ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރުމުގެ މައްސަލަ ކުރިޔަށް ނުގެންގޮސްގެން, އެމްޑީޕީން ސުޕްރީމް ކޯޓަށް ހުށަހެޅި މައްސަލަ އިއްޔެ ނިންމައި ކުރި ހުކުމުން އެ މަރުތަޅު ނެއްޓުނެވެ. އަދި ނަޝީދު ވަކިކުރަން ހުށަހަަޅާފައިވާ ގަރާރުގެ މަސައްކަތް ނުނިމެނީސް މަޖިލީހުގައި އެހެން މަސައްކަތެއް ނުކުރެވޭނެ ކަމަށް އެމްޑީޕީން ބުނަމުން އައި ނަމަވެސް އެގޮތަށް އެކަން ނުވާނެ ކަމަށް ވެސް ހުކުމުން ކަނޑައެޅި އެވެ.
އެމްޑީޕީގެ 49 މެމްބަރުންގެ ސޮޔާއެކު ނަޝީދުގެ އިތުބާރު ނެތް ކަމަށް ހުށަހެޅި މައްސަލަ ހުއްޓިފައި އޮތީ މަޖިލީހުގެ ގަވާއިދުގެ 205 ވަނަ މާއްދާ، މަޖިލީހުގެ ނައިބު ރައީސް އީވާ އަބްދުﷲ އާއި އަމީން އާންމު ފާތިމަތު ނިއުޝާ މާނަކުރި ގޮތުންނެވެ.
އެ މާއްދާގެ ބ. ގައި ބަޔާންކޮށްފައި ވަނީ ރައްޔިތުންގެ މަޖިލީހުގެ ރައީސް މަގާމުން ވަކިކުރުމަށް ހުށަހަޅައިފައިވާ މައްސަލައަށް ގޮތެއް ނިންމުމުގެ ޖަލްސާގެ ރިޔާސަތު ބަލަހައްޓަން ޖެހޭނީ ނައިބު ރައީސް ކަމަށެވެ.
މަޖިލީހުގެ ނައިބު ރައީސް ނެތް ހާލަތެއްގައި ވެސް، މަޖިލީހުގެ ގަވާއިދުގެ 44 ވަނަ މާއްދާގެ ދަށުން، މަޖިލީހުގެ ރިޔާސަތު ބަލަހައްޓަން ކަނޑައަޅާފައިވާ މެމްބަރަކު ރިޔާސަތު ބަލަހައްޓާ ގޮތަށް ނަޝީދު ވަކިކުރުމުގެ ގަރާރު ކުރިޔަށް ގެންދެވޭނެ ކަމަށް ކަނޑައަޅައި ދިނުމުގެ އިތުރުން އެ ގަރާރާ މެދު ގޮތެއް ނުނިންމައި، މަޖިލީހުގެ އެހެން މަސައްކަތެއް ކުރިޔަށް ނުގެންދެވޭނެ ކަމަށް ކަނޑައަޅައިދޭން ވެސް އެމްޑީޕީން ސުޕްރީމް ކޯޓަށް ހުށަހެޅި އެވެ.
ނަޝީދުގެ މައްސަލަ އެޖެންޑާކުރި އެއްވެސް ޖަލްސާއަކަށް އީވާގެ ގާނޫނީ ވާޖިބު އަދާކުރެއްވުމަށް ހާޒިރުވެ ވަޑައިނުގަތެވެ. ފުރަތަމަ ދެއްކެވީ ޑެންގޫ ޖެހުމުގެ އުޒުރެވެ. ދެން ދެއްކެވީ ސުޕްރީމް ކޯޓަށް މައްސަލަ ހުށަހަޅައިފައި އޮތުމުގެ އުޒުރެވެ.
ރައްޔިތުންގެ މަޖިލީހުގެ ރައީސް ވަކިކުރުމުގެ ގަރާރު އެޖެންޑާ ކުރާ ޖަލްސާގެ ރިޔާސަތު ބެލެހެއްޓޭނީ ހަމަ އެކަނި ނައިބު ރައީސަށް ކަމަށް ނިންމި ނިންމުމަކީ ގާނޫނު އަސާސީއާ ހިލާފު ނިންމުމެއް ކަމަށް ސުޕްރީމް ކޯޓުގެ ހުކުމް ކަނޑައެޅި އެވެ.
ގަރާރާ މެދު ގޮތެއް ނުނިންމައި، މަޖިލީހުގެ އެހެން މަސައްކަތެއް ކުރިޔަށް ނުގެންދެވޭނެ ކަމަށް ކަނޑައަޅައިދޭން އެމްޑީޕީން އެދުނު ނަމަވެސް، ސުޕްރީމް ކޯޓުން ނިންމީ ގާނޫނު އަސާސީން މަޖިލީހުގެ މައްޗަށް ލާޒިމުކޮށްފައިވާ ކަންކަން ކުރިޔަށް ގެންދެވޭނެ ކަމަށެވެ.
އެގޮތަށް ހުކުމުގައި ކަނޑައެޅުމުން އާ ރައީސް ހުވާކުރުމާއި، އަންނަ އަހަރުގެ ބަޖެޓާއި އާ ވަޒީރުންގެ ވަޒީރުންނަށް ރުހުން ދިނުމުގެ މައްސަލަ ކުރިޔަށް ގެންދެވޭނެ އެވެ.
