ރައްޔިތުންގެ މަޖިލީހުގެ މިއަހަރުގެ ތިން ވަނަ ދައުރު މިމަހުގެ 28 ވަނަ ދުވަހުގެ ނިޔަލަށް ކުރިޔަށް ގެންދަން މަޖިލީހުން ފާސްކޮށްފި އެވެ.
މަޖިލީހުގެ ދައުރު ދިގުކުރަން ރައީސް މުހައްމަދު އަސްލަމް ހުށަހެޅުއްވުމުން އެކަން އެގޮތަށް ފާސްކުރީ މިއަދުގެ ޖަލްސާގައި ވޯޓު ނެގި ވަގުތު ހާޒިރުވެވަޑައިގެން ތިއްބެވި 64 މެންބަރުންގެ އިއްތިފާގުންނެވެ.
މަޖިލީހުގެ ތިން ވަނަ ދައުރު ނިމޭ ތާރީހަކީ ނޮވެމްބަރު 27 އެވެ، ނަމަވެސް، އޭރު ވެސް މަސައްކަތްތައް ހުރުމުން، ޑިސެމްބަރު 7 އަށް އަދި އެއަށްފަހު ޑިސެމްބަރު 18 އަށް މުއްދަތު އިތުރުކުރި އެވެ.
މަޖިލީހުގެ ދައުރު އިތުރަށް ދަންމާލާފައި ވާއިރު ރައީސް ޑރ. މުހައްމަދު މުއިއްޒު އެކުލަވާލި 22 މިނިސްޓަރުންގެ ކެބިނެޓަށް ރުހުން ދިނުން އަދިވެސް އޮތީ މަޖިލީހުގަ އެވެ.
ރައްޔިތުންގެ މަޖިލީހުގެ މިއަދުގެ ފަހު ޖަލްސާ މިއަދު ފެށުމާ އެކު ތުޅާދޫ ދާްއިރާގެ އެމްޑީޕީ މެމްބަރު ހިސާން ހުސައިން ނިޒާމީ ނުކުތާއެއްގެ ގޮތުގައި ފާހަގަކުރެއްވީ ވަޒީރުންނަށް ރުހުން ދިނުމުގެ މައްސަލައިގެ ރިޕޯޓް ކޮމިޓީން ފާސްކޮށްފައި އޮތީ ގަވައިދާ އެއްގޮތަށް ނޫން ކަމަށެވެ.
އެ މައްސަލަ ބަލައިގަނެ މަޖިލީހުގެ ރިޔާސަތުން މިހާރު ވަނީ ވަޒީރުންނަށް ރުހުން ދިނުމުގެ ރިޕޯޓު އަނބުރާ ކޮމިޓީއަށް ފޮނުވާލާފަ އެވެ.
