ރައްޔިތުންގެ މަޖިލީހުގެ ރައީސްކަމުން, ރައީސް މުހައްމަދު ނަޝީދު ވަކިވުމާ ގުޅިގެން, އެމަނިކުފާނު ކޮށްދެއްވި ހިދުމަތްތަކަށް ޖުޑީޝަލް ސާވިސް ކޮމިޝަނުން ޝުކުރު އަދާކޮށްފި އެވެ.
މަޖިލީހުގެ ރައީސްކަމުގައި އިތުރަށް ހުރެއްޖެ ނަމަ މަޖިލީހުގެ މެޖޯރިޓީ ޕާޓީން މަޖިލީހަށް ދޭ ގެއްލުން ބޮޑުވަމުން ދާނެ ކަމަށް ވިދާޅުވެ ނަޝީދު އެ މަގާމުން އިސްތިއުފާ ދެއްވީ އިއްޔެ ހަވީރުގެ ވަގުތުގަ އެވެ.
މަޖިލީހުގެ ރައީސްކަމުން ނަޝީދު އިސްތިއުފާ ދެއްވުމާއެކު, ޖޭއެސްސީގެ މެންބަރުކަން ވެސް ގެއްލުނީ އެވެ. އެމަނިކުފާނު ޖޭއެސްސީގައި އިންނެވީ, މަޖިލީހުގެ ރައީސްގެ ހައިސިއްޔަތުން ލިބިވަޑައިގެންނެވި ގޮނޑިއެއްގަ އެވެ.
ޖޭއެސްސީން މިއަދު އެކްސްގައި ކޮށްފައިވާ ޕޯސްޓެއްގައި ވަނީ އެ ކޮމިޝަނުގެ މެންބަރުކަމުގައި ނަޝީދު ކޮށްދެއްވި އަގުހުރި މިންނެތް މަސައްކަތްތަކަށް ޝުކުރު ދަންނަވާފަ އެވެ.
ނަޝީދު ޖޭއެސްސީގައި ހުންނެވީ 2019, މޭ 29 އިން ފެށިގެން 2023, ނޮވެމްބަރު 13ގެ ނިޔަލަށެވެ.
ޖޭއެސްސީގައި ތިއްބަވަނީ 10 މެމްބަރުންނެވެ. އެއީ ރައްޔިތުންގެ މަޖިލީހުގެ ރައީސާއި އެ މަޖިލީހުންގެ ކަނޑައަޅާ މެމްބަރަކާއި ރައީސުލްޖުމްހޫރިއްޔާ ކަނޑަައަޅުއްވާ މެމްބަރަކާއި ބަންޑާރަ ނައިބާއި ސުޕްރީމް ކޯޓުގެ ފަނޑިޔާރަކާއި ހައި ކޯޓުގެ ފަނޑިޔާރަކާއި ދަށު ކޯޓުތަކުން ކަނޑައަޅާ ފަނޑިޔާރަކާއި ސިވިލް ސާވިސް ކޮމިޝަނުގެ ރައީސާއި ވަކީލުންގެ ތެރެއިން މީހަކާއި އާންމުންގެ ތެރެއިން ނަގާ މީހެކެވެ.
