ވަރިވާން ކޯޓަށް ދިޔަ އަންހެނަކަށް ގުޅައި ކޯޓުން ބޭރުން މުއާމަލާތްތަކެއް ހިންގި މައްސަލަތަކެއްގައި ވަކިކުރުމަށް ފޮނުވާފައިވާ ހދ. ޖުޑީޝަލް ދާއިރާގެ އިސް މެޖިސްޓްރޭޓު އަލީ އާދަމް ޖަވާބުދާރީވުމުގެ ފުރުސަތެއް ދިނުމަށް، އެ މައްސަލަ ދިރާސާކުރާ މަޖިލީހުގެ ޖުޑިޝަރީ ކޮމިޓީން މިއަދު ނިންމައިފި އެވެ.
އަލީ އާދަމް މަގާމުން ވަކިކުރަން ނިންމީ ކުޅުދުއްފުށީ މެޖިސްޓްރޭޓު ކޯޓަށް ވަރިވާން ދިޔަ އަންހެނަކަށް ގުޅައި އޭނާއަށް ޒާތީ އެތައް މެސެޖުތަކެއް ކޮށްފައިވާ ކަމަށް ތަހުގީގުގައި މެޖިސްޓްރޭޓު އަމިއްލައަށް އިއުތުރާފުވެފައި ވާތީ އެވެ.
އެ މައްސަލާގައި އޭނާ ވަކިކުރަން ފޮނުވުމުން މީގެ ކުރިން ވެސް ކޮމިޓީން ބައްދަލުވެ މަޝްވަރާކޮށްފައިވެ އެވެ. މެންބަރުންގެ ހިޔާލުތަފާތުވުންތަކެއް ހުރުމުންނާއި ގާނޫނީ ގޮތުން ސާފުކުރަން ޖެހޭ ކަންކަން ހުރުމުން ގޮތެއް ނުނިމި ވަނިކޮށް އެހެން މައްސަލައެއްގައި ފަނޑިޔާރު ވަކިކުރުމަށް ކޮމިޝަނުން ފޮނުވާފައިވެ އެވެ.
ޖުޑީޝަރީ ކޮމިޓީން މިއަދު ބައްދަލުވީ އެހެންވެ އެވެ. އެ ކޮމިޓީގައި އަނެއްކާ ވެސް ކެންދޫ ދާއިރާގެ މެންބަރު އަލީ ހުސައިން ހުށަހަޅުއްވަނީ ފަނޑިޔާރަށް ޖަވާބުދާރީ ވުމުގެ ފުރުސަތެއް ދެއްވުމަށެވެ.
"އަޅުގަނޑުމެންނަކަށް ޔަގީން ކަމެއް ނޯންނާނެ، ޖޭއެސްސީން ހަމަ ކޮންމެ ފަދަ ތުހުމަތެއް ކޮށްފައި ފޮނުވަފާނެ، ފަނޑިޔާރަށް ޖަވާބުދާރީ ވުމުގެ ފުރުސަތު ދެވެން ވާނެ،" އަލީ ހުސައިން ވިދާޅުވި އެވެ.
ނަމަވެސް, ފަނޑިޔާރުން ހާޒިރުކުރަން އެންގުމުގެ ބާރެއް، ކޮމިޓީގެ މެންޑޭޓުގައި ހިމެނިފައެއް ނުވެ އެވެ. ހިޔާލު ތަފާތުވުން އުފެދިގެން އުޅުނީ އެ ކަމުގަ އެވެ.
ކޮމިޓީގެ މުގައްރިރު އަދި އައްޑޫ މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ) ވިދާޅުވީ، ފަނޑިޔާރު ހާޒިރުކޮށް ސުވާލު ކުރުމާއި މައްސަލައިގެ ކަން ހިނގައިދިޔަ ގޮތާ ގުޅިގެން ސުވާލުކޮށް ތަހުގީގު ހިންގުން ވާނީ ޖުޑިޝަލް ސާވިސް ކޮމިޝަން، ޖޭއެސްސީގެ މެންޑޭޓު ތެރެއަށް ވަނުން ކަމަށެވެ.
ގަޑިއިރެއް ވަން ދެން މެންބަރުން ނުރަސްމީކޮށް މަޝްވަރާ ކުރެއްވުމަށް ފަހު ނިންމެވީ ފަނޑިޔާރު ބޭނުންފުޅުވާނަމަ ހާޒިރުވުމުގެ ފުރުސަތު ދޭ ގޮތަށެވެ. އަދި އެ ފުރުސަތު ބޭނުންފުޅު ކުރައްވަން ތިން ދުވަހުގެ މުއްދަތެއް ދިނުމަށެވެ. ނަމަވެސް ހާޒިރުކޮށް ސުވާލުކުރަން ވާނީ އިޖުރާއަތްތަކާ ގުޅޭ ގޮތުން އެކަނި ކަމަށެވެ.
މިއީ މި ގޮތަށް ފަނޑިޔާރަކަށް ކޮމިޓީން ފުރުސަތެއް ދެއްވާ ފުރަތަމަ ފަހަރެވެ.
މީގެ ކުރިން ހައި ކޯޓުން އޭރު ތިއްބެވި ދެ ފަނޑިޔާރަކު ވަކިކުރަން ކޮމިޝަނުން ފޮނުވުމުން، އެ ފަނޑިޔާރުން ވަނީ ކޮމިޝަނުން އަމަލު ކުރި ގޮތާ މެދު ހިތްހަމަނުޖެހުން ފާޅުކޮށް ކޮމިޓީއަށް ސިޓީއެއް ފޮނުވައިފަ އެވެ.
މިހާރު ބަލަމުންދާ މެޖިސްޓްރޭޓްގެ މައްސަލާގައި ފަނޑިޔާރު އިސްވެ ކޮމިޓީއަށް ސިޓީއެއް ފޮނުވައިފައެއް ނުވެ އެވެ.
އަންހެނަކަށް މެސެޖު ކުރި މައްސަލައަކާ ގުޅިގެން މިދިޔަ މޭ މަހުގެ 23 ވަނަ ދުވަހުން ފެށިގެން އަލީ އާދަމް ހުންނެވީ ސަސްޕެންޝަނުގަ އެވެ.
ވަކިކުރަން ރައްޔިތުންގެ މަޖިލީހަށް ފޮނުވި ފަހުން ފަނޑިޔާރު ފަރުވާ ކުޑަކުރި ކަމުގެ ޝަކުވާއެއް ކޮމިޝަނުން ބެލުމަށް ފަހު ވަނީ ދަރަޖަ ދަށްކުރުމަށް ނިންމައިފަ އެވެ. ކޮމިޝަނުން ބުނީ، މިއަދުން ފެށިގެން އަލީ އާދަމަކީ ކުޅުދުއްފުށީ މެޖިސްޓްރޭޓް ކޯޓުގެ "އާންމު" މެޖިސްޓްރޭޓެއް ކަމަށެވެ.
