ރައީސް ސޯލިހުގެ ސަރުކާރުގެ އެންމެ ބޮޑު އެއް ކާމިޔާބީއަކީ އަނިޔާވެރިކަމާ ނުލައި ރައްޔިތުންނަށް މިނިވަންކަން ދީގެން ހެޔޮ ވެރިކަމެއް ކޮށް، ތަރައްގީވެސް ގެނައުން ކަމަށް އިކޮނޮމިކް މިނިސްޓަރު، ފައްޔާޒު އިސްމާއިލް މިއަދު ވިދާޅުވެއްޖެ އެވެ.
މި ދައުރުގެ އެންމެ ފަހު ވަޒީރުންގެ ބައްދަލުވުން ނިންމަވައިލެއްވުމަށްފަހު "އަދަދު" އަށް ދެއްވި ހާއްސަ އިންޓަވިއުއެއްގައި ފައްޔާޒް ވިދާޅުވީ ތަރައްގީ ގެނެވޭނީ ޚުދުމުހުތާރު ވެރިއަކަށް ކަމަށް ބުނާތީ ވަރަށް ގިނައިން އަޑު އިވޭ ކަމަށެވެ. ނަމަވެސް އެއީ ހަގީގަތެއް ނޫންކަން މިދިޔަ ފަސް އަހަރު ތެރޭގައި މި ސަރުކާރުން ސާބިތު ކޮށްދީފައިވާ ކަމަށް އޭނާ ވިދާޅުވި އެވެ.
"ވަރަށް ގިނަ ފަހަރަށް އަޑުއިވޭނެ ތަރައްގީ ގެނެވޭނީ ޚުދުމުހުތާރު ވެރިއަކަށޭ، މިހާރު އަޅުގަނޑުމެންނަށް ސާފުކޮށްދެވިފައި އޮތީ ޑިމޮކުރެސީއާ މިނިވަންކަމާ އެއްކޮށް ވެސް ތަރައްގީ ގެނެވޭނެކަން،" ފައްޔާޒް ވިދާޅުވި އެވެ.
ފާއިތުވި ފަސް އަހަރު ދުވަހުގެ ތެރޭގައި ވަރަށް ބޮޑެތި ގޮންޖެހުންތަކާ އެކު ވެސް ރާއްޖޭގެ ހުރިހާ ދާއިރާތައަކަށް ކާމިޔާބީތަކެއް ހޯދިއްޖެ ކަމަށް ފައްޔާޒް ވިދާޅުވި އެވެ.
ވެރިކަމާ ހަވާލުވި އިރު، ގައުމު އޮތީ ވަރަށް ދަށް ހާލަތެއްގައި ކަން ފާހަގަ ކުރައްވައި ފައްޔާޒް ވިދާޅުވީ އުމްރާނީ ގޮތުންނާއި އިގުތިސާދީ ގޮތުން އަދި އަދުލު އިންސާފުގެ ދާއިރާއިންނާއި އިޖުތިމާއީ ގޮތުން ވެސް ވަރަށް ބޮޑެތި ބަދަލުތަކެއް ގެނެވިފައިވާ ކަމަށެވެ.
މިނިސްޓަރު ފައްޔާޒް އެ މޭރުމުން ވާހަކަދައްކަވާފައި ވާއިރު، ނިމިދިޔަ ރިޔާސީ އިންތިހާބުގައި ރައީސް ސޯލިހުގެ ކެމްޕޭނު ޝިއާރެއްގެ ގޮތުގައި ވެސް ބޭނުން ކުރެއްވީ އުފާވެރި އަމާން ރާއްޖެ އެވެ. އެއީ ތަފާސްހިސާބުތަކަށް ބަލާއިރު، ފާއިތުވި ފަސް އަހަރަކީ ސިޔާސީ ގޮތުންނާއި އިޖުތިމާއީ ގޮތުން ވެސް ރާއްޖެއަށް އެންމެ ހަމަޖެހުން ލިބުނު ފަސް އަހަރު ކަމަށް ވާތީ އެވެ.
