ވަރިވާން ކޯޓަށް ދިޔަ އަންހެނަކަށް ގުޅައި ކޯޓުން ބޭރުން މުއާމަލާތްތަކެއް ހިންގި ކަމުގެ ތުހުމަތަށް ވަކިކުރުމަށް ފޮނުވާފައިވާ، ހދ. ކުޅުދުއްފުށި ސިޓީ މެޖިސްޓްރޭޓް ކޯޓުގެ މެޖިސްޓްރޭޓް އަލީ އާދަމަށް ދިން ނޯޓިސް ހަމަވި ނަމަވެސް މިއަދު ރައްޔިތުންގެ މަޖިލީހަށް ހާޒިރުނުވުމުން އޭނާއާ ސުވާލުނުކޮށް ކޮމިޓީ ނިންމައިލަން ޖެހިއްޖެ އެވެ.
އަލީ އާދަމް މަގާމުން ވަކިކުރަން ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމީ ކުޅުދުއްފުށީ މެޖިސްޓްރޭޓު ކޯޓަށް ވަރިވާން ދިޔަ އަންހެނަކަށް ގުޅައި އޭނާއަށް ޒާތީ އެތައް މެސެޖުތަކެއް ކޮށްފައިވާ ކަމަށް ތަހުގީގުގައި މެޖިސްޓްރޭޓު އަމިއްލައަށް އިއުތުރާފުވެފައި ވާތީ އެވެ.
ކޮމިޓީން ނިންމީ މެޖިސްޓްރޭޓް މަޖިލީހަށް ހާޒިރުވެވަޑައިގެން ޖަވާބުދާރީ ވެވަޑައިގަންނަވަން އެދިވަޑައިގަންނަވާ އެ ފުރުސަތު ދިނުމަށެވެ. މިއީ ޖޭއެސްސީން ފަނޑިޔާރަކު ވަކިކުރަން ފޮނުވުމުން، ކޮމިޓީއަށް ހާޒިރުވެ ޖަވާބުދާރީވާން ފުރުސަތެއް ދިން ފުރަތަމަ ފަހަރެވެ.
މިއަދުގެ ކޮމިޓީ ބައްދަލުވުން ފައްޓަވަމުން މުގައްރިރު، މަރަދޫ ދާއިރާގެ އެމްޑީޕީ އިބްރާހިމް ޝަރީފް ވިދާޅުވީ ކޮމިޓީން ފުރަތަމަ ފޮނުވީ ތިން ދުވަހުގެ ނޯޓިސްއެއް ކަމަށެވެ. މިއަދަށް ހާޒިރު ކުރުމަށް ތާވަލުކުރީ މެޖިސްޓްރޭޓް އެ ގޮތަށް ބޭނުންވާ ކަން މަޖިލީހުގެ ކޮމިޓީއަށް ދެންނެވުމުން ކަމަށް ޝަރީފް ވިދާޅުވި އެވެ.
"އަޅުގަނޑުމެން އެދުނީ ތިން ދުވަހުގެ ތެރޭގައި ހާޒިރު ވުމަށް، ނަމަވެސް ވިދާޅުވީ މައްސަލަ ދިރާސާކޮށް ތިމަންނަ ތައްޔާރުވެގެން ވަކީލަކާއެކު ހާޒިރުވެވޭނީ 27 ނޮވެމްބަރުގައި ކަމަށް،" މަޖިލީހުގެ އައްޑޫ މަރަދޫ ދާއިރާ ތަމްސީލްކުރައްވާ މެންބަރު ޝަރީފް ވިދާޅުވި އެވެ.
މިއަދު ވެސް މެޖިސްޓްރޭޓް އިތުރު ސިޓީއެއް ކޮމިޓީއެއް ފޮނުއްވި އެވެ. އޭގައި ވެސް އެދުނީ އަނެއްކާ ވެސް އިތުރު ފުރުސަތެއް އޭނާއަށް އެރުވުމަށެވެ. މެޖިސްޓްރޭޓްގެ ސިޓީއާ ހަވާލާދެއްވައި، މިއަދާ ހަމައަށް ވެސް މައްސަލަ ދިރާސާކޮށް ނިމި ޖަވާބުދާރީވާން ތައްޔާރު ނުވެވުނު ކަމަށް، ކޮމިޓީގެ މުގައްރިރު ވިދާޅުވި އެވެ.
އެއަށް ފަހު ކޮމިޓީގެ މެންބަރުން މަޝްވަރާ ކުރެއްވުމަށް ފަހު ނިންމެވީ ފަހު ފުރުސަތުގެ ގޮތުގައި އަދި އެއް ފުރުސަތު މެޖިސްޓްރޭޓަށް ދެއްވުމަށެވެ.
އަންހެނަކަށް މެސެޖު ކުރި މައްސަލައަކާ ގުޅިގެން މިދިޔަ މޭ މަހުގެ 23 ވަނަ ދުވަހުން ފެށިގެން އަލީ އާދަމް ހުންނެވީ ސަސްޕެންޝަނުގަ އެވެ.
ކުރިން އޭނާ ހުންނެވީ ހދ. ޖުޑީޝަލް ދާއިރާގެ އިސް މެޖިސްޓްރޭޓްގެ މަގާމުގަ އެވެ. އޭނާގެ ދަރަޖަށް ދަށްކޮށް، ކުޅުދުއްފުށީ ކޯޓުގެ "އާންމު" މެޖިސްޓްރޭޓަކަށް ބަދަލުކުރީ، ޖޭއެސްސީއަށް ހުށަހެޅިފައިވާ އިތުރު މައްސަލައެއް ބެލުމަށް ފަހު އެވެ. ކޮމިޝަނުން ބުނާ ގޮތުގައި، އެއީ ފަނޑިޔާރު ފަރުވާ ކުޑަކުރި ކަމަށް ބުނެ، ކޮމިޝަނުން ބެލި މައްސަލައެއްގައި އެޅި ފިޔަވަޅެކެވެ.
