ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަކިކުރުމަށް ހުށަހެޅި ގަަރާރު ބޭރުކޮށްލުމަށް ފަހު މިއަދުގެ ޖަލްސާ ނިންމާލުމަށް ފަހު އަނެއްކާ ވެސް މިއަދުގެ 11:30 ގައި ޖަލްސާއެއް ބާއްވަން ތާވަލުކޮށްފި އެވެ.
މަޖިލީހުގެ މިއަދުގެ ޖަލްސާ ފަށައި އެޖެންޑާ އިއްވުމާ އެކު ނިޒާމާ ބެހޭ ނުކުތާއެއް ކަމަށް ވިދާޅުވެ ފުރުސަތު ހޯއްދަވައިގެން، ގަރާރު "ގަވައިދާ ހިލާފު ކަމަށް" ވިދާޅުވީ ދަ ޑިމޮކްރެޓްސްގެ ޕާލަމެންޓްރީ ގްރޫޕްގެ ލީޑަރު އަލީ އާޒިމެވެ.
އެއާ އެކު ހޫނު ބަހުސެއް ހިންގަން ފުރުސަތު ދެއްވުމަށް ފަހު މަޖިލީހުގެ ރިޔާސަތުން ވިލުފުށި ދާްއިރާގެ މެމްބަރު ހަސަން އަފީފު އިއުލާނުކުރެއްވީ ޖަލްސާ ނިންމަވައިލެއްވީ ކަމަށެވެ.
މި ޖަލްސާއަށް ވެސް އެޖެންޑާކޮށްފައި ވަނީ މަޖިލިސް ރައީސް ކަމުން ނަޝީދު ވަކިކުރުމުގެ މައްސަލަ އެވެ. މި ޖަލްސާގެ ރިޔާސަތު ބަލަހައްޓާވާނީ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުالله ކަމަށް ވެސް "އަދަދު" ނޫހަށް ވަނީ ޔަގީން ކުރެވިފަ އެވެ.
މިއަދު ހެނދުނު ބޭއްވި ޖަލްސާއަށް އީވާ ހުންނެވީ ސަލާމުގަ އެވެ. އެއީ ރިޔާސަތު ބަލަހައްޓަވަން އަފީފު އިންނެވި ސަބަބެވެ.
މިއަދު ހެނދުނު ބޭއްވި ޖަލްސާގައި ނަޝީދު ވަކިކުރަން ހުށަހަޅާފައިވާ ގަރާރު އޮތީ މަޖިލީހުގެ ގަވައިދާ އެއްގޮތަށް ކަަމަށް އެމްޑީޕީގެ މެމްބަރުން ތަކުރާރުކޮށް ވިދާޅުވި އެވެ.
މަޖިލީހުގެ އިދާރާއިން ވެސް ގަވާއިދު އެކި ގޮތަށް މާނަކޮށްގެން އެ ކަން ހުއްޓުވާފައި އޮތުމަށް ފަހު މިއަދު ގަރާރު އެޖެންޑާކުރީ، ކުރިމަތިވެފައިވާ ދުސްތޫރީ ހިންގުމުގެ ސުވާލުތަކަށް ސުޕްރީމް ކޯޓުން ގޮތްތަކެއް ކަނޑައަޅައި އިއްވި ހުކުމަށް ފަހު އެވެ.
އެންމެ ފުރަތަމަ ހަމަ ޑިމޮކްރެޓްސްއަށް ނިސްބަތްވާ ނައިބު ރައީސް އީވާ އަބްދުﷲ ނެތިސް އެ ގަރާރު ނުގެންދެވޭނެ ކަމަށް އިދާރާއިން ނިންމާފައިވެ އެވެ. އެއިރު ނައިބު ރައީސް އީވާ އަބްދުﷲ އާލާސްކަންފުޅާ އުޅުއްވާތީ، ހުންނެވީ މަޖިލީހަށް ސަލާމުގަ އެވެ.
