އަންނަ އަހަރަށް ލަފާކުރާ ދައުލަތުގެ ބަޖެޓް ހުށަހެޅުން އެޖެންޑާކުރި ޖަލްސާއަށް ފިނޭންސް މިނިސްޓަރު އިބްރާހީމް އަމިރަށް ވަޑައިގެންނެވޭ ގޮތް ނުވުމުން ވެސް އެ ޖަލްސާ ކެންސަލް ނުކޮށް ކުރިއަށް ގެންދަވަން މަޖިލީހުގެ ނައިބު ރައީސް އީވާ އަބްދުﷲ މަސައްކަތް ކުރައްވާތީ އެމްޑީޕީން ފާޑު ކިޔައިފި އެވެ.
އެމްޑީޕީގެ ޕާލަމެންާޓްރީ ގްރޫޕްގެ ލީޑަރު، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް "އަދަދު" އަށް ވިދާޅުވީ ބަޖެޓް ޖަލްސާ ކެންސަލް ނުކޮށް ކުރިއަށް ގެންދަަވަން އީވާ މަސައްކަތް ކުރައްވަނީ މަޖިލީހުގެ ރައީސް މުހައްމަދު ނަޝީދު ވަކިކުރަން ހުށަހަޅާފައިވާ ގަރާރު އެޖެންޑާކުރި ޖަލްސާ ނުބާއްވަން ވެގެން ކަމަށް ދެކެވަޑައިގަންނަވާ ކަމަށެވެ.
އާލާސްކަންފުޅާ އުޅުއްވާތީ މިއަދުގެ ޖަލްސާއަށް ވަޑައިގެންނެވެން ނެތް ކަން ފިނޭންސް މިނިސްޓަރު އިބްރާހީމް އަމީރު އޮތީ މަޖިލީހުގެ އިދާރާއަށް ސިޓީއަކުން އަންގަވައިފަ އެވެ. މިއަދު ހެނދުނު 9:00 ގައި ފަށަން ތާވަލުކޮށްފައި އޮތް އެ ޖަލްސާއަށް އެޖެންޑާކޮށްފައި އޮތް ހަމަ އެކަނި ކަމަކީ އަންނަ އަހަރަށް ލަފާކުރާ ދައުލަތުގެ ބަޖެޓާއި މިއަހަރުގެ ބާކީ ބަޔަށް ހުށަހަޅާ ސަޕްލިމެންޓްރީ ބަޖެޓްގެ މަސައްކަތެވެ.
އަމީރު ވަޑައިނުގެންނެވި ނަމަވެސް ޖަލްސާ ކުރިއަށް ގެންދަވަން 9:00 ގައި އީވާ މަޖިލީހުގެ ރިޔާސީ މޭޒަށް ވަޑައިގެންނެވި އެވެ. އީވާ ވިދާޅުވީ ތަޅުމަށް ވަޑައިނުގެންނެވި ނަމަވެސް މެމްބަރުން މަޖިލީހުގެ ގޯތިތެތޭގައި އެބަ ތިއްބެވި ކަމަށެވެ. އެހެންވެ ކޯރަމް ހަމަކޮށް، ޖަލްސާ ފެށޭތޯ މަސައްކަތްކުރައްވާނެ ކަމަށް އޭނާ ވިދާޅުވި އެވެ.
"އަޅުގަނޑު ހަމަ މަޑުކުރާނަން. ކޯރަމް ހަމަވޭތޯ އަޅުގަނޑު ހަމަ މަޑުކުރާނަން. އިރުއިރުކޮޅާ ކޯރަމް ބެލް ޖަހައިގެން ކޯރަމް ހަމަކުރެވޭތޯ އަޅުގަނޑު ހަމަ މަޑުކުރާނަން،" އީވާ ވިދާޅުވި އެވެ.
ބަޖެޓް މަޖިލީހަށް ހުށަހަޅައިގެން ކުރިއަށް ގެންދިއުމަކީ ގާނޫނު އަސާސީ އާއި މާލިއްޔަތު ގާނޫނުން ލާޒިމުކުރާ ކަމެއް ކަން މެމްބަރުންނަށް އެނގިވަޑައިގަންނަވާނެ ކަން އޭނާ ފާހަގަކުރެއްވި އެވެ. ނަމަވެސް އަސްލަމް ތުހުމަތުކުރައްވާ ގޮތުގައި އީވާ އެހެން އެ ހައްދަވަނީ ނަޝީދުގެ މައްސަލަ އެޖެންޑާކުރާ ޖަލްސާ ނުބާއްވަން ވެގެންނެވެ.
