ލަންޑަން (ނޮވެމްބަރު 30) - ޔުއެފާ ޗެމްޕިއަންސް ލީގުގެ ގުރޫޕް ބީގައި ރޭ ލޯންސް އަތުން އަމިއްލަ ދަނޑުގައި 6-0 އިން މޮޅުވެ، ގުރޫޕްގެ އެއް ވަނަ ޓީމުގެ ގޮތުގައި އާސެނަލް މުބަރާތުގެ ދެ ވަނަ ބުރަށް ދަތުރުކޮށްފި އެވެ.
މި މެޗަށް ނިކުތްއިރު އާސެނަލް އަށް ދެ ވަނަ ބުރުގެ ޖާގައެއް ކަށަވަރުކުރަން ބޭނުންވެފައި އޮތީ އެންމެ ޕޮއިންޓެކެވެ. އެކަމަކު، މިކޭލް އާޓެޓާގެ އިރުޝާދުގެ ދަށުން ކުޅޭ އާސެނަލް އިން ވަނީ ތަފާތު ބޮޑުކޮށް މެޗުން މޮޅުވެ، ތިން ޕޮއިންޓާ އެކު ގުރޫޕްގެ އެއް ވަނަ ކަށަވަރުކޮށްފަ އެވެ.
މެޗުގެ ފުރަތަމަ 27 މިނިޓުގެ ތެރޭގައި އާސެނަލް އިން ވަނީ ތިން ގޯލުގެ ލީޑެއް ނަގައިފަ އެެވެ. މި ލަނޑުތައް އެ ޓީމަށް ކާމިޔާބުކޮށްދިނީ ކައި ހަވާޓްޒް، ގެބްރިއަލް ޖީސޫސް އާއި ގެބްރިއެލް މާޓިނެލީ އަދި ބުކާޔޯ ސާކާ އެވެ.
ފުރަތަމަ ހާފު ނިމެނިކޮށް، މާޓިން އޮޑެގާޑް ވަނީ އާސެނަލްގެ ފަސް ވަނަ ލަނޑު ކާމިޔާބުކޮށްފަ އެވެ. އަދި މެޗުގެ 86 ވަނަ މިނިޓުގައި އާސެނަލް އަށް ލިބުނު ޕެނަލްޓީއަކުން ޖޯޖީނިއޯ ވަނީ އާސެނަލްގެ ހަ ވަނަ ލަނޑު ކާމިޔާބުކޮށްފަ އެވެ. މިއީ ޖޯޖީނިއޯ އާސެނަލް އަށް ކާމިޔާބުކޮށްދިން ފުރަތަމަ ލަނޑެވެ.
މި ގުރޫޕްގައި އާސެނަލް އަށް ބާކީ އެއް މެޗު އޮތް ނަމަވެސް، އެ ޓީމަށް އެއް ވަނަ ކަށަވަރުވީ ދެ ވަނައިގައި އޮތް ޕީއެސްވީގެ މައްޗަށް ހަތަރު ޕޮއިންޓްގެ ލީޑެއް ލިބުމުންނެވެ.
ގުރޫޕް އެއް ވަނަ މަގާމާ އެކު، އާސެނަލް އަށް ވަނީ ދެ ވަނަ ބުރުގައި ކުޅޭ މެޗުގެ ދެ ވަނަ ލެގު އަމިއްލަ ދަނޑުގައި ކުޅެވޭނެކަން ކަށަވަރުވެފަ އެވެ.
މެޗަށް ފަހު އާސެނަލްގެ ކޯޗު އާޓެޓާ ބުނީ މި މެޗުން ލިބުނު މޮޅާމެދު ވަރަށް ހިތްހަމަޖެހޭ ކަމަށެވެ.
"އަހަރަމެންނަށް މި މެޗަށް ނިކުތްއިރު ދެވަނަ ބުރަށް ކޮލިފައިވެ، ގުރޫޕްގެ އެއްވަނަ ހޯދަން ފުރުސަތު އޮތް. އެކަމަކު އެކަން މި ޓީމުން ހާސިލްކުރީ ވަރަށް ހިތްގައިމު ގޮތަކަށް،" އާޓެޓާ ބުންޏެވެ.
"އަހަރަމެން ގަބޫލްކުރަނީ ބޮޑެތި ޓީމުތަކާ ކުޅޭއިރުވެސް މި ފަދަ ނަތީޖާތައް ނެރެވޭނެކަން."
މި ގުރޫޕްގައި ރޭ އަމިއްލަ ދަނޑުގައި ޕީއެސްވީ އަތުން 3-2 އިން ބަލިވުމުން، ސެވިއްޔާ ވަނީ މުބާރާތުން ކަޓައިފަ އެވެ. މި މެޗުގެ ފުރަތަމަ ހާފުގައި ސާޖިއޯ ރާމޮސް އާއި ޔޫސެފް އެން ނެސީރީ ޖެހި ލަނޑުތަކުން ސެވިއްޔާ އިން ދެ ލަނޑުގެ ލީޑެއް ނެގި އެވެ. އެކަމަކު، ޕީއެސްވީ ވަނީ ދެ ވަނަ ހާފުގައި ތިން ލަނޑު ޖަހައި އެ ޓީމު ކޮޅަށް ނަތީޖާ އަނބުރާލައިފަ އެވެ.
އާސެނަލް ގުރޫޕްގެ އެއް ވަނަ ހޯދީ 12 ޕޮއިންޓާއެކު އެވެ. ޕީއެސްވީ އަށް ޕޮއިންޓާ އެކު ދެ ވަނައިގައި އޮތްއިރު، ފަސް ޕޮއިންޓާ އެކު ތިން ވަނައިގައި އޮތީ ލޯންސް އެވެ. ސެވިއްޔާ ތާވަލްގެ ފުލުގައި އޮތީ ދެ ޕޮއިންޓާ އެކު އެވެ.
