އިންޑިއާގެ އަދާނީ ގްރޫޕުން ސްރީ ލަންކާގައި ހަދަން ރާވާފައިވާ ޑީޕް ވޯޓާ ކޮންޓެއިނާ ޓާމިނަލަށް އެމެރިކާއިން 550 މިލިއަން ޑޮލަރުގެ ލޯނެއް ދޭން އެއްބަސްވެއްޖެ އެވެ.
އާގު ބޯޓު ދަތުރުކުރާ މުހިންމު މަގެއްގެ މެދުގައި އޮންނަ ކޮލަމްބޯ ޕޯޓުގައި މި ޓާމިނަލް ހަދަނީ، ބަނދަރު އޮޕަރޭޓްކުރާ އިންޑިއާގެ އެންމެ ބޮޑު ކުންފުނި އަދާނީ ޕޯޓްސް އެންޑް ސްޕެޝަލް އިކޮނޮމިކް ޒޯންސް ލިމިޓެޑްގެ 51 ޕަސެންޓް ހިއްސާ އޮންނަ ކޮންސޯޓިއަމަކުންނެވެ.
އެ ކޮންސޯޓިއަމްގައި 34 ޕަސެންޓް ހިއްސާއާއެކު ސްރީލަންކާގެ ޖޯން ކީލްސް ހޯލްޑިންގްސް އަދި 15 ޕަސެންޓް ހިއްސާއާއެކު ސްރީލަންކާ ޕޯޓްސް އޮތޯރިޓީ ހިމެނެ އެވެ.
މި ޓާމިނަލަށް 700 މިލިއަން ޑޮލަރު ހަރަދު ވާއިރު، އެ މަޝްރޫއަށް 553 މިލިއަން ޑޮލަރުގެ ލޯނެއް ދޭން އެއްބަސްވީ އެމެރިކާ ސަރުކާރުން ހިންގާ މާލީ އިދާރާއެއް ކަމުގައިވާ، އިންޓަނޭޝަނަލް ޑިވެލޮޕްމަންޓް ފައިނޭންސް ކޯޕަރޭޝަންއިންނެވެ.
"ސްރީލަންކާއަކީ ދުނިޔޭގެ އެންމެ މުހިންމު އެއް ޓްރާންސިޓް ހަބް، ހުރިހާ ކޮންޓެއިނަރު އުޅަނދުތަކުގެ ދެބައިކުޅަ އެއްބައި އެގައުމުގެ ކަނޑުގެ ސަރަހައްދުން ޓްރާންސިޓް ކުރަނީ،" އިންޓަނޭޝަނަލް ޑިވެލޮޕްމެންޓު ފައިނޭންސް ކޯޕަރޭޝަންގެ ވެރިޔާ ސްކޮޓް ނަތަން ވިދާޅުވި އެވެ.
ކޮންޓެއިނާ ޓާމިނަލްގެ ދިގުމިނުގައި 1.4 ކިލޯމީޓަރު (0.87 މޭލު) ހުންނައިރު، އެ ސަރަހައްދުގެ ފުންމިނުގައި 20 މީޓަރު (65.62 ފޫޓް) ހުރެ އެވެ. އެ ޓާމިނަލް ތަރައްގީ ކުރަނީ އަހަރަކު 3.2 މިލިއަން ކޮންޓެއިނަރުގެ ޖާގަ ހުންނަ މިންވަރަށެވެ.
އިންޑިއާގެ އަދާނީ ގްރޫޕުން މި ޓާމިނަލް ހަދަނީ ޗައިނާގެ ނުފޫޒު ލަންކާގައި ގަދަވެ، ހަންބަންޓޯޓާގައި ޗައިނާއިން ބަނދަރެއް ހަދާފައި ވަނިކޮށެވެ.
