ލަންޑަން (ޑިސެމްބަރު 7) - ނަފްސާނީ ދުޅަހެޔޮކަމަށް އިސްކަންދިނުމުގެ ވިސްނުމުގައި އަރަމުން އަންނަ އިނގިރޭސި ކްރިކެޓް ތަރި، ހެރީ ބްރޫކް ސޯޝަލް މީޑިއާ އެޕްތައް ޑިލީޓްކޮށްލައިފި އެވެ.
ބްރޫކް، 24، ބައިނަލްއަގުވާމީ ކްރިކެޓްގައި ވިދުންގަދަވާން ފެށީ 2022 ގައި ރަސްމީކޮށް ގަވާއިދުން ކުޅެން ފަށައި، އެ އަހަރުގެ ޓީ20 ކްރިކެޓް ވޯލްޑް ކަޕް ކާމިޔާބުކުރުމުގެ އިތުރުން ޓެސްޓް ކްރިކެޓްގައި ވެސް ތަފާތު ދައްކަން ފެށުމުންނެވެ.
ދާދި ފަހުން، އިންޑިއާގައި ނިމުނު ވަންޑޭ އިންޓަނޭޝަނަލް ކްރިކެޓް (އޯޑީއައި) ފޯމެޓްގެ ވޯލްޑް ކަޕްގައި އިންގްލެންޑް ގްރޫޕް ސްޓޭޖުން ކެޓިއިރު، އެންމެ ގިނަ ބަޔަކު ފާހަގަކުރި ކަމަކީ ބްރޫކް އަށް އުންމީދު ކުރި ވަރާ ގާތަށް ނުކުޅެވުނު ކަމެވެ.
އޯޑީއައި ވޯލްޑް ކަޕްގެ ކުރިން 50 އޯވަރު ކުޅޭ އެ ފޯމެޓްގައި ބްރޫކް ކުޅެފައިވަނީ ވެސް މަދު މެޗުތަކެކެވެ. އެހެންވެ، ފޯމެޓްގެ މާ ބޮޑު ތަޖުރިބާއެއް ވެސް ނެތުމާ އެކު، ވޯލްޑް ކަޕްގެ ޕްރެޝަރުގައި ކުޅެން ޖެހުމުން ބްރޫކް އަށް އެންމެ ރަނގަޅަށް ނުކުޅެވުނެވެ.
މީޑިއާ އަށް ދިން އިންޓަވިއުއެއްގައި ބްރޫކް ބުނެފައިވަނީ ޕްރެޝަރުގައި ދުވަސްތަކެއް ހޭދަކުރަން ޖެހުމުން އެންމެ ބޮޑު އިސްކަމެއް ދީފައިވަނީ މެންޓަލީ (ނަފްސާނީ ގޮތުން) އެންމެ ރަނގަޅު ލެވަލެއްގައި ހުރުމަށް ކަމަށެވެ. އެހެންވެ، އެ ކަމަށް ބާރު އެޅުމުގެ ގޮތުން ނިންމި ބައެއް ނިންމުންތަކުގެ ތެރޭގައި ސޯޝަލް މީޑިއާއާ އަމިއްލަ އަށް ދުރަށް ޖެހިލުން ހިމެނޭ ކަމަށް ބްރޫކް ވަނީ ބުނެފަ އެވެ.
"އަހަރެން ސޯޝަލް މީޑިއާއާ ދުރުގައި މި އުޅެނީ. އެހެން ސޯޝަލް މީޑިއާ އިން މި އަންނަ ކަހަަލަ ނެގެޓިވް ކަމެއް އައުމާ އެކު، އަހަރެން ހުންނާނީ ޑިލީޓް ކޮށްލައިފައި،" ބްރޫކް ބުންޏެވެ.
"ނެގެޓިވް ކަންކަމަށް އަހަރެން އެހާ ބޮޑަށް ނުބަލަން. އެހެންވެ، އަހަރެންގެ ގޭމް ރަނގަޅު ކުރަން ވެސް އަސްލު ފަސޭހަ، އަހަރެންގެ ނަފްސާނީ ދުޅަހެޔޮ ކަމަށް ވެސް ބާރު އެޅޭ ހަގީގަތުގައި. ސޯޝަލް މީޑިއާއާ ދުރަށް ދިއުމުން ނެގެޓިވް ގިނަ ކަންކަމުން ދުރުވެވިއްޖެ،"
ބްރޫކް މިހާރު ނިންމާފައިވަނީ އޭނާގެ ސޯޝަލް މީޑިއާގެ ކަންކަން ބެލެހެއްޓުމަށް ވަކި ޓީމަކާ ހަވާލު ކުރުމަށެވެ. އެ ގޮތުން، ޕްރޮމޯޓް ކުރަން ޖެހޭ ކަންކަން ކުރުމަށް އިސްކަން ދިނުމުގެ ގޮތުން އެ ޓީމުން ހަރަކާތްތެރިވާން ވަރަށް އަވަހަށް ފަށާނެ ކަމަށް ބްރޫކް ވަނީ ބުނެފަ އެވެ.
"އަހަރެން ބޭނުންވަނީ ކުޅުން ރަނގަޅު ކުރަން ފޯކަސް ކުރަން. ޕީއާރް ބަލާނީ އަހަރެންގެ ޓީމުން،" ބްރޫކް ބުންޏެވެ.
