ސްރީ ލަންކާގައި ނިއުކްލިއާ ހަކަތަ އުފައްދަން ބައެއް ގައުމުތަކުން ޝައުގު ފާޅުކޮށްފައި ވާއިރު، އެކަމަށް ފެހި ސިގްނަލެއް ދީފި އެވެ.
ސްރީ ލަންކާގެ އެޓޮމިކް އެނާޖީ އޮތޯރިޓީން ބުނީ ރަޝިއާ، ޗައިނާ، ޑެންމާކް އަދި އެމެރިކާ ފަދަ ގައުމުތަކުން ނިއުކްލިއާ ހަކަތައަށް އިންވެސްޓު ކުރަން ހުށަހަޅާފައިވާ ކަމަށެވެ.
ރަޝިއާއިން ބަންގްލަދޭޝްގައި ނިއުކްލިއާ ޕްލާންޓެއް ބެހެއްޓުމަށް އިންވެސްޓުކޮށްފައި ވާއިރު، އިންޑިއާގައި ވެސް ޕްލާންޓެއް ގާއިމުކުރަން ޝައުގުވެރިކަން ފާޅުކޮށްފައިވެ އެވެ. އަދި ދާދި ފަހުން ސްރީ ލަންކާ އަށް ޒިޔާރަތް ކުރެއްވި ރަޝިއާ ސަރުކާރުގެ ވަފުދުން ވަނީ ނިއުކްލިއާ ހަކަތައިގެ ދާއިރާއިން އެއްބާރުލުން ދިނުމަށް މަޝްވަރާ ކުރައްވައިފަ އެވެ.
އެޓޮމިކް އެނާޖީ އޮތޯރިޓީގެ ޗެއާމަން އެސްއާރްޑީ ރޯޒާ، ސްރީލަންކާގެ ޑެއިލީ މިރާއަށް ވިދާޅުވީ އޮފްޝޯ ނުވަތަ އޮންޝޯ ނިއުކްލިއާ ޕަވާ ޕްލާންޓެއް ތަރައްގީ ކުރުމަށް ރަޝިޔާއިން ހުށަހެޅި ހުށަހެޅުމުމުން، އެކަމާ ގުޅޭ ގޮތުން ފޮރިން މިނިސްޓްރީގެ ހުއްދައަށް ފޮނުވާފައިވާ ކަމަށެވެ.
ގާތްގަނޑަކަށް ދެ ބިލިއަން ޑޮލަރުގެ މި މަޝްރޫއު ކުރިއަށް ގެންދެވޭނީ ދެ ގައުމުގެ ސަރުކާރުން ރަސްމީ އެއްބަސްވުމަކަށް އައުމަށް ފަހު ކަމަށް ވެސް އޭނާ ވިދާޅުވި އެވެ.
