ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރަން އެމްޑީޕީން ހުށަހަޅާފައިވާ މައްސަލާގައި މަޖިލީހުން އަމަލުކުރަމުންދާ ގޮތަށް ފާޑުވިދާޅުވެ ވޯޓާ ކުރިމަތިލެއްވުމަށް އެމްޑީޕީގެ ޗެއާޕާސަން ފައްޔާޒު އިސްމާއީލް އެ މަޖިލީހުގެ ރައީސް މުހައްމަދު ނަޝީދަށް ގޮވާލައްވައިފި އެވެ.
މަޖިލީހުގެ މިއަދުގެ ޖަލްސާ ފަށައި އެޖެންޑާ އިއްވުމާ އެކު ނިޒާމާ ބެހޭ ނުކުތާއެއް ކަމަށް ވިދާޅުވެ ފުރުސަތު ހޯއްދަވައިގެން، ގަރާރު "ގަވައިދާ ހިލާފު ކަމަށް" ވިދާޅުވީ ދަ ޑިމޮކްރެޓްސްގެ ޕާލަމެންޓްރީ ގްރޫޕްގެ ލީޑަރު އަލީ އާޒިމެވެ.
އެއާ އެކު ހޫނު ބަހުސެއް ހިންގަން ފުރުސަތު ދެއްވުމަށް ފަހު މަޖިލީހުގެ ރިޔާސަތުން ވިލުފުށި ދާްއިރާގެ މެމްބަރު ހަސަން އަފީފު އިއުލާނުކުރެއްވީ ޖަލްސާ ނިންމަވައިލެއްވީ ކަމަށެވެ.
މި މައްސަލައާ ގުޅިގެން އެކްސްގައި ކުރެއްވި ޕޯސްޓެއްގައި އިކޮނޮމިކް މިނިސްޓަރުކަން ވެސް ފުރުއްވަމުން ގެންދަވާ ފައްޔާޒު ވަނީ މިއަދު ރިޔާސަތުގައި އިންނެވި ވިލުފުށީ ދާއިރާގެ މެމްބަރު ހަސަން އަފީފު ވޯޓު ހުއްޓުވުން އެއީ ފިނޑި އަމަލެއް ކަމަށް ވިދާޅުވެފަ އެވެ.
އަދި, މި އަމަލަކީ މަޖިލިސް 18 ގެ ރިޔާސަތުގައި އަބްދުالله މަސީހު އިންނެވިއިރު ހިނގާފައިވާ އަނިޔާވެރި އަމަލުތަކަށް ވުރެ ގޯސް ކަމެއްގެ ގޮތުގައި ފައްޔާޒު ސިފަކުރެއްވި އެވެ.
ނަޝީދު ވަކިކުރަން އެމްޑީޕީން ހުށަހެޅި ގަރާރު މީގެ ކުރިން ކުރިއަށް ނުގެންދެވުނީ އެ ގަރާރު އެޖެންޑާކުރި ޖަލްސާތަކުގެ ރިޔާސަތު ބަލަހައްޓަވަން މަޖިލީހުގެ ނައިބުރައީސް އީވާ އަބްދުﷲ ވަޑައިނުގެންނެވުމުންނެވެ. އީވާ ފުރަތަމަ ވަޑައިނުގެންނެވީ އާލާސްކަންފުޅާ އުޅުއްވާތީ އެވެ.
މަޖިލީހުގެ އަމީން އާއްމު ފާތިމަތު ނިއުޝާއާއި ކައުންސެލް ޖެނެރަލް ފާތިމަތު ފިލްޒާ އޭރު ވިދާޅުވަމުން ގެންދެވީ މަޖިލީހުގެ ރައީސް ވަކިކުރަން ހުށަހަޅާ މައްސަަލައެއް އެޖެންޑާކުރާ ޖަލްސާއެއްގެ ރިޔާސަތު ބެލެހެއްޓެވޭނީ ހަމަ އެކަނި މަޖިލީހުގެ ނައިބުރައީސަށް ކަމަށެވެ.
އެމްޑީޕީން އެކަން ގަބޫލުނުކޮށް ސުޕްރީމްކޯޓަށް ހުށަހެޅި ދުސްތޫރީ މައްސަލާގައި އެކޯޓުން ކުރި ހުކުމުގައި ކަނޑައެޅީ ނައިބު ރައީސް ނޫން ބޭފުޅަކަށް ވެސް އެ ޖަލްސާގެ ރިޔާސަތު ބެލެހެއްޓެވޭނެ ކަަމަށެވެ. ކަން ހިނގާނެ ގޮތް ކަމަށް ލަފާކުރެވުނު ގޮތާއި ދާދި އެއްގޮތަށް މިއަދު ވެސް އެ ގަރާރަށް ދަ ޑިމޮކްރެޓްސްއިން ވަނީ ހުރަސް އަޅާފަ އެވެ.
