މި ފެށޭ 2024 ވަނަ އަހަރު އޮންނަ ރައްޔިތުންގެ މަޖިލީހުގެ އިންތިހާބުގައި ވާދަކުރާނެ ޑިމޮކްރެޓްސްގެ ކެންޑިޑޭޓުން ކަނޑައެޅުމަށް ބާއްވާ އެތެރޭގެ ޕްރައިމަރީ އަންނަ އަހަރު ފެބްރުއަރީ 17، ގައި ބޭއްވުމަށް އެ ޕާޓީގެ ނެޝަނަލް އެސެމްބްލީން މިއަދު ފާސްކޮށްފި އެވެ.
ޑިމޮކްރެޓްސްއިން ބުނީ އެ ޕްރައިމަރީއަށް ކުރިމަތިލެވެނީ ފެބްރުއަރީ 4، ގެ ނިޔަލަށް އެ ޕާޓީގެ ދަފްތަރުގައި ރަޖިސްޓްރީވެފައިވާ މެންބަރުންނަށެވެ. އަދި ޕްރައިމަރީ ވޯޓު ދެވޭނީ ވެސް އެ ތާރީހުގެ ކުރިން ޕާޓީގެ ދަފްތަރުގައި ރަޖިސްޓްރީ ކުރެވޭ މެންބަރުންނަށް ކަމަށް އެ ޕާޓީން ބުންޏެވެ.
"މި ޕްރައިމަރީއަށް ކުރިމަތިލާން އެދި ހުށަހަޅާ ފޯމާއެކު ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ކުރިމަތިލާ މީހާގެ ކުށާއި ދަރަނީގެ ރިކޯޑު ސާފުކޮށްފައިވާ ފޯމާއި އަދި މޯލްޑިވްސް ކަރެކްޝަނަލް ސާވިސް އިން ޖިނާއީ ކުށްތަކާ ގުޅޭ ރިކޯޑް ސާފުކޮށްފައިވާ ފޯމު ހުށަހެޅަން ޖެހޭނެ ކަމަށް ވެސް ބުންޏެވެ.
މިދިޔަ ޖުލައި މަހު އުފެއްދި ޑިމޮކްރެޓްސް އިން ވަނީ އެންމެ ފަހުން ބޭއްވި ރިޔާސީ އިންތިހާބުގައި ވާދަކޮށްފަ އެވެ. އެ ޕާޓީގެ ރިޔާސީ ކެންޑިޑޭޓު އަދި މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބަށް ލިބުނީ އިންތިހާބުގެ ފުރަތަމަ ބުރުގައި ތިންވަނަ އެވެ.
ރިޔާސީ އިންތިހާބުގެ ދެވަނަ ބުރުގައި އެ ޕާޓީން އެއްވެސް ބަޔަކަށް ތާއީދެއް ނުކުރެ އެވެ.
މި ޕާޓީއަކީ އެމްޑީޕީގެ އޭރުގެ އެންމެ އިސް ދެ ލީޑަރުން ކަމަށްވާ، ކުރީގެ ރައީސް މުހައްމަދު ނަޝީދާއި ކުރީގެ ރައީސް އިބްރާހިމް މުހައްމަދު ސޯލިހާ ދެމެދު އުފެދުނު ސިޔާސީ ވާދަވެރި ކަމުގެ ތެރެއިން ސޯލިހަށް އެމްޑީޕީގެ ރިޔާސީ ޓިކެޓު ލިބުމުން، ނަޝީދަށް ތާއީދުކުރާ މީހުން އެމްޑީޕީން ވަކިވެ އުފެއްދި ޕާޓީއެކެވެ.
މެއި 17، ގައި ޑިމޮކްރެޓްސް އުފައްދާނެ ކަން އިއުލާންކުރިއިރު އެމްޑީޕީގައި ތިބެގެން އޭރު އޮތް އެ ޕާޓީގެ ސަރުކާރާ ދެކޮޅަށް މަސައްކަތް ކުރަމުން ދިޔުމުން، މިހާރު ޑިމޮކްރެޓްސްގެ ޕާލިމެންޓްރީ ގްރޫޕްގެ ލީޑަރު އަލީ އާޒިމް ވަނީ އެމްޑީޕީން ވަކިކުރަން ފާސްކޮށް، އެހެން މެންބަރުންގެ މައްސަލަ ބަލަން ފަށައިފަ އެވެ.
ރިޔާސީ އިންތިހާބަށް ފަހު ޑިމޮކްރެޓްސްގެ ބާނީ ނަޝީދު ވަނީ މި ވަގުތަށް ސިޔާސީ މަސައްކަތާ ދުރަށް ޖެހިލުމަށް ނިންމަވައިފަ އެވެ. ނަމަވެސް, ޑިމޮކްރެޓްސްގެ ސިޔާސީ ހަރަކާތްތައް ރާވައި ކުރިއަށް އެބަ ދެ އެވެ. މި މަހު އެ ޕާޓީގެ ރައީސް ކަމަށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވަނީ އިންތިހާބުކޮށްފަ އެވެ.
