މެންޗެސްޓާ (ޑިސެމްބަރު 6) - މެންޗެސްޓާ ސިޓީ އަށް މި ފަހަރު ވެސް އިނގިރޭސި ޕްރިމިއާ ލީގުގެ ޗެމްޕިއަންކަން ހޯދޭނެ ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.
ލީގުގައި އެންމެ ފަހުން ކުޅުނު ތިން މެޗުން ވެސް ސިޓީ ވަނީ އެއްވަރުވެފަ އެވެ. ސިޓީ މި ވަގުތު އޮތީ ލީގުގެ ތިން ވަނައިގަ އެވެ. އެއް ވަނައިގައި އޮތް އާސެނަލުން ވަނީ ސިޓީ އަށް ވުރެ އެއް މެޗު އިތުރަށް ކުޅެފަ އެވެ. އާސެނަލަށް ވަނީ ސިޓީ އަށް ވުރެ ހަ ޕޮއިންޓް އިތުރަށް ލިިބިފަ އެވެ.
ލީގުގައި މިރޭ ސިޓީން ކުޅޭނީ އެސްޓަން ވިލާއާ ދެކޮޅަށެވެ. އުނާއި އެމެރީގެ ކޯޗުކަމުގައި ކުޅޭ އެސްޓަން ވިލާ އިން ވަނީ އެންމެ ފަހުން އަމިއްލަ ދަނޑުގައި ކުޅުނު 13 މެޗުން މޮޅުވެފަ އެވެ. އެހެންކަމުން، މިއީ ސިޓީ އަށް ޕްރެޝަރު މެޗެކެވެ.
ވިލާއާ ދެކޮޅަށް ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ގާޑިއޯލާ ބުނީ ހާލަތު ބަދަލުކުރަން ސިޓީން މެޗުތަކުން މޮޅުވާން ޖެހޭ ކަމަށެވެ.
"އަހަރެން ގާތުގައި މިއަދު ސުވާލުކުރިޔަސް ބުނެވޭނީ ސިޓީ އަށް ލީގު ލިބޭނެއޭ. އަހަރެމެން ޓޮޓެންހަމް އާއި ލިވަޕޫލާ ދެކޮޅަށް ކުޅުނު ލެވަލްގައި ކުޅެފިއްޔާ އަހަރެމެންނަށް ލީގު ލިބޭނެ،" މިދިޔަ ތިން އަހަރު ސިޓީ އަށް ލީގު ޗެމްޕިއަންކަން ހޯދައިދޭން އެހީތެރިވި ގާޑިއޯލާ ބުންޏެވެ.
"ގިނަ ބަޔަކު ސިޓީއާ މެދު ޝައްކު ކޮށްފާނެ. އެއީ އެއްވެސް ޓީމަކަށް ޖެހިޖެހިގެން ހަތަރު ފަހަރު (ޕްރިމިއާ) ލީގު ހޯދިފައި ނުވޭ. އަހަރެމެން ގަބޫލުކުރަންވީ އެކަން އަހަރެމެންނަށް ކުރެވޭނެއޭ. އެ ހިތްވަރާ އެކު ކުރިއަށްދާން ބޭނުމީ އޭރުން ކާމިޔާބުވާނެ،"
ވިލާއާ ދެކޮޅަށް ސިޓީން ކުޅޭ މެޗުގައި އެ ޓީމުގެ ރޮޑްރީ އަށް ނުކުޅެވޭނެ އެވެ. އޭނާ ހުރީ ސަސްޕެންޝަނެއްގަ އެވެ. މީގެ ކުރިން ރޮޑްރީ ނުލައި ލީގުގައި ސިޓީން ކުޅުނު ތިން މެޗުން ވެސް ވަނީ ބަލިވެފަ އެވެ.
އެންމެ ފަހުން، ސިޓީ ކުޅުނު މެޗުގައި ޓޮޓެންހަމްއާ 3-3 އިން އެއްވަރުވިއިރު، އެ މެޗުގައި ސިޓީގެ ކުޅުންތެރިންގެ އަހުލާގީ މައްސަލަތަކެއް ފާހަގަވެ، އެކަން އަންނަނީ ޕްރިިމިއާ ލީގުން ބަލަމުންނެވެ. ގާޑިއޯލާ ބުނީ އެކަމާ ބެހޭގޮތުން ވާހަކަ ދައްކާނީ މައްސަލައިގައި ކްލަބުން ނިންމާ ގޮތްތަކެއް ބެލުމަށް ފަހު ކަމަށެެވެ.
