ސައުތް އޮސްޓްރޭލިއާގެ އެންމެ ބޮޑު ސައިންސް ކޮމްޕެޓިޝަން ކަމުގައިވާ "ދަ އޮލިޕަންޓް ސައިންސް އެވާޑްސް" ގައި ޖުމުލަ 119 ސްކޫލެއްގެ 2،500 ޕްރޮޖެކްޓާއި ވާދަކޮށް ތަފާތު އަދި ފާހަގަކޮށްލެވޭ ޕްރޮޖެކްޓުގެ އެވޯޑު ހޯދީ އުމުރުން އެންމެ ތޭރަ އަހަރުގެ ޝާޔާ އިސްމާއީލެވެ. ދިވެހިރާއްޖެއަށް ނިސްބަތްވާ ޝާޔާ ތައުލީމު ހާސިލް ކުރަނީ އޮސްޓްރޭލިއާގެ އެޑިލޭޑް ބޮޓާނިކް ހައި ސްކޫލުގަ އެވެ.
އަބަދުވެސް ސައިންސް އަދި އަމިއްލައަށް އީޖާދުތައް އުފެއްދުމަށް ޝައުގުވެރިވާ ޝާޔާ ވަނީ އޮލިޕަންޓް ސައިންސް އެވާޑްސް މުބާރާތުގައި ވާދަކުރުމަށްޓަކައި ތަފާތު އީޖާދެއް އުފައްދާފަ އެވެ. "ވާމޯސް" ގެ ނަމުން ނަން ދީފައިވާ މި ޕްރޮޖެކްޓުގައި ޝާޔާ އުފައްދާފައިވަނީ އޮޓޮމެޓިކް މެރިން އޮބްޒަވޭޝަން އުޅަނދެކެވެ.
މިއަހަރުގެ އޮލިޕަންޓް ސައިންސް އެވާޑްސްއަށް ހުށަހެޅި ޝާޔާގެ މި ޕްރޮޖެކްޓަށް ޖުމުލަ ހަތަރު އެވޯޑެއް ވަނީ ލިބިފަ އެވެ. އޭގެ ތެރޭގައި ހިމެނެނީ:
- މުބާރާތަށް އެންމެ ފާހަގަކޮށްލެވޭ ފަރާތަކަށް ދޭ ޓްރޮފީ
- ފްލިންޑާސް ޔުނިވަސިޓީ އެންވަޔަރަންމަންޓް އެވޯޑް
- މޮޑެލްސް އެންޑް އިންވެންޝަންސް: ގުރޭޑު 7-8 ގެ ކެޓަގަރީން އެއްވަނަ
- ޑިޕާޓްމަންޓް އޮފް އެޑިއުކޭޝަން ޔަންގް ސައިންޓިސްޓް އެވޯޑްސްގެ ގުރޭޑު 5-8 ގެ ކެޓަގަރީން ހަތަރު ވަނަ
މޮނިކާ އޮލިފަންޓް ޝާޔާއަށް އިނާމު ހަވާލުކޮށްދެނީ --
ޝާޔާގެ ޕްރޮޖެކްޓް "ވާމޯސް"
ވާމޯސް އަކީ ކަނޑުގެ ދިރުންތައް މޮނިޓަރކޮށް ބެލުމަށް ބޭނުންވާ ސެންސަރުތައް ފަރަށް ގެންދިއުމަށް ފަރުމާކޮށްފައިވާ އިލެކްޓްރިކް ވޯޓަރޕްރޫފް ކަނޑު އުޅަނދެކެވެ. ޝާޔާ ފަރުމާކޮށްފައިވާ މި އުޅަނދުގެ މަގުސަދަކީ ސައިންސްވެރިންނަށް ފަރު މޮނިޓަރުކޮށް ބެލުމަށް އެހީތެރިވެދިނުމެވެ. ވާމޯސްގެ މުހިންމު އެއް ސިފައަކީ ފަޅުތެރެއިން ސެންސަރުތައް ދޫކުރުމުގެ ގާބިލުކަން ލިބިގެންވުމެވެ. އަދި ޑައިވަރުންނަށް ނުރައްކާ ކުރިމަތިވެދާނެ ފަަދަ މިޔަރު އަދި ކިނބޫފ ފަދަ އެއްޗެހި އުޅޭ ސަރަހައްދުތައް ދެނެގަތުމަށް ވެސް މި އީޖާދު ބޭނުންކުރެވޭނެ އެވެ.
ވާމޯސްއަށް ބޭނުންވާ ކަރަންޓު ނަގަނީ ބެޓެރީއަކުންނެވެ. ކަނޑުގެ މާހައުލު ތަގައްޔަރު ކުރާ ފަދަ ތެލުގެ ބާވަތްތައް މި އުޅަނދު އޮޕަރޭޓުކުރާކަށް ބޭނުމެއް ނުވެ އެވެ. ވާމޯސް އިން ތަފާތު އެތައް ސެންސަރެއް ގެންގުޅެވޭއިރު، މި ސެންސަރުތަކުން ފިޒިކަލް، ކެމިކަލް، އަދި ބަޔޮލޮޖިކަލް ސިފަތަކުގެ ޑޭޓާ ފޯރުކޮށްދޭނެ އެވެ. މި ސެންސަރުތަކުގެ ތެރޭގައި ހިމެނެނީ:
- އިމޭޖިން އެންޑް ފޮޓޯގްރަފިކް ސެންސާސް
- އެކޮސްޓިކް ސެންސާސް
- ލައިޓް ސެންސާސް
- ޓެމްޕަރޭޗާ ސެންސާސް
- ޕީއެޗް ސެންސާސް
- ސެލިނިޓީ ސެންސާސް
- ޑިސްސޮލްވްޑް އޮކްސިޖަން ސެންސާސް
- ނިއުޓްރިއެންޓް ސެންސާސް
ޝާޔާގެ ޕްރޮޖެކްޓް ވާމޯސް --
ވާމޯސް އިން އެއްކުރާ މި ޑޭޓާ ބޭނުންކޮށްގެން ފަރުތަކުގެ ސިއްހަތު ވަޒަންކޮށް، ނުރައްކާތައް ދެނެގަނެ، މުރަކަ ފަރުތައް ރައްކާތެރިކޮށް އަލުން އާލާކުރުމަށް ފަސޭހަވެގެންދާނެ އެވެ. މިއީ ރާއްޖެ ފަދަ ޖަޒީރާ ގައުމަކަށް މުހިއްމު އީޖާދެކެވެ.
މި ޕްރޮޖެކްޓަކީ ޝާޔާގެ ހުވަފެންތައް ހަގީގަތަކަށް ހެދުމަށް މުހިއްމު ކާމިޔާބީއެކެވެ. ތައުލީމީ އާއިލާއަކަށް ނިސްބަތްވާ ޝާޔާ ބޭނުންވަނީ އާޓިފިޝަލް އިންޓެލިޖެންސް ސައިންޓިސްޓަކަށް ވެ، އެ ރޮނގުން ކުރިއަށްދާށެވެ.
ޝާޔާގެ ބައްޕަ ހ. ރެވިމާގޭ، ޕްރޮފެސަރް އިސްމާއީލް ޝަކީލަކީ އޮސްޓްރޭލިއާގެ ޑިޕާޓްމެންޓް އޮފް ޑިފެންސްގައި މަސައްކަތްކުރާ ޑިފެންސް ސައިންޓިސްޓެކެވެ. މަންމަ އާމިނަތު މާރިޔާ އަލީ އަކީ ވަކީލެކެވެ. ޝާޔާގެ އާއިލާގައި ހުންނަނީ އޭނާގެ ދައްތަ ޝަންޒާ އެވެ. ޝާޔާގެ ކާފައަކީ ވެސް އިލްމީ ރޮނގުން ރާއްޖޭގައި ފާހަގަކޮށްލެވޭ ބޭފުޅެކެވެ. ދިވެހި ބޭހަށް މަޝްހޫރު އިތާމުއިގޭ އަލީ ހުސެއިން އެވެ.
ޝާޔާ ވާމޯސް ހެދުމުގައި ހޭދަކުރި ދުވަސްވަރުގައި ޝާޔާގެ މާމަ، ގ. ސިލްވާ ސްކައި، ފާތުމަތު ހަމީދާ ޝާޔާއަށް އެހީވެ ވާމޯސް ޓެސްޓް ކުރަން ސައުތް އޯސްޓްރޭލިއާ ގެ އެކިއެކި ގޮނޑުދޮށްތަކަށް ކުރި ދަތުރުތަކުގައި ބައިވެރިވި ކަމަކީ ޝާޔާ ބުނާގޮތުގައި ޝާޔާއަށް ލިބުނު ވަރަށް ހާއްސަ އުފަލެކެވެ.
ޝާޔާގެ އުންމީދަކީ ކިޔަވައި ނިމިގެން ރާއްޖޭގެ ސްކޫލު ކުދިން ސައިންސާއި އީޖާދުތަކަށް އަހުލުވެރިކޮށް، ރާއްޖެ ސައިންސްގެ ރޮނގުން ކުރިއަރުވައި ފާހަގަކޮށްލެވޭ ގައުމަކަށް ހެދުމަށް އެހީތެރިވެދެވޭ ފަދަ ދަރިއަކަށް ވުމެ
ޝާޔާގެ ކިޔެވުމާއި ދިރާސާތައް ރާއްޖެއަށް ފައިދާކުރާނެ ދާއިރާތަކުން ކުރުމަށް ޝާޔާ އަބަދުވެސް އިސްކަން ދޭކަން އޭނާގެ ބައްޕަ އިސްމާއީލް ޝަކީލް ފާހަގަކުރެއްވި އެވެ.
"މިސާލަކަށް ތިމާވެށި ހިމާޔަތްކުރުމަށް އާ ހައްލުތައް ހޯދުން، ތިމާވެއްޓާ ގުޅޭ ޓެކްނޮލޮޖީތައް ކުރިއެރުވުން، ސާފު ބޯފެން ލިބޭނެ އިތުރު ގޮތްތައް ހޯދުން، ސްކޫލްތަކުގައި އޭއައި ތައުލީމު ކުރިއެރުވުމާއި، ދުރު ޖަޒީރާތަކަށް ވާސިލްވުމަށް އޭއައި އެސިސްޓެޑް ޓެލެމެޑިސިން ސޮލިއުޝަންތައް ތަރައްގީކުރުމާއި، ކުނި މެނޭޖްކުރުމާއި ރީސައިކަލް ކުރުމަށް ރަނގަޅު ގޮތްތައް ހޯދުން. މިއީ ޝާޔާ ޝައުގުވެރިވާ ދާއިރާތައް،" އިސްމާއީލް ޝަކީލް ހިއްސާކުރެއްވި އެވެ.
