މެންޗެސްޓާ (ޑިސެމްބަރު 19) - އިނގިރޭސި ޕްރިމިއާ ލީގުގައި ޓޮޓެންހަމް ހޮޓްސްޕާސްއާ ދެކޮޅަށް ކުޅުނު މެޗުގައި މެންޗެސްޓާ ސިޓީގެ ކުޅުންތެރިން ރެފްރީއާ ދިމާކޮށްލި މައްސަލައިގައި އެ ކުލަބު ޖޫރިމަނާކުރަން އިނގިރޭސި ފުޓްބޯޅަ އިދާރާއިން ނިންމައިފި އެވެ.
އިނގިރޭސި ޕްރިމިއާ ލީގުގައި މި މަހުގެ ތިން ވަނަ ދުވަހު ޓޮޓެންހަމްއާ ދެކޮޅަށް ކުޅެ އެއްވަރުވި މެޗުގައި ސިޓީގެ ކުޅުންތެރިން ރެފްރީއާ ދިމާކޮށްލައި އޭނާ ވަށާލީ, ރެފްރީ ނިންމި ނިންމުމަކަށް ހިތްހަމަ ނުޖެހިގެންނެވެ. މި މެޗުގެ ފަހުކޮޅު ޖެކް ގްރީލިޝް އަށް ހުސްކޮށް ގޯލެއް ޖަހަން ބޯޅަ ލިބުމުގެ ކުރިން ސިޓީގެ ކުޅުންތެރިއަކަށް ފައުލްކޮށްފައިވާ ކަމަށް ނިންމައި، ރެފްރީ ވަނީ ކަށިގަނޑު ފުމެފަ އެވެ. ސިޓީގެ ކުޅުންތެރިން ހިތްހަމަނުޖެހުން ފާޅުކުރީ, އެއީ ސިޓީއަށް ލިބުނު ހިލޭ ޖެހުމަކަށްވާތީ, އެޑްވާންޓޭޖަށް ރެފްރީ ފުރުސަތުދޭންޖެހޭ ކަމަށް ބުނެ އެވެ.
އެ މެޗަށްފަހު ސޯޝަލް މީޑިއާގައި ވެސް ސިޓީގެ ބައެއް ކުޅުންތެރިންވަނީ ރެފްރީއަށް މަލާމަތް ރައްދުވާ ގޮތަށް ސަކަރާތް ޖަހައި، ހިތްހަމަނުޖެހުން ފާޅުކޮށްފަ އެވެ. އެ ގޮތުން ސިޓީގެ ފޯވާޑް އާލިން ހާލަންޑް ޖެހި ސްޓޭޓަސްގެ މައްސަލަ މިހާރު ވެސް އިނގިރޭސި އެފްއޭ އިން އަންނަނީ ބަލަމުންނެވެ.
ސިޓީ އަށް އެ ޓީމުގެ ކުޅުންތެރިން ކޮންޓްރޯލް ނުކުރެވޭ ކަމަށް ބަލައި، އިނގިރޭސި އެފްއޭ އިން އެ ކުލަބު ޖޫރިމަނާ ކުރީ 120,000 ޕައުންޑުންނެވެ.
މި މައްސަލައިގައި މެންޗެސްޓާ ސިޓީގެ ކޯޗު ޕެޕް ގާޑިއޯލާ ކުރިން ބުނެފައިވަނީ އެ ޓީމުގެ ކުޅުންތެރިންގެ ފަރާތުން އަހުލާގީ ގޮތުން ގޯސްކަމެއް މި ސީޒަންގައި ނުފެންނަ ކަމަށެވެ. އަދި އެ މެޗުގައި ހިނގައިދިޔަ ހާދިސާއަކީ ކުޅުންތެރިންގެ މައްސަލައެއް ކަމަށް ނުދެކޭ ކަމަށް ވެސް ގާޑިއޯލާ ބުނެފައިވެ އެވެ.
މިދިޔަ ތިން އަހަރު. އިނގިރޭސި ޕްރިމިއާ ލީގުގެ ޗެމްޕިއަން، މެންޗެސްޓާ ސިޓީ މި ވަގުތު އޮތީ އުނދަގޫ ހާލަތެއްގަ އެވެ. އެންމެ ފަހުން ލީގުގައި ކުޅުނު ފަސް މެޗުގެ ތެރެއިން އެ ޓީމް މޮޅުވީ އެންމެ މެޗަކުންނެވެ. އަނެއްކޮޅުން، މި ވަގުތު އެ ޓީމް އޮތީ ލީގު ތާވަލްގެ ހަތަރު ވަނައިގަ އެވެ.
