުލަބުގެ ދަރަނިތައް ކުޑަކުރުމަށް ގިނަ ހަރަދުތަކެއް އަންނަނީ މޮނީޓާ ކުރަމުންނެވެ.
ބާސެލޯނާ އަށް ޖެނުއަރީ ޓްރާންސްފާގައި ކުޅުންތެރިން ގަނެވެން އޮތީ ބައެއް ކުޅުންތެރިން ވިއްކާލައިގެންނެނެވެ. އެ ކަމަށް ވެސް އެ ކުލަބުން އަންނަނީ ތައްޔާރު ވަމުންނެވެ.
ކުރިން، ޔުވެންޓަސް، ބަޔާން މިއުނިކް އާއި އިންޓަ މިލާނަށް ވެސް ކުޅެފައިވާ، ކަންސެލޯގެ އިތުރުން ފޯވާޑް ޖޮއާއޯ ފެލިކްސް އަކީވެސް އެކުލަބުން ދާއިމީ ކޮންޓްރެކްޓެއް ދޭން ބޭނުންވާ ކުޅުންތެރިއެކެވެ. ފެލިކްސް ވެސް ބާސެލޯނާ އަށް ބަދަލުވީ ލޯން އެއްބަސްވުމެއްގެ ދަށުން މި ސީޒަންގެ ނިޔަލަށެވެ.
