މި ސަރުކާރު ގެނައުމަށް ވަރަށް ބުރަކޮށް މަސައްކަތް ކުރައްވާފައި ވާނެ ކަމަށާއި ނާއިންސާފުގެ ކުރިމަތީގައި އިސް ނުޖައްސަވާނެ ކަމަށް ވިދާޅުވެ ނައިބުރައީސް، ހުސެއިން މުހައްމަދު ލަތީފަށް، ކުރީގެ ނައިބުރައީސް ޑރ.މުހައްމަދު ޖަމީލު އަހުމަދު ރައްދު ދެއްވައިފި އެވެ.
ރާއްޖޭގެ އޮންލައިން ނޫހަކަށް ދެއްވި އިންޓަވިއުއެއްގައި ހުސެއިން ދެއްކެވި ވާހަކަތަކަށް ރައްދު ދެއްވައި އެކްސްގައި ޖަމީލު ކުރެއްވި ޕޯސްޓެއްގައި ވިދާޅުވީ ކޮންމެ ފަދަ ހާލަތެއް ކުރިމަތިވި ނަމަވެސް ހަގީގަތް ކަމަށް ގަބޫލު ކުރައްވާ މަގުން އެއްކިބާ ނުވާނެ ކަމަށެވެ.
"ކޮބައިތޯ އަޅުގަނޑުގެ ކުށަކީ؟ އެއީ ވަރުބަލިކަމެއް ނެތި ޝަރީއަތުގެ މަޖިލީހުގައި ރައީސް ޔާމީން ދިފާއު ކުރުމާއި ހުރިހާ އެންމެން އެމަނިކުފާނު ދޫކޮށްލި ވަގުތު ސާބިތުވެ އެމަނިކުފާނާ އެކު ހުރުންތޯ؟" ނައިބު ރައީސް އާ ސުވާލު ކުރައްވައި ޖަމީލުގެ ޕޯސްޓުގައި ލިޔުއްވާފައިވެ އެވެ.
ޖަމީލް ވިދާޅުވީ ނައިބު ރައީސްގެ މަގާމުގައި ހުންނަވައި އާންމުންގެ މީހަކަށް އެއްވެސް ކަމަކާނުލައި ބަހުގެ ހަމަލާތަކެއް ދިނުމަކީ ވަރަށް ދަށުދަރަޖައިގެ އަމަލެއް ކަމަށެވެ.
ހުސެއިންއަށް ޑރ. ޖަމީލް ރައްދުދެއްވާފައި މިވަނީ ޖަމީލުއަކީ ރައީސް ޔާމީންއަށް އިހުލާސްތެރި ބޭފުޅެއް ނޫންކަމަށާއި އެކަމުގެ ހެކި އެބަހުރި ކަމަށް ނައިބު ރައީސް ހުސެއިން ވިދާޅުވެފައި ވަނިކޮށެވެ.
ހުސެއިން ވިދާޅުވެފައި ވަނީ ޑރ. ޖަމީލު ވަނީ ޕީއެންސީ/ޕީޕީއެމްގެ ލީޑަރުޝިޕަށް ވަރަށް ބޮޑެތި ދޮގުތައް ހަދާފައި ކަމަށާއި އެކަމުގެ ހެކި އެބަހުރި ކަމަށެވެ.
އެ ތުހުމަތުތަކަށް ރައްދު ދެއްވައި ޖަމީލު ވިދާޅުވީ ހުސެއިންގެ އެ ވާހަކަތައް އަޑުއިވުމުން ހުރެވުނީ ހުނުމާއި ރުއިމާ ދެމެދުގައި ކަމަށެވެ.
"އިންތިހާބީ މަގާމެއްގައި ހުންނަވާއިރު، ހުރަސް ކޮށްގެން ނުވާނެ އިންތައް ހުންނާނެ، ތިޔައީ ބާރާއި ނަޒާހަތްތެރިކަމާއެކު އަޅުގަނޑު ވެސް ހިމެނޭހެން ރާއްޖޭގެ ހުރިހާ ރައްޔިތުން ތަމްސީލު ކުރަންޖެހޭ ފަރާތް،" ޖަމީލު ވިދާޅުވެފައިވެ އެވެ.
ޑރ. ޖަމީލުއާއި ހުސެއިންއާ ދެމެދު ބަހުގެ ހަމަލާތަކެއް ބަދަލު ކޮށްފައި މިވަނީ ޕީއެންސީ/ޕީޕީއެމް ކޯލިޝަނުގެ ލީޑަޝިޕާއި ރައީސް ޔާމީންއާ ދެމެދު އުފެދުނު ހިޔާލުތަފާތުވުންތަކަށް ފަހު ޕީޕީއެމުން ވަކިވެވަޑައިގެން އައު ސިޔާސީ ޕާޓީއެއް އުފެއްދުމުގެ މަސައްކަތް ފަށާފައިވަނިކޮށެވެ.
ރައީސް ޔާމީން އިސްވެ ހުންނަވައި އައު ސިޔާސީ ޕާޓީއެއް އުފެއްދުމުގެ މަސައްކަތް ފެށްޓެވީ މިހާރުގެ ސަރުކާރުން ރައީސް ޔާމީނާ އެއްކޮށް ގުޅުން ކަނޑާލައި ބާކީ ކޮށްލުމުންނެވެ. ނަމަވެސް އެ ތުހުމަތުތައް ޕީޕީއެމް/ޕީއެންސީގެ ލީޑަޝިޕުން ވަނީ ދޮގުކޮށްފަ އެވެ.
