ރައްޔިތުންގެ މަޖިލީހަކީ ކޮންމެ ދުވަހަކު "ސިޔާސީ ކަންތައްތަކެއް" ހިންގާ ތަނެއް ނޫން ކަމަށާއި މަޖިލީހުގެ ހައިބަތާއި ކަރާމާތް ހިފަހައްްޓަން މެމްބަރުންގެ ސުލޫކީ ގަވައިދެއް ހަދަން މަސައްކަތްކުރައްވާނެ ކަމަށް މަޖިލީހުގެ އާ ރައީސް މުހައްމަދު އަސްލަމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ރިޔާސަތުން އަންގާ އެންގުމެއްގެ ގޮތުގައި އަސްލަމް ވިދާޅުވީ މަޖިލީހުގައި ސިޔާސީ ޕާޓީތައް ތަމްސީލުކުރާތީ، މަޖިލީހަކީ ކޮންމެ ދުވަހަކު ސިޔާސީ ކަންތައްތަކެއް ހިންގާ ތަނެއް ކަމަށް ބައެއް މެމްބަރުން ދެކެވަޑައިގަންނަވާ ކަމަށެވެ. އެހެން ނަމަވެސް އެކަން އޮތީ އެހެނެއް ނޫން ކަމަށް އޭނާ ވިދާޅުވި އެވެ.
"ގާނޫނު ހެދުމުގައްޔާއި ސަރުކާރު ޖަވާބުދާރީ ކުރުމުގެ މުހިއްމު މަސައްކަތްތަކެއް ކުރިއަށް ދާއިރު މަޖިލީހުގެ ހައިބަތާއި ގަދަރު ހިފެހެއްޓުމަކީ މަޖިލީހުގެ ރައީސެކޭ އެއްފަދައިން އިއްޒަތްތެރި މެމްބަރުންގެ ވެސް މަސްއޫލިއްޔަތެއް. އެހެން ކަމުން މަޖިލީހުގެ ނިޒާމު ނުގެއްލި މަޖިލީހުގެ މަސައްކަތްތައް ކުރިއަށް ގެންދެވޭނެ ގޮތަށް އިންތިޒާމުކުރުމަކީ މުހިއްމު ކަމެއް ކަމަށް ފެންނާތީ ބައެއް ފިޔަވަޅުތައް އަޅަން ގަސްދުކުރަން،" އަސްލަމް ވިދާޅުވި އެވެ.
އެގޮތުން އަޅުއްވަން ގަސްދުކުރާ އެއް ފިޔަވަޅަކީ މަޖިލީހުގެ ސުލޫކީ ގަވައިދެއް ކަމަށާއި އެ ގަވައިދު އެކުލަވައިލާ ތަޅުމުން ފާސްކުރަން މަސައްކަތް ކުރައްވާނެ ކަމަށް އޭނާ ވިދާޅުވި އެވެ. އެމަނިކުފާނު ވިދާޅުވި ގޮތުގައި އެއީ ކުރީގެ މަޖިލިސްތަކުގައި ވެސް އަމަލުކޮށްފައި އޮތް ގޮތެކެވެ.
ދެވަނަ ފިޔަވަޅަކީ އޭނާ ވިދާޅުވި ގޮތުގައި މަޖިލީހަށް ހާޒިރުކުރާ ވަޒީރުންނާއި މަޖިލީހުގެ އެހެނިހެން ބޭފުޅުންނަށް ސަލާމަތާއި ރައްކާތެރިކަން ދިނުމެވެ. މަޖިލީހުގެ އިދާރީ ބޭފުޅުން އެ އިންތިޒާމު ހަމަޖައްސަވަން އަސްލަމް އަމުރު ކުރެއްވި އެވެ.
މިގޮތަށް އަމުރު ކުރެއްވީ ބެލެވޭ ގޮތުގައި ބަޖެޓު ހުށަހެއްވުމަށްޓަކައި ފިނޭންސް މިނިސްޓަރު އިބްރާހިމް އަމީރު އިއްޔެ މަޖިލީހުގެ ޖަލްސާއަށް ވަޑައިގަތުމުން، އެ މަނިކުފާނަށް ހުރަސް އަޅުއްވައި، ވަޒީރު ވާހަކަ ދައްކަވަން މޭޒުގައި ހުރި މައިކްގައި މެމްބަރަކު ޖެހުމުންނެވެ.
މަޖިލީހުގެ އެތެރޭގައި ސަލާމަތީ ކަންތައްތައް ބެލެހެއްޓުމުގެ ވެރިޔަކީ ސާޖަންޓް އެޓް އާމްސް އެވެ. މަޖިލީހުގެ އެ މަގާމު މިވަގުތު އޮތީ ހުސްކޮށެވެ.
