ރައީސް އަބްދުﷲ ޔާމީން އަބްދުލްގައްޔޫމް އިސްކޮށް ހުންނަވައި އަލަށް އުފައްދަން މަސައްކަތް ކުރައްވާ ޕާޓީއަށް އެންމެ ފުރަތަމަ ބޭފުޅެއްގެ ގޮތުގައި އެމަނިކުފާނު މިރޭ ސޮއި ކުރައްވައިފި އެވެ.
އެ ޕާޓީ އުފެއްދުމުގައި އިސްކޮށް އުޅުއްވާ މުހައްމަ މަލީހު ޖަމާލު "އަދަދު" އަށް ވިދާޅުވީ ރައީސް ޔާމީންގެ އިތުރުން ވެސް ވަރަށް ގިނަ ފަރާތްތަކުން ސޮއި ކުރުމުގެ މަސައްކަތް އަދިވެސް ކުރިއަށްދާ ކަމަށެވެ.
"އާދެ، އާދެ، މިއީ ރައީސް ޔާމީންގެ ޕާޓީ، ރައީސް ޔާމީންއަކީ މި ޕާޓީގެ ފައުންޑަރު، އެންމެ ފުރަތަމަ ޕާޓީއަށް ސޮއި ކުރެއްވީ ރައީސް ޔާމީން،" މަލީހު ވިދާޅުވި އެވެ.
titledesc
އައު ސިޔާސީ ޕާޓީއަށް ރައީސް ޔާމީން ސޮއި ކުރެއްވިއިރު، އެމަނިކުފާނު ހުންނެވީ ކޮރަޕްޝަންގެ ކުށެއް ސާބިތުވެ 11 އަހަރުގެ ޖަލު ހުކުމެއްގަ އެވެ. ދިވެހިރާއްޖޭގެ ޖަލުތަކާއި ޕެރޯލްގެ ގާނޫނުގެ 62 ވަނަ މާއްދާގެ ދަށުން ސިޔާސީ ޕާޓީއާއި ޖަމްއިއްޔާތަކަށް އާންމު މެންބަރެއްގެ ހައިސިއްޔަތުން ނިސްބަތްވެވޭނެ އެވެ. އެ ގާނޫނުގެ ދަށުން ގައިދީއަކަށް މަނާވަނީ އެއިން ތަނެއްގެ މަސްއޫލު ފަރާތެއްގެ ގޮތުގައި ހުރުމާއި އެ ތަންތަނުން ހިންގާ އެހެން ހަރަކާތްތަކުގައި ބައިވެރިވުމެވެ.
ޕީޕަލްސް ނެޝަނަލް ފްރަންޓުގެ ނަމުގައި ރައީސް ޔާމީން އިސްކޮށް ހުންނަވައި އުފެއްދުމަށް މަސައްކަތް ކުރަމުންދާ ސިޔާސީ ޕާޓީއަށް ޕީޕީއެމްގެ މެންބަރުންގެ ގޮތުގައި ކުރިން ތިބި ގިނަ އަދަދެއްގެ ބަޔަކު އަންނަނީ މިރޭ 9:00 އިން ފެށިގެން ސޮއި ކުރަމުންނެވެ
ޕީޕަލްސް ނެޝަނަލް ފްރޮންޓަށް މިރޭ މީހުން ސޮއިކުރަނީ. -- ފޮޓޯ: މުހައްމަދު ޖަމީލް
ރައީސް ޔާމީން އިސްކޮށް ހުންނަވައި އައު ސިޔާސީ ޕާޓީއެއް އުފެއްދުމުގެ މަސައްކަތް ފެށްޓެވީ ޕީޕީއެމް/ޕީއެންސީގެ ލީޑަރުޝިޕާ ދެމެދު އުފެދުނު ހިޔާލުތަފާތުވުންތަކެއްގެ ސަބަބުންނެވެ. އެ ޕާޓީގެ މުއައްސިސެއްގެ ގޮތުގައި ހަމަޖައްސާފައި ވަނީ ރައީސް ޔާމީންގެ ދޮށީ ދަރިކަލުން، ޒޭން އަބްދުﷲ ޔާމީން އެވެ.
އޭގެއިތުރުން ދެން އެ ޕާޓީގެ މުއައްސިސުންގެ ގޮތުގައި ތިއްބަވާނީ ރައީސް ޔާމީނާއި, އެމަނިކުފާނުގެ ވެރިކަމުގައި ނައިބު ރައީސަކަށް ހުންނެވި ޑރ. މުހައްމަދު ޖަމީލު އަހުމަދާއި ކުރީގެ ސީޕީ ހުސައިން ވަހީދާއި މުލިއާގޭގެ ޗީފް އޮފް ސްޓާފް އަހުމަދު މުސްތަފާގެ އިތުރުން އަދްލީ އިސްމާއީލް އާއި ޑރ. ޖިހާދު ހަސަން އަދި ކަކާގޭ އަލީ އާދަމް ކަމަށް މިއަދު ހެނދުނު މަލީހު ވިދާޅުވި އެވެ.
އެ ޕާޓީ އުފެއްދުމަށް މިއަދު ހެނދުނު ވަނީ އީސީގެ ހުއްދަށް އެދިފަ އެވެ. އާ ސިޔާސީ ޕާޓީގެ ނަމާއި ލޯގޯ އާންމުކުރީ ރޭގެ ވަގުތެއްގައި ސޯޝަލް މީޑިއާ މެދުވެރިކޮށެވެ.
ޕީޕީއެމުން ވަކިވެ، އާ ޕާޓީއެއް ހެއްދެވުމަށް ރައީސް ޔާމީން ނިންމެވީ ޕާޓީގެ ލީޑާޝިޕުން އެމަނިކުފާނު އެއްފަރާތް ކޮށްފައިވާ ކަމަށް ބުނެ އެވެ. ޔާމީންގެ ފަރާތުން ރައީސް މުއިއްޒަށް ގިނަ ތުހުމަތުތަކެއް ކޮށްފައިވާއިރު އޭގެ ތެރޭގައި، އެމަނިކުފާނުގެ ފޯނު ކޯލަށް ރައީސް ޖަވާބު ނުދެއްވުމާއި ޖަލު ހުކުމުން މިނިވަން ނުކުރުން ހިމެނެ އެވެ.
