ވިލާ ކޮލެޖުގައި އަންނަ މަހު ފަށާ ކޯސްތަކާ ގުޅޭ މައުލޫމާތު ދިނުމަށް "އޯޕަން ޑޭ" އެއް ބާއްވަން ނިންމައިފި އެވެ.
ވިލާކޮލެޖުގެ "އޯޕަން ޑޭ" ބާއްވާނީ މާދަމާ ހަވީރު 4:00 އިން ރޭގަނޑު 10:00 އަށް އެ ކޮލެޖުގަ އެވެ.
ވިލާ ކޮލެޖުން ބުނީ މި ހަރަކާތްތަކުގައި، ކޯސް ތަކުގެ މައުލޫމާތު ދިނުމުގެ އިތުރުން ކިޔަވައިދޭ ލެކްޗަރާއިންނާ ބައްދަލު ކުރެވޭނެ އިންތިޒާމު ވެސް ހަމަޖެހިފައިވާ ކަމަށެވެ. އަދި, އެކޮލެޖުގެ ކުރީގެ ދަރިވަރުންނާއި މިހާރު ކިޔަވަމުންދާ ދަރިވަރުންނާއި ބައްދަލުވެ އެ ކުދިންގެ ތަޖުރިބާ ހިއްސާކޮށްލުމުގެ ފުރުސަތު ވެސް ހުޅުވާލާފައިވާ ކަމަށް ބުންޏެވެ.
އޭގެ އިތުރުން ކޯސްތަކަށް ވަނުމަށް އެޕްލިކޭޝަން ހުށަހެޅުމާއި، ވަގުތުން ކޯހަށް ހޮވުނުކަމުގެ ލިޔުން އަދި ކޯހަށް ރަޖިސްޓްރީ ވެވޭނެ އިންތިޒާމް ވެސް މި ހަރަކާތުގެ ތެރެއިން ހަމަޖެހިގެންދާނެ ކަމަށް އެ ކޮލެޖުން ބުންޏެވެ.
ވިލާ ކޮލެޖުގެ "އޯޕަން ޑޭ" ގެ ތެރެއިން ތަފާތު ކުޅިވަރު ހަރަކާތްތަކާއި ހާއްސަ ލަކީޑްރޯއެއް ނެގުމަށް ވެސް ވަނީ ހަމަޖެހިފަ އެވެ. "އޯޕަން ޑޭ" އަށް ޒިޔާރަތް ކުރާ ފަރާތްތަކުގެ މެދުގައި ނެގޭ މި ގުރުއަތުން ނަސީބު ވެރި ފަރާތަކަށް ހާއްސަ އިނާމެއް ލިބިގެންދާނެ ކަމަށް ވިލާ ކޮލެޖުން ބުންޏެވެ.
އޯޕަންޑޭގެ ހަރަކާތްތަކުގެ ތެރޭގައި ވިލާ ކޮލެޖުގެ އިންޑަސްޓްރީ ޕާޓްނަރުންނާ ގުޅިގެން ހިންގާ ކެރިއަ ފެއާގައި ޕަބްލިކް އަދި ޕްރައިވެޓް ސެކްޓަރުގެ ވަޒީފާގެ ފުރުސަތުތައް ވެސް ފެނިގެން ދާނެ އެވެ. އަދި, ވިލާ ކޮލެޖުން ހިންގާ ކްލާސްތަކުގެ ތެރެއިން ބައެއް ކްލާސްތައް ތަޖުރިބާ ކޮށްލުމަށްޓަކައި ހިލޭ ބައިވެރިވެވޭ "ޑެމޯ ކްލާސް" ތަކާއި ވިލާ ކޮލެޖުގެ ދަރިވަރުންނަށް ހުރި ވަސީލަތްތައް ބަލާލުމުގެ ފުރުސަތު ވެސް ވަނީ ހަމަޖެހިފަ އެވެ.
ވިލާ ކޮލެޖުން ބުނީ މި ޑެމޯ ކްލާސް ތަކުގެ ތެރޭގައި ފެކަލްޓީ އޮފް އެޑިއުކޭޝަނަލް ސްޓަޑީޒްއިން، ސެލްފް އެސްޓީމް، ރިސާޗް އަދި ބަޔޮލޮޖިކަލް ސައިކޮލޮޖީ އަދި ޖެނެރަލް މެތްމެޓިކްސް ހިމެނިގެން ދާނެ ކަމަށެވެ.
އަދި ފެކަލްޓީ އޮފް އިންޖިނިއަރިންގެ، ސެންސިން ދަ ވޯލްޑް: ސެންސާޒް އިން ޑޭ-ޓު-ޑޭ ލައިފް، އާޑުއިނޯ އޯސަމްނަސް: ޑައިވް އިންޓު ރޮބޮޓިކްސް، އިންޖިނިއަރިން ސިމިއުލޭޝަން އަދި މެކޭނިކަލް ލެބް އެކްސްޕީރިއަންސްވެސް މި ޑެމޯ ކްލާސް ތަކުން ލިބިގެން ދާނެ ކަމަށް ވިލާ ކޮލެޖުން ބުންޏެވެ.
