ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަކިކުރަން އެމްޑީޕީން މަޖިލީހަށް ހުށަހެޅި ގަރާރު މަޖިލީހުގެ ގަވާއިދަށް ފެތޭ ކަމަށް މަޖިލީހުގެ އަމީން އާއްމު ފާތުމަތު ނިއުޝާއަށް، ނަޝީދުގެ ޑިމޮކްރެޓްސް ގެ މެންބަރުން ފާޑުވިދާޅުވެއްޖެ އެވެ.
ނަޝީދު ވަކިކުރުމުގެ ގަރާރު އެޖެންޑާ ކޮށްފައިވާ ޖަލްސާގައި ނިޒާމީ ނުކުތާއެއް ނަންގަވާ، ނިއުޝާއަށް ފާޑުވިދާޅުވީ، ޑިމިކްރެޓްސްގެ ވަގުތީ ޗެއާޕާސަން އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފެވެ.
އެގޮތުން ހަސަން ލަތީފު ވިދާޅުވީ، ރިޔާސަތުގެ ނިންމުންތައް އެހެން ގޮތްތަކަށް މާނަކޮށް، ތަރުޖަމާ ކުރުމުގެ ބާރެއް އަމީން އާއްމަށް ލިބި ވަޑައިނުގަންނަވާ ކަމަށާއި، އެ ފަރާތުން ޖެހޭނީ ރިޔާސަތުން ނިންމާ ނިންމުންތަކާ އެއްގޮތަށް އަމަލުކުރައްވަން ކަމަށެވެ.
"އެހެން ނޫންނަމަ އަމީން އާއްމު އެ ކުރައްވާ ކަމަކީ ސިޔާސީ ބަހުސްގެ ތެރެއަށް ވެދެވަޑައިގަންނަވަނީ، އެއީކީ އަމީން އާއްމަށް ލިބިގެންވާ ޖާގައެއް ނޫން ގަވާއިދަކުންނެއް، އެހެންވީމަ މި މައްސަލަ އެޖެންޑާކޮށްގެން ކުރިއަށް ގެންދެވޭނެ ކަމަކަށް އަޅުގަނޑު ގަބޫލެއް ނުކުރަން، އެ މައްސަލަ ވަނީ މަޖިލީހުގެ ރިޔާސަތުން ބޭރުކޮށްފަ" ހަސަން ލަތީފު ވިދާޅުވި އެވެ.
ނަޝީދުގެ އިތުބާރު ނެތްކަމުގެ މައްސަލަ އިއްޔެ އޮތް ދެ ޖަލްސާއަށް ވެސް އެޖެންޑާ ކުރި އެވެ. ފުރަތަމަ ބޭއްވި ޖަލްސާގެ ރިޔާސަތު ބެލެހެއްޓެވީ ވިލުފުށީ ދާއިރާގެ މެމްބަރު ހަސަން އަފީފު އެވެ. ނިޒާމީ އޮއިވަރެއްގެ ތެރެއަށް މަޖިލީހުގެ ތަޅުން ދޫކޮށްލުމަށް ފަހު އަފީފު ވަނީ އެ ގަރާރު މަޖިލީހުގެ ގަވާއިދާ ހިލާފު ކަމަށް ވިދާޅުވެ ނަޝީދު ވަކިކުރުން އަލުން ހުށަހަޅަން އަންގަވާފަ އެވެ.
އަފީފުގެ އެ ނިންމުން މަޖިލީހުގެ އަމީން އާންމު ގަބޫލު ނުކުރައްވައި، 11:30 އަށްއެޖެންޑާކުރި ޖަލްސާގެ ރިޔާސަތު އިންނެވި މަޖިލީހުގެ ނައިބު ރައީސް އީވާ އަބްދުﷲ ވެސް ވަނީ އަފީފުގެ ނިންމެވުން ރަނގަޅު ކަމަށް ވިދާޅުވެ މަޖިލިސް ޖަލްސާ ނިންމަވާލައްވައިފަ އެވެ.
ނަމަވެސް މަޖިލީހުގެ އަމީން އާއްމު ގަބޫލުކުރައްވަނީ އީވާވެސް ގަރާރު ބޭރުކޮށްލެއްވީ ގަވާއިދާ ހިލާފަށް ކަމަށެވެ. އެ ދެ ޖަލްސާ ހުއްޓުވާ އެމްޑީޕީން ހުށަހެޅި ގަރާރު ބޭރުކޮށްލީ ގަވައިދާ ހިލާފަށް ކަމަށާއި އީވާ އާއި އަފީފު މެމްބަރުންގެ "އިމްތިޔާޒްތަކަށް އަރައިގަތް ކަމަށް" އިމްތިޔާޒާއި ސޫލުކު ކޮމިޓީން ވަނީ ނިންމާފަ އެވެ.
އަދި އެ ގަރާރު ހުއްޓުވާފައިވާތީ ހުއްޓުވާފައިވާތީ ރައްޔިތުންގެ މަޖިލީހުގެ އާންމު ކޮމިޓީއަށް ހުށަހެޅި މައްސަލާގައި ބަންޑާރަ ނައިބުގެ ލަފާ ހޯދުމަށް އެ ކޮމިޓީން ނިންމުމާއެކު، ބަންޑާރަ ނައިބު ވަނީ ނަޝީދުގެ ގަރާރު ކުރިއަށް ގެންދިއުން އަފީފު އަދި އީވާ ހުއްޓުވީ ގަވާއިދާ ހިލާފަށް ކަމަށާއި އެ ގަރާރު ދެން ކުރިއަށް ގެންދާއިރު އެ ދެ މެންބަރުން ރިޔާސަތުގައި ނުތިބެވޭނެ ކަމަށް ލަފާދެއްވާފަ އެވެ.
ނަމަވެސް، މިއަދު 11:00 އަށް ހަމަ އެ ގަރާރު އެޖެންޑާކޮށް ޖަލްސާއެއް ތާވަލުކުރި ޖަލްސާގެ ރިޔާސަތުގައި އަނެއްކާވެސް އީވާ އިންނެވުމުން މަޖިލީހުގެ ތަޅުން ވަނީ ހޫނުވެފަ އެވެ. އެމްޑީޕީގެ މަޖިލިސް މެންބަރުން ދެކޮޅު ހައްދަވަނީ އީވާ ރިޔާސަތުގައި އިންވެމާ އެވެ. ޑިމޮކްރެޓުން އަޑުއުފުލަނީ ބަޖެޓު ހުށަނޭޅޭ މައްސަލާގަ އެވެ.
އެމްޑީޕީގެ ބައެއް މެންބަރުން "އަދަދު" އަށް ވިދާޅުވި ގޮތުގައި، ބަންޑާރަނައިބުގެ ލަފަޔާ އެއްގޮތަށް ރިޔާސަތު ދޫކުރެއްވުމަށް އެދި އަމީން އާއްމު ވަނީ ތަކުރާރުކޮށް ރިޔާސަތުން ފާބައިވަޑައިގަތުމަށް ލަފާދެއްވާފަ އެވެ. ނަމަވެސް އަދިވެސް ރިޔާސަތުގައި އިންނެވީ އީވާ އެވެ.
