ރާއްޖެއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމަށްޓަކައި ނިމިގެން މިދާ ފަސް އަހަރު ބިން ހިއްކުމަށް އިސްކަން ދިނުމުގެ އިތުރުން 10،000 ވުރެ ގިނަ ހައުސިްނ ޔުނިޓުގެ މަސައްކަތް މިހާރު އެކި މަރުހަލާތަކުގައި ކުރިޔަށް ދާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މިއަދު ފާހަގަ ކުރާ 55 ވަނަ ޖުމްހޫރީ ދުވަހާ ގުޅިގެން ގައުމާ މުހާތަބު ކުރައްވައި ދެއްވި ހިތާބުގައި އެ މަނިކުފާނުގެ ވެރިކަމުގެ ފަސް އަހަރު ތެރޭގައި މާލެއާއި ރަށްތަކުގެ ބިން އިތުރުކޮށް ބޯހިޔާވަހިކަން ހޯދައިދިނުމަށް ކޮށްދެއްވާފައިވާ ކަންތައްތަކުގެ ތަފުސީލު ދެއްވައިފަ އެވެ.
"ހުޅުމާލެ ފޭސް ތިނަކާއި ގުޅީފަޅާއި ގިރާވަރު ފަޅު އަދި އުތުރުތިލަ ފަޅަކީ މާލެއަށް އޮތް ހައްލު" ރައީސް ވިދާޅުވި އެވެ.
ރައީސް ސޯލިހު ވިދާޅުވީ މާލޭގެ ބޯހިޔާވަހިކަމުގެ ތަކުލީފަށް ހައްލެއް ހޯދައިދިނުމުގެ ގޮތުން މާލެ ރައްޔިތުންނަށް 9،031 ގޯތި ދިނުމަށް ނިންމައި, އޭގެ ތެރެއިން 6500 އަށްވުރެ ގިނަ ގޯތީގެ ރަޖިސްޓްރީ ހައްގުވެރިންނާ ހަވާލުކޮށްފައިވާ ކަމަށެވެ. މީގެ އިތުރުން ވެސް ސަރުކާރުން ވަނީ ރާއްޖޭގެ އެކި ރަށްރަށުގައި ބިން ހިއްކުމުގެ މަޝްރޫއުތައް ކުރިއަށް ގެންގޮސްފަ އެވެ.
ބޯހިޔާވަހިކަމުގެ މައްސަލައަށް ހައްލު ހޯދަން އިމާާރާތްކުރާ ފްލެޓްތަކުގެ ތަފްސީލު ދެއްވާ ރައީސް ވިދާޅުވީ އެކި މަރުހަލާގައިވާ ޖުމްލަ 7700 ފްލެޓްގެ މަސައްކަތް މާލެ ސަރަހައްދުގައި ކުރިއަށްދާ ކަމަށެވެ.
ހަމައެއާއެކު އަތޮޅުތެރޭގައި އޮތް ބޯހިޔާވަހިކަމުގެ ބުރައަށް ލުޔެއް ހޯދުމުގެ ގޮތުން ފާއިތުވި ފަސް އަހަރު 2732 ހައުސިން ޔުނިޓް އެކި މަރުހަލާތަކުގައި ކުރިއަށް އެބަހުރި ކަމަށް ރައީސް ފާހަގަ ކުރެއްވެވި އެވެ.
ރައީސް ސޯލިހުގެ ސަރުކާރުގައި މާލެ ސަރަހައްދަށް އަމާޒުކޮށް ބިންވެރިޔާގެ ނަމުގައި ހިންގި މަޝްރޫއުގެ ދަށުން މާލޭ ރައްޔިތުންނަށް ގޯތި ދޫކޮށްފައިވާއިރު, ގެދޮރުވެރިޔާގެ ނަމުގައި ހިންގި ފްލެޓް މަޝްރޫއުގެ ދަށުން ފްލެޓް ލިބޭ މީހުންގެ ލިސްޓެއް ތައްޔާރުކޮށް އެ މަސައްކަތް މިހާރު ދަނީ ކުރަމުންނެވެ. އެ މަޝްރޫއުގެ ދަށުން ހުޅުމާލޭގައި ވަނީ 4000 ފްލެޓު އެޅުމުގެ މަސައްކަތް ކުރަމުންނެވެ.
