މީގެ ހަތަރު އަހަރު ކުރިން އަވަށްޓެރި ސިލޯނުގައި ދިން ބޮމުގެ ހަމަލާތަކަށްފަހު އެގައުމުގެ ފަތުރުވެރި ކަމަށް އަލުން ދިރުން އަންނަން ފަށައިފި އެވެ.
ސިލޯނުގެ ތިންވަނައަށް އެންމެ ބޮޑު ސިނާއަތަށް ދިރުން އަންނަން ފަށާފައި މިވަނީ ވެއްޓިފައި އޮތް ދަރަނީގެ އަނދަވަޅުން އަރައިގަންނަން އެގައުމުން ކުރަމުންދާ މަސައްކަތުގެ ތެރެއިންނެވެ.
އެ ގައުމުގެ ސަރުކާރުން އާންމު ކޮށްފައިވާ ތަފާސް ހިސާބުތަކަށް ބަލާއިރު، މިމަހުގެ ދެވަނަ ހަފުތާއާ ހަމައަށް މިއަހަރު އެގައުމަށް 1.3 މިލިއަން ފަތުރުވެރިން ޒިޔާރަތް ކޮށްފައިވެ އެވެ. މިއީ ފާއިތުވި ހަތަރު އަހަރުގެ ތެރޭގައި އެގައުމަށް ޒިޔާރަތް ކުރި ފަތުރުވެރިންގެ އަދަދު އެއް މިލިއަން ހުރަސްކުރި ފުރަތަމަ ފަހަރެވެ.
މިއަހަރު ސިލޯނަށް އެންމެ ގިނަ ފަތުރުވެރިން ޒިޔާރަތް ކޮށްފައި ވަނީ އިންޑިއާއިންނެވެ. ދެވަނައަށް އެންމެ ގިނަ ފަތުރުވެރިން އެގައުމަށް ޒިޔާރަތް ކޮށްފައި ވަނީ ރަޝިޔާއިންނެވެ.
ސިލޯނުގެ ފަތުރުވެރިކަމުގެ ސިނާއަތަށް ލޮޅުން އަރައި ހުއްޓުމަކަށް އައީ 2019 ވަނަ އަހަރު އެގައުމުގެ ވެރިރަށް، ކޮޅުނބުގެ ތިން ފައްޅިއަކާއި ލަގްޒަރީ ތިން ހޮޓަލަށް އަމާޒުކޮށް ދިން ބޮމުގެ ހަމަލާތަކާ ގުޅިގެންނެވެ. އެ އަހަރުގެ ފަހުކޮޅު މުޅި ދުނިޔެ ހުއްޓުވައިލި ކޮވިޑް19 ގެ ބަލިމަޑުކަން ލައިގަތީ 250 އަށްވުރެ ގިނަ މީހުން މަރުވި އެ ހާދިސާއަށްފަހު ކުރިމަތިވި އިގުތިސާދީ ހީނަރުކަމުން ސިލޯނަށް އަރައިނުގަނެވި އުޅެނިކޮށެވެ.
އެއަށްފަހު ވެސް ސިލޯނުގެ ސަރުކާރުން ގެންގުޅެމުންދިޔަ ދޯދިޔާ ސިޔާސަތުތަކުގެ ސަބަބުން އެގައުމުގެ އިގުތިސާދު އެއްކޮށް ފުނޑުފުނޑުވެ މިދިޔަ އަހަރު މުޅި ގައުމު އިނދަ ޖެހުނެވެ. އެއާއެކު ގައުމު ހިންގުމަށް ބޭނުންވާ އަސާސީ ބައެއް ހިދުމަތްތައް ވެސް އެގައުމުގައި އެއްކޮށް ހުއްޓުމަކަށް އައެވެ.
ނަމަވެސް އެ އަޑިގަނޑުން އަރައިގަތުމުގެ އަޒުމުގައި ފަތުރުވެރިކަން ކުރިއެރުވުމަށް އަމާޒު ހިފައި ސިލޯނުން ފެށި މަސައްކަތުގައި މިއަދު މިވަނީ މޭވާ އަޅަން ފަށައިފަ އެވެ.
މިދިޔަ ނޮވެމްބަރު މަހުގެ ނިޔަލަށް ފަތުރުވެރިކަމުގެ ސިނާއަތުން ސިލޯނަށް 1.8 ބިލިއަން އެމެރިކާ ޑޮލަރު ލިބިފައިވެ އެވެ. އެއީ މިދިޔަ އަހަރުގެ އެ މުއްދަތާ އަޅައި ބަލާއިރު 78 އިންސައްތައިގެ ކުރި އެރުމެކެވެ. ތަފާސް ހިސާބުތަކުން ދައްކާ ގޮތުގައި ސިލޯނަށް ޒިޔާރަތް ކުރާ ކޮންމެ ފަތުރުވެރިއަކު ދުވާލަކު އެވަރެޖުކޮށް 181 އެމެރިކާ ޑޮލަރު ހަރަދު ކުރެ އެވެ.
ސިލޯނަށް ޒިޔާރަތް ކުރާ ފަތުރުވެރިންގެ އަދަދު އިތުރުވި ނަމަވެސް އެގައުމުގެ އިގުތިސާދު ކުރިއެރުވުމަށް، ގިނައިން ހޭދަކުރާ ފަތުރުވެރިންނަށް އަމާޒުކޮށްގެން ޕްރޮމޯޝަންތައް ހިންގުން ގިނަ ކުރަންޖެހޭ ކަމަށް ސިލޯނުގެ އިގުތިސާދު ދިރާސާ ކުރާ ފަރާތްތަކުން ބުނެ އެވެ.
ސިލޯނުގެ ފަތުރުވެރިކަން އިތުރަށް ކުރިއަރުވައި ހައި-އެންޑު ފަތުރުވެރިންނަށް އަމާޒުކޮށްގެން މަސައްކަތްތަކެއް ކުރުމަށް އެގައުމުގެ ރައީސް، ރަނިލް ވިކްރަމްސިންހެ ވެސް ގޮވާލައިފައިވެ އެވެ.
