މެޑްރިޑް (ޑިސެމްބަރު 8) - ރެއާލް މެޑްރިޑާ ގުޅުމާ މެދު ގޮތެއް ނިންމަން ފްރާންސްގެ ޕީއެސްޖީ އަށް ކުޅޭ ފޯވާޑް، ކީލިއަން އެމްބާޕޭ އަށް ޑެޑްލައިނެއް ދީފި އެވެ.
ޕީއެސްޖީއާ އެކު، އެމްބާޕޭ، 24، ހުރީ މި ސީޒަނުގެ ނިޔަލަށް ހަދާފައިވާ ކޮންޓްރެކްޓެއްގަ އެވެ. ޖޫން މަހުގެ ނިިޔަލަށް އޮތް އެ ކޮންޓްރެކްޓާ މެދު މި މަހުގެ ކުރިން ޕީއެސްޖީ އަށް ގޮތެއް ނުނިންމިއްޖެނަމަ އަންނަ މަހުގެ އެއް ވަަނަ ދުވަހުން ފެށިގެން، އެމްބާޕޭ އަށް ބޭނުން ޓީމުތަކަކާ އެކު މަޝްވަރާ ކުރެވޭނެ އެވެ. އަދި ބޭނުންނަމަ ޖުލައި އެއް ވަނަ ދުވަހު އާ ޓީމަކާ ގުޅޭގޮތަށް ޕްރީ އެގްރީމެންޓެއްގައި ސޮއިކުރެވޭނެ އެވެ.
އެމްބާޕޭ އަށް އާ ކޮންޓްރެކްޓެއް ޕީއެސްޖީން ވަނީ ހުށަހަޅައިފަ އެވެ. އެ އެއްބަސްވުމަށް އެމްބާޕޭ ނުރުހޭނަމަ ޖެނުއަރީ ޓްރާންސްފާ ތެރޭގައި ޕީއެސްޖީން އޭނާ ވިއްކާލުމުގެ ފުރުސަތު އެބައޮތެވެ. އެއީ ސީޒަން ނިމުމުން އެމްބާޕޭ އަށް ހިލޭ ޓްރާންސްފާއެއްގައި ކްލަބް ބަދަލުކުރުމުގެ ފުރުސަތު އޮތްއިރު، ޓީމުގައި ހުރި އެންމެ އަގުބޮޑު ކުޅުންތެރިޔާ ކްލަބް ދޫކޮށްލާއިރު އެއްވެސް ފައިސާއެއް ނުލިބިދާނެތީވެ އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން، ރެއާލުން ވަނީ ގޮތެއް ނިންމަން އެމްބާޕޭ އަށް މުހުލަތެއް ދީފަ އެވެ. އެ ގޮތުން، ޖެނުއަރީ 15 ގެ ކުރިން އެމްބާޕޭގެ ނިންމުން ހިއްސާކުރަން ރެއާލުން ވަނީ އަންގައިފަ އެވެ.
އެމްބާޕޭ އަށް އެހާތަނަށް ގޮތެއް ނުނިންމިއްޖެނަމަ ރެއާލުން މެންޗެސްޓާ ސިޓީގެ ފޯވާޑް، އާލިން ބްރައުޓް ހާލަންޑަށް އޮފާ ކޮށްފާނެ ކަމަށް ވެސް ސްޕެއިނުގެ ނޫސްތަކުން ވަނީ ރިޕޯޓްކޮށްފަ އެވެ. ރަސްމީ ސްޓްރައިކަރެއް ނުލައި ރެއާލުން މި ވަގުތު ކުޅެމުން އަންނައިރު، އެ މަގާމަށް އެންމެ އެކަށޭނެ އެއް ކުޅުންތެރިއަކީ ހާލަންޑް ކަމަށް ގިނަ ބަޔަކު އަންނަނީ ބުނަމުންނެވެ.
