ރައްޔިތުންގެ މަޖިލީހުގެ ޗީފް އޮފް ބިއުރޯގެ މަގާމަށް ފާތިމަތު މުހައްމަދު ސޯލިހު (ފާތޭ) އައްޔަން ކުރައްވައިފި އެވެ.
ޗީފް އޮފް ބިއުރޯގެ މަގާމަށް ކުރީގެ ރައީސް އިބްރާހިމް މުހައްމަދު ސޯލިހުގެ ކޮއްކޯފުޅު ފާތިމަތު މުހައްމަދު ސޯލިހު މިއަދު އައްޔަން ކުރައްވާފައި ވާކަން މަޖިލީހުގެ އިދާރާއިން "އަދަދު" އަށް ވަނީ ކަށަވަރު ކޮށްދީފަ އެވެ. އޭނާ އެމަގާމަށް އައްޔަން ކޮށްފައި ވަނީ ރައްޔިތުންގެ މަޖިލީހުގެ ރައީސްއަށް މަޖިލީހުގެ ގަވާއިދުން ލިބިދީފައިވާ އިހުތިޔާރުގެ ދަށުން މަޖިލީހުގެ ރައީސް، މުހައްމަދު އަސްލަމް އެވެ.
ފާތިމަތު މުހައްމަދު ސޯލިހު ވަނީ މީގެ ކުރިން ރާއްޖޭގެ ވެރިކަން ކުރެއްވި، ރައީސް މައުމޫން އަބްދުލްގައްޔޫމްއާއި އެމަނިކުފާނުގެ އެއްބަފާ ކޮއްކޯފުޅު، ރައީސް އަބްދުﷲ ޔާމީން އަބްދުލްގައްޔޫމްއާއި ރައީސް އިބްރާހިމް މުހައްމަދު ސޯލިހުގެ ސެކްރެޓަރީކަން ކުރައްވައިފަ އެވެ. ރައީސް އޮފީހުގައި އަދާ ކުރައްވަމުން ގެންދެވި ވަޒީފާއިން އެކަމާ އިސްތިއުފާ ދެއްވީ މިދިޔަ ނޮވެމްބަރު 17 ގައި ރައީސް ސޯލިހުގެ ވެރިކަމުގެ ދައުރު ނިމުމުންނެވެ.
މީގެ 37 އަހަރު ކުރިން ފާތިމަތު މުހައްމަދު ސޯލިހު ސަރުކާރުގެ ހިދުމަތަށް ނުކުންނެވީ 1986 ވަނަ އަހަރު އެވެ.
