ކުރީގެ ރައީސް އަބްދުﷲ ޔާމީން އަބްދުލް ގައްޔޫމު ޕީޕީއެމުން ވަކިވެވަޑައިގެން، އަލަށް އުފައްދަވާ ޕާޓީ ވާނީ ރާއްޖޭގައި ދެން ވެރިކަން ކުރާ ޕާޓީއަށް ކަމަށް، އެމަނިކުފާނުގެ އިސް ވަކީލު އަދި ކުރީގެ ނައިބުރައީސް ޑރ. މުހައްމަދު ޖަމީލު އަހުމަދު މިއަދު ވިދާޅުވެއްޖެ އެވެ.
ޕީޕަލްސް ނެޝަނަލް ފްރޮންޓް (ޕީއެންއެފް) އުފެއްދުމުގެ ހުއްދައަށް އެދި އިލެކްޝަންސް ކޮމިޝަނަށް ހުށަހެޅުމަށް ފަހު އެ ކޮމިޝަނުގެ ބޭރުގައި ހުންނަވައި ނޫސްވެރިންގެ ސުވާލުތަކަށް ޖަވާބު ދެއްވަމުން ޖަމީލު ވިދާޅުވީ އެ ޕާޓީ ވާނީ ރާއްޖޭގެ ސިޔާސީ މައިދާނުގައި އުފެދޭ އެންމެ ބިޔަ ޕާޓީއަށް ކަމަށެވެ.
އެމްއެމްޕީއާރްސީގެ ހިޔާނާތުގެ މައްސަލާގައި ހިމެނޭ ދައުވާއެއް ސާބިތުވެ، 11 ޖަލު ހުކުމެއް ޔާމީނަށް އިއްވާފައި ވާއިރު، އެމަނިކުފާނު މިހާރު ހުންނެވީ ރަށުބަންދުގަ އެވެ. ޕީޕީއެމުން އެމަނިކުފާނު ވަކިވެވަޑައިގެންނެވި ކަން ޖަމީލު އިއުލާނުކުރެއްވީ މިދިޔަ ބުރާސްފަތި ދުވަހެވެ. އެއީ ޕީއެެންސީ/ޕީޕީއެމްގެ ލީޑަޝިޕާ ޔާމީނާ ދެމެދު ގުޅުން ގޯސްވެފައި ވުމާއި ޕީޕީއެމް ހުއްޓުވާފައި ބޭއްވުމެވެ.
އޭގެ ފަހުން ޔާމީނުގެ އަރިސް ބޭފުޅުންނާއި ޕީއެންސީ/ޕީއެމްގެ އިސް ބޭފުޅުން ގެންދަވަނީ ބަހުގެ ހަމަލާތައް ބަދަލު ކުރައްވަމުންނެވެ. އީސީގެ ބޭރުގައި ބޭއްވި ނޫސްވެރިންގެ ބައްދަލުވުމުގައި އެކަމާ ބެހޭ ގޮތުން ސުވާލުކުރުމުން ޖަމީލު ވިދާޅުވީ ޒާތީ ވާހަކަތަކުގެ ތެރެއަށް ފީނުމުގެ ވިސްނުމެއް ނެތް ކަމަށެވެ.
"އަޅުގަނޑުމެންގެ ގާއިދަަކީ، އަޅުގަނޑުމެންގެ ސިޔާސީ މުފައްކިރަކީ، އަޅުގަނޑުމެންގެ ސިޔާސީ ބައްޕައަކީ ރައީސް ޔާމީން. އެމަނިކުފާނު އަޅުގަނޑުމެންނަށް ދެއްވާފައި ހުރި ހުލްގަކީ، އަހުލާގަކީ ތިކަހަލަ ކަންތައްތަކުގެ ތެރެއަށް ނުފީނާ މިގައުމުގައި ހުރި މައްސަލަތައް ހައްލުކުރުމަށް ޓަކައި ކުރިއަށް ވަޑައިގަތުން،" ޖަމީލު ވިދާޅުވި އެވެ.
އޭނާ ވިދާޅުވި ގޮތުގައި އާ ޕާޓީއެއް އުފެއްދުމުގެ ބޭނުމަކީ ރާއްޖޭގައި ހުރި މައްސަލަތައް ހައްލުކުރަން މަސައްކަތް ކުރުމެވެ. އާޕާޓީ ވެގެންދާނީ އޭނާ ވިދާޅުވި ގޮތުގައި ރާއްޖޭގެ އެންމެ ވަރުގަދަ ޕާޓީއަށެވެ.
"އަޅުގަނޑުމެންގެ މި ޕާޓީއަކީ ދެން ދިވެހިރާއްޖޭގައި ވެރިކަންކުރާނެ ޕާޓީ މާތް ﷲގެ ތަނަވަސް ރަހުމަތާ އެކީ،" ޖަމީލު ވިދާޅުވި އެވެ.
އެއީ ރާއްޖޭގެ ސިޔާސީ މަޝްރަހު ބަދަލުކޮށްލާނެ ޕާޓީއެއް ކަމަށް ވެސް އޭނާ ސިފަކުރެއްވި އެވެ.
ޔާމީނުގެ ކުރީގެ ޕާޓީ، ޕީޕީއެމް އާއި ހަމަ އެމަނިކުފާނުގެ ލީޑަޝިޕްގެ ދަށުން އުފެއްދި ޕީއެންސީގެ އިސް ބޭފުޅުން ޔާމީނާ ބައްދަލުނުކުރައްވާތީ ކުރައްވާ ސުވާލުތައް ޖަމީލު މިއަދު ވެސް ތަކުރާރުކުރެއްވި އެވެ.
