ބާސެލޯނާ (ޑިސެމްބަރު 4) - ސްޕެނިޝް ލީގުގައި ރޭ ޔާއޯ ފެލިކްސް ޖެހި ގޯލުން 1-0 އިން ބާސެލޯނާ އިން އެތުލެޓިކޯ މެޑްރިޑް ބަލިކޮށްފި އެވެ.
ޕޯޗުގަލް ގައުމީ ޓީމުގެ ފޯވާޑް، ފެލިކްސް އަކީ އެތުލެޓިކޯގެ ލޯނެއްގެ ދަށުން ބާސެލޯނާ އަށް ކުޅެމުން އަންނަ ކުޅުންތެރިއެކެވެ. ރޭގެ މެޗުގެ ކުރިން ސްޕެއިނުގެ މީޑިއާގައި އެންމެ ގިނައިން ދެކެވުނީ ފެލިކްސްގެ ވާހަކަ އެވެ. އެއީ މި މެޗުގައި ކުޅުނު ދެ ޓީމުގެ ކޯޗުން ވެސް އޭނާއާ ގުޅޭ ގިނަ ސުވާލުތަކަށް ޖަވާބުދީފައިވާތީ އެވެ.
މެޗުގެ 28 ވަނަ މިނިޓްގައި ފެލިކްސް ގޯލު ޖެހީ ރަފީނިއާ ތަނަވަސްކޮށްދިން ބޯޅައަކުންނެވެ. ހަނި އޭންގަލަކުން ފެލިކްސް ބޯޅަ ގޯލަށް ފޮނުވާލީ އެތުލެޓިކޯގެ ކީޕަރު ޔޭން އޮބްލަކް އަށް މާ ބޮޑު ފުރުސަތެއް ނުދީ އެވެ.
ފެލިކްސް ވަނީ މި ސީޒަނުގައި ބާސެލޯނާ އަށް މިހާތަނަށް 17 މެޗުން ފަސް ގޯލު ޖަހައިފަ އެވެ.
ބާސެލޯނާ އާއި އެތުލެޓިކޯ އަށް ވެސް ރޭގެ މެޗުގައި ގޯލު ޖަހަން ފުރުސަތު ތަނަވަސްކުރުމުގައި އެންމެ އެކަށީގެންވާ މިންވަރަށް މަސައްކަތް ކުރަން އުނދަގޫތަކެއް ކުރިމަތިވި އެވެ. އެތުލެޓިކޯ އަށް އެއްވަރުކޮށްދޭން މެމްފިސް ޑިޕާއި ހިލޭ ޖެހުމަކުން ރަނގަޅު ހަމަލާއެއް ފޮނުވާލިއިރު، ބާސެލޯނާ އަށް ދެ ވަނަ ގޯލެއް ޖަހައިދޭން ރޮބަޓް ލެވަންޑޯސްކީ އަށް ލިބުނު ފުރުސަތުތަކުގެ ބޭނުމެއް ނުކުރެވުނެވެ.
މި މޮޅާ އެކު، ބާސެލޯނާ އިން ވަނީ ލީގު ތާވަލުގައި އެތުލެޓިކޯ އަށް ވުރެ ކުރިއަށް ޖެހިލައިފަ އެވެ. ބާސެލޯނާ ތިން ވަނައިގައި އޮތީ 15 މެޗުން 34 ޕޮއިންޓާ އެކު އެވެ. އެތުލެޓިކޯ ހަތަރެއްގައި އޮތީ 14 މެޗުން 31 ޕޮއިންޓް ހޯދައިގެންނެވެ. އެއް ވަނައިގައި އޮތް ރެއާލް މެޑްރިޑާއި ދެ ވަނައިގައި އޮތް ޖިރޯނާ އަށް ވަނީ 15 މެޗުން 38 ޕޮއިންޓް ލިބިފަ އެވެ.
