އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ޖަމިއްޔަތު ސަލަފުގެ އިސްވެރިންނާ މިއަދު ބައްދަލު ކުރައްވައިފި އެވެ.
މިއަދުގެ ބައްދަލުވުމަކީ ސަލަފު ޖަމިއްޔާގެ އެދުމުގެ މަތިން ބޭއްވި ބައްދަލުވުމެއް ކަމަށް އިސްލާމިކް މިނިސްޓްރީން ބުންޏެވެ. އެ ބައްދަލުވުމުގައި، މިނިސްޓްރީ އާއި ސަލަފްއާ ގުޅިގެން މަސައްކަތް ކުރަން ކާމިޔާބު މަޝްވަރާތަކެއް ކުރެވުނު ކަމަށް މިނިސްޓްރީން ބުނެ އެވެ.
މިނިސްޓްރީ އާއި ސަލަފްއާ ގުޅިގެން މަސައްކަތް ކުރުމުގެ މުހިންމުކަމުގެ މައްޗަށް އެ ބައްދަލުވުމުގައި ވާހަކަ ދެކެވުނު ކަމަށް ސަލަފުން ވެސް ބުންޏެވެ. އަދި އެ ބައްދަލުވުމުގެ ސަބަބުން ޖަމިއްޔާ އާއި މިނިސްޓްރީއާ ދެމެދު ރަނގަޅު ގުޅުމެއް އުފެއްދުމަށް މަގުފަހިވެފައިވާ ކަމަށް ވެސް ސަލަފުން ބުންޏެވެ.
އެ ބައްދަލުވުމުގައި ސަލަފުގެ ޝެއިހު އަބްދުﷲ ބިން މުހައްމަދު އިބްރާހިމް އާއި ބައެއް އެހެން އިސް ވެރިން ބައިވެރިވެވަޑައިގަތެވެ. މިނިސްޓްރީގެ ފަރާތުން މިނިސްޓަރުގެ އިތުރުން އިސްލާމީ މަރުކަޒުގެ އިމާމް ޝެއިހު މުހައްމަދު ލަތީފް އަދި މިނިސްޓްރީގެ ބައެއް އެހެން އިސް ވެރިން ބައިވެރިވެވަޑައިގަތެވެ.
ޖަމިއްޔަތު ސަލަފަކީ ދީނީ ހޭލުންތެރިކަން އިތުރުކުރުމުގެ މަގުސަދުގައި މަސައްކަތް ކުރާ ރާއްޖޭގެ އެންމެ ދުވަސްވީ އެއް ޖަމިއްޔާ އެވެ. އެ ޖަމިއްޔާ ރަޖިސްޓްރީކޮށް ހިންގަން ފެށީ މީގެ 17 އަހަރު ކުރިން މާޗް 12، 2006 ގަ އެވެ.
