މި މަހުގެ އަށްވަނަ ދުވަހުން ފެށިގެން 10 އާ ހަމައަށް ޔޫއޭއީގައި ބޭއްވި 17 ވަނަ ގްލޯބަލް ސިޓިޒެންޝިޕް ކޮންފަރެންސްގައި ތަގުރީރު ކުރައްވަން ވަޑައިގެން ދުބާއީގައި ހުންނެވުމަށް ފަހު، ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ރާއްޖެއަށް އެނބުރި ވަޑައިގެންފި އެވެ.
ނަޝީދު އެނބުރި ވަޑައިގެންނެވި އިރު އެމަނިކުފާނު މަގާމުން ވަކިކުރަން އެމްޑީޕީން ހުށަހެޅި ގަރާރުގެ މަސައްކަތް މަޖިލީހުގެ މާދަމާގެ ޖަލްސާއަށް އޮތީ އެޖެންޑާކޮށްފަ އެވެ.
އެ މައްސަލަ މާދަމާއަށް އެޖެންޑާކުރީ އެ ޖަލްސާގެ ރިޔާސަތު ބެލެހެއްޓޭނީ ހަމަ އެކަނި މަޖިލީހުގެ ނައިބު ރައީސަށް ކަމަށް މަޖިލީހުން މާނަކުރުމުން އެމްޑީޕީން ސުޕްރީމް ކޯޓަށް ހުށަހެޅި މައްސަލަ އެމްޑީޕީއާ އެއްކޮޅަށް ނިމި، ޖަލްސާއެއް ބާއްވަން މަޖިލީހުން ތައްުޔާރު ވެފައި ވަނިކޮށެވެ.
މަޖިލީހުގެ ޖަލްސާއެއް ނުބޭއްވިގެން، އެމްޑީޕީން ކޯޓަށް ހުށަހެޅި ދުސްތޫރީ މައްސަލާފައި އެދުނީ މަޖިލީހުގެ ރައީސް މަގާމުން ވަކިކުރަން ހުށަހަޅާ ގަރާރެއްގެ މަސައްކަތް ކުރާ ޖަލްސާގެ ރިޔާސަތު ބެލެހެއްޓޭނީ ހަމަ އެކަނި ނައިބު ރައީސަށް ކަމަށް ބުނެފައި ވަނިކޮށް، ނައިބު ރައީސް އީވާ އަބްދުﷲ އާލާސްކަންފުޅާ އުޅުއްވާތީ ޖަލްސާއެއް ކުރިއަށް ނުގެންދެވުމުންނެވެ.
އެ މައްސަލައިގައި ސުޕްރީމް ކޯޓުން ނިންމީ މަޖިލީހުގެ ނައިބު ރައީސް ވަޑައިނުގެންނެވި ނަމަވެސް ޖަލްސާތައް ބޭއްވޭނެ ކަމަށެވެ. މާދަމާ އޮންނަ ޖަލްސާ ތާވަލުކުރީ އެހެންވެ އެވެ.
މާދަމާ މަޖިލީހުގެ ޖަލްސާއެއް ބާއްވާ އިރު، އެ ޖަލްސާގައި އަޑުގަދަކޮށް އިހުތިޖާޖުކުރަން ދަ ޑިމޮކްރެޓް ތައްޔާރުވަމުން ވަމުންދާ ކަމަށް ވަނީ ބެލެވިފަ އެވެ.
އެ ޕާޓީގެ ޕާލަމެންޓަރީ ގްރޫޕްގެ ލީޑަރު އަލީ އާޒިމް އެކްސްގައި ކުރެއްވި ޕޯސްޓުން ފެންނަނީ މީގެ ކުރިން މަޖިލީހުގައި ވުވުޒެލާ ފުމުނު ދުވަހެއްގެ ފޮޓޯއަކާއި އަލަށް ގެނައި ވުވުޒެލާ ތަކެއްގެ ފޮޓޯ އެވެ.
