ރައްޔިތުންގެ މަޖިލީހުގެ ދައުރު ޑިސެމްބަރު 18 ވަނަ ދުވަހުގެ ނިޔަލަށް ކުރިޔަށް ގެންދަން މަޖިލީހުގެ ރައީސް މުހައްމަދު އަސްލަމް ހުށަހަޅުއްވައިފި އެވެ.
މިއަދުގެ ޖަލްސާގައި އަސްލަމް ވިދާޅުވީ މަސައްކަތްތައް ނިމިފައި ނުވާތީ މަޖިލީހުގެ ދައުރު އަނެއްކާ ވެސް އިތުރު ކުރަން ނިންމާފައިވާ ކަމަށެވެ. ހުށަހެޅުމަށް މިއަދުގެ ޖަލްސާގައި ވޯޓަށް އަހާނެ އެވެ.
މަޖިލީހުގެ ތިން ވަނަ ދައުރު ނިމޭ ތާރީހަކީ ނޮވެމްބަރު 27 އެވެ، ނަމަވެސް، އޭރު ވެސް މަސައްކަތްތައް ހުރުމުން، ޑިސެމްބަރު 7 އަށް މުއްދަތު އިތުރު ކުރި އެވެ.
"މަޖިލީހުގެ ގަވާއިދުގެ 214 ވަނަ މާއްދާގެ ހ. ގެ ދަށުން ބަޖެޓު ކޮމިޓީގެ މަސައްކަތް ނިންމާ ހިނގަމުންދާ މަޖިލީހުގެ ދައުރު ނިންމުމުގެ 7 ދުވަސް ކުރިން ބަޖެޓާ މެދު ގޮތެއް ނިންމުމަށް ހުށަހެޅުމަށް އޮންނާތީ މި ހިނގާ ދައުރު 18 ޑިސެމްބަރާ އަށް ހަމައަށް އިތުރު ކުރުމަށް ވޯޓަށް އެހުމަށް ނިންމާފައިވާ ކަން ދަންނަަވާލަން،" އަސްލަމް ވިދާޅުވި އެވެ.
މަޖިލީހުގައި ކުރަން ހުރި މުހިއްމު ކަންކަމުގެ ތެރޭގައި އަންނަ އަހަރަށް ލަފާކުރާ ބަޖެޓު ފާސްކުރުމާއި ވަޒީރުންނަށް ރުހުން ދިނުމާ އަދި އެޑިޔުކޭޝަން މިނިސްޓަރު ޑރ އިސްމާއިލް ޝަފީއު މަޖިލީހަށް ހާޒިރުކޮށް ސުވާލު ކުރުން ހިމެނެ އެވެ.
