ބަންގްލަދޭޝް ރައްޔިތުން އަލުން ރާއްޖެ ގެނައުމަށް ސަރުކާރުން ނިންމި ނިންމުން ގާނޫނު އަސާސީއާ ހިލާފު ކަމަށާއި އެއީ ގައުމީ ސަލާމަތަށް އޮތް ނުރައްކަލެއް ކަމަށް ކުރީގެ އިކޮނޮމިކް މިނިސްޓަރު އަދި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެ އެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ބަންގްލަދޭޝް ރައްޔިތުން ގެނައުން ހުއްޓުވާފައި އޮތުމަށް ފަހު އެގައުމުން ރާއްޖެއަށް އަން-ސްކިލްޑް ލޭބަރުން އަލުން ގެނެވޭ ގޮތަށް ހޯމްލޭންޑް ސެކިއުރިޓީ މިނިސްޓްރީއިން ހަމަޖެއްސީ މިއަދު އެވެ.
"އަން-ސްކިލްޑް ބިދޭސީން އެކަނި ރާއްޖެއަށް ގެނައުމަށް ނިންމި ނިންމުމަކީ އެމްޕްލޯއީމަންޓް ގާނޫނާ ހިލާފު ނިންމުމެއް، އެކަން ކުރުމަށް ފުރަތަމަ ޖެހޭނި ގާނޫނު ބަދަލު ކުރަން،" ފައްޔާޒް އެކްސް ގައި ކުރެއްވި ޕޯސްޓެއްގައި ވިދާޅުވި އެވެ.
ގާނޫނު ގައި މިހާރު އޮތް ގޮތުން އެއް ގައުމަކުން ގެނެވޭނީ އެންމެ ގިނަވެގެން އެއް ލައްކަ މީހުންނެވެ. ރާއްޖޭގައި މިހާރު ވެސް އެ އަދަދަށް ވުރެ ގިނައިން ބަންގްލަދޭޝް ރައްޔިތުން ތިބިކަމަށް ތަފާސްހިސާބު ތަކުން ދައްކަ އެވެ.
"ގާނޫނުގަ ކަނޑައެޅިފައިވާ އަދަދު ހަމަވެފައިވާ ގައުމަކުން ގާނޫނާ ހިލާފަށް މީހުން އެތެރެކުރަން ނިންމީމަ ވަރަށް ސުވާލު އުފަދޭ، ފަސް އަހަރު ހުއްޓުވާފަ އޮވެ އަލުން ގާނޫނާ ހިލާފަށް މިކަން ހުޅުވާލުމަކީ ގައުމީ ސަލާމަތަށް އަދި ދިވެހި އިގްތިސޯދާއި އިޖުތިމާއީ ފޭރާމަށް ހުރި ނުރައްކަލެއް،" ފައްޔާޒު ވިދާޅުވި އެވެ.
2019 ގެ ކުރިން ބަންގަލަދޭޝް ރައްޔިތުންގެ ވަގުފާރި އަކީ އަހަރަކު އެތައް ބިލިއަން ރުފިޔާއެއްގެ މުޑުދާރު ވިޔަފާރިއެއް ކަމަށް ތުހުމަތުކުރައްވައި، އެކަން ކުރުމަށް ސަރުކާރުން ނިންމުމުން ފައްޔާޒް ކަންބޮޑުވުން ފާޅުކުރެއްވި އެވެ.
ހޯމް ލޭންޑް އެންޑް ސެކިޔުރިޓީ މިނިސްޓްރީން މިއަދު ނިންމީ މިއަދުން ފެށިގެން ބަންގްލަދޭޝްއިން ރާއްޖެއަށް އަންސްކިލްޑް ލޭބަރުން ގެނެވޭގޮތަށް ސަރުކާރުން ހަމަޖައްސައި، އެހެން ގައުމުތަކުން ރާއްޖެއަށް އަންސްކިލްޑް ލޭބަރުން މިވަގުތު ގެނައުން މަޑުޖައްސާލާފައިވާ ކަމަށެވެ.
ބަންގްލަދޭޝް ލޭބަރުން ރާއްޖެ ގެނައުން މަނާކުރީ 2019 ވަނަ އަހަރު އެވެ.
ވަޒީފާއާބެހޭ ގާނޫނުގައި 65 ވަނަ މާއްދާގެ ހ. ގައި ބަޔާންކޮށްފައިވާ ގޮތުން އެއް ގައުމަކުން ރާއްޖެއަށް އެންމެ ގިނައިން ގެނެވޭނީ 100,000 މީހުން ކަމަށެވެ. އިކޮނޮމިކް މިނިސްޓްރީން އެންމެފަހުން ހާމަކުރި ތަފާސްހިސާބުތަކުން އެނގޭ ގޮތުގައި ރާއްޖޭގައި 139,220 ބަންގްލަދޭޝް މީހުން މަސައްކަތްކުރެ އެވެ.
އެހެންކަމުން, ހޯމްލޭންޑް ސެކިއުރިޓީ މިނިސްޓްރީގެ މި ނިންމުމަކީ ގާނޫނާ ތައާރަޒުވާ ނިންމުމެކެވެ.
