އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބަށް އެމްޑީޕީން ނެރޭނެ ކެންޑިޑޭޓުން ކަނޑައަަޅަން ބާއްވާ ޕްރައިމަރީގައި ވާދަކުރެވޭނީ ކުށުގެ ރެކޯޑް ސާފުކޮށްގެން ކަމަށް އެޕާޓީން ބުނެފި އެވެ.
އެމްޑީޕީގެ ކުރީގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ޗެއާޕާސަންގެ ނައިބު އިދާރީ އިބްރާހީމް ވަހީދު ވިދާޅުވީ ޕްރައިމަރީގައި ވާދަކުރަން ފުރުސަތު ދޭ ފަރާތްތަކުގެ ކުށުގެ ރެކޯޑް މިފަހަރު ސާފުކުރާ ގޮތަށް މިފަހަރު ހަމަޖެއްސީ އިލެކްޝަންސް ކޮމިޝަނުން ކުށުުގެ ރެކޯޑް ސާފުކުރާ ގޮތް ބަދަލުކޮށްފައި ވާތީ ކަމަށެވެ. ޕްރައިމަރީން ހޮވޭ މީހުންގެ ކުށުގެ ރެކޯޑްކުރަން ފަސް ދުވަސް ހޭދަވާ ކަމަށާއި އެއީ ވެސް ދުރާލައި ކުށުގެ ރެކޯޑް ސާފުކުރާ ގޮތަށް ނިންމި ސަބަބެއް ކަމަށް ވެސް އޭނާ ވިދާޅުވި އެވެ.
"މިދިޔަ ރައްޔިތުންގެ މަޖިލިސް އިންތިހާބާ ތަފާތުކޮށް ކަމެއް އެބަކުރަން، މިދިޔަ ފަަހަރު ރައްޔިތުންގެ މަޖިލިސް އިންތިހާބުގައި އަޅުގަނޑުމެން ، ޝައުގުވެރިކަން ފާޅުކުރަން ހުޅުވައިލި އިރު ހަމަ އެކަނި ޕާޓީ މެމްބަރެއްތޯ ބަލައިފަައި އެކަން ކުރަނީ. އެހެން ނަމަވެސް އޭގެ ފަހުން އިލެކްޝަންސް ކޮމިޝަނުން ކުށުގެ ރެކޯޑް ބަލާ ގޮތަށް ބައެއް ބަދަލު އައިސްފައި އެބަހުރި،" ވަހީދު ވިދާޅުވި އެވެ.
ކުށުގެ ރެކޯޑް ސާފުކުރަން އީސީން ކުރިން ބަލަނީ ހަމަ އެކަނި މާލޭގައި ހުރި ސުޕީރިއާ ކޯޓްތަކާއި އެމީހަކު ނިސްބަތްވާ ރަށުގެ ކޯޓްތައް ކަމަށް ވިޔަސް މިހާރު ހުރިހާ ކޯޓުތަކެއް ވެސް ބަލާ ކަން އޭނާ ފާހަގަކުރެއްވި އެވެ.
" އެހެން ނަމަވެސް މިހާރު އެބަ ބަލާ ހަމަ ހުރިހާ ރަށެއްގެ ރަށުކޯޓުގައި އޭނާގެ ދަރަންޏެއް ނުވަތަ ކުށުގެ ރެކޯޑެއް އޮތްތޯ، އެހެންވީމާ އެކަންކަން އަޅުގަނޑުމެންނަށް ވެސް ޕްރައިމަރީން ހޮވޭ ފަރާތެއްގެ، ހުރިހާ ރަށަކުން މިކަން ބަލަން، އަދި ޑީޖޭއޭ އަށް ފަސް ދުވަސް ބޭނުންވާތީއާ އެއްކޮށް، އަޅުގަނޑުމެން މިހާރު ގަސްދުކޮށްފައި އޮތީ ޕްރައިމަރީއަށް ވާދަކުރާ އިރު ވެސް ކުށުގެ ރެކޯޑް ސާފުކޮށްފައި، އެއާ އެއްކޮށް އެ ބޭފުޅުން [ފޯމު] ހުށަހަޅުއްވަން ޖެހޭނީ،" ވަހީދު ވިދާޅުވި އެވެ.
އޭނާ ވިދާޅުވި ގޮތުގައި ޕްރައިމަރީގައި ވާދަކުރުމަށް ޓަކައި ފުރަން ޖެހޭ ފޯމް އެމްޑީޕީގެ ވެބްސައިޓުން ލިބެން ހުރި އިރު އެ ފޯމާ އެކީ ކުށުގެ ރެކޯޑް ސާފުކުރާ ފޯމު ވެސް އޮންނާނެ އެވެ.
