ސައުދީ އަރަބިއްޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، މަތުރެކް ބިން އަބްދުﷲ އަލް އަޖާލީން އަލްދައުސަރީ، ރައްޔިތުންގެ މަޖިލީހުގެ ރައީސް، މުހައްމަދު އަސްލަމްގެ އަރިހަށް އިހްތިރާމުގެ ޒިޔާރަތެއް ކުރައްވައިފި އެވެ.
ދެ ބޭފުޅުން ބައްދަލުކުރައްވާފައި ވަނީ މިއަދު ހެނދުނު ރައްޔިތުންގެ މަޖިލީސް ކުރާ ގޭގަ އެވެ.
މި ބައްދަލުކުރެއްވުމުގައި، ރާއްޖެ އާއި ސައުދީއާ ދެމެދު އޮންނަ ދީނީ ގުޅުން ފާހަގަކުރައްވައި، ދެ ގައުމުގެ ގުޅުން އިތުރަށް ބަދަހިކުރެއްވުމާ ގުޅޭ ގޮތުން އަސްލަމްއާ، ސައުދީ ސަފީރު މަޝްވަރާ ކުރެއްވި އެވެ.
ސައުދީ އަރަބިއްޔާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، މަތްރެކް ބިން އަބްދުﷲ އަލްއަޖާލީން
އޭގެއިތުރުން، ސައުދީން ރާއްޖޭގެ ތަރައްގީއަށް ވެދެއްވާ އެހީތެރިކަމަށްޓަކައި ސައުދީ ސަރުކާރަށާއި ރައްޔިތުންނަށް އަސްލަމް ޝުކުރު އަދާކުރެއްވި އެވެ. އަދި، ރައްޔިތުންގެ މަޖިލީހާއި ސައުދީގެ ގާނޫނު ހަދާ މަޖިލީހާ ދެމެދު އޮންނަ ގުޅުން ވަރުގަދަ ކުރެއްވުމަށް މަސައްކަތް ކުރައްވާނެ ކަމަށް ވިދާޅުވި އެވެ.
މި ބައްދަލުކުރެއްވުމުގައި، ސައުދީ ސަރުކާރުން ރާއްޖެއަށް ކަނޑައަޅުއްވާފައިވާ ސަފީރު ރާއްޖެ އާއި ސައުދީ އަރަބިއްޔާއާ ދެމެދު އޮންނަ ރަހްމަތްތެރިކަމުގެ ގުޅުމުގެ މައްޗަށް އަލިއަޅުއްވާ ލެއްވި އެވެ. އަދި, ދެ ގައުމުގެ މެދުގައި އޮންނަ އިސްލާމީ، ސަގާފީ، އަހްލާގާއި، ތާރީހީ ގުޅުން ފާހަގަކުރެއްވި އެވެ.
އޭގެއިތުރުން، ތައުލީމީ ދާއިރާއިންނާއި ސިއްހީ ދާއިރާއިން ރާއްޖެއަށް އިތުރު އެހީތައް ހޯއްދަވައިދެއްވުމަށް މަސައްކަތް ކުރައްވާނެކަމަށް ވެސް ސަފީރު ވިދާޅުވި އެވެ.
