ޕޯޓޯ (ނޮވެމްބަރު 8) - ރޯޔަލް އެންޓްވާޕް ކޮޅަށް ގޯލު ޖަހައި، ޔުއެފާ ޗެމްޕިއަންސް ލީގުގައި ގޯލު ޖެހި އެންމެ މުސްކުޅި ކުޅުންތެރިޔާގެ ރެކޯޑު ޕޯޓޯގެ ޑިފެންޑަރު ޕެޕޭ މުގުރާލައިފި އެވެ.
ޗެމްޕިއަންސް ލީގުގުގައި ޕޯޓޯ އިން ވަނީ ރޭ 2-0 އިން ބެލްޖިއަމްގެ ރޯޔަލް އެންޓްވާޕް ބަލިކޮށްފަ އެވެ. މި މެޗުގެ އިތުރު ވަގުތުގައި ޕޯޓޯގެ ދެ ވަނަ ގޯލު ޖަހައިދިނީ ޕޯޗުގަލްގެ ޑިފެންޑަރު ޕެޕޭ އެވެ.
ޕެޕޭ މި ގޯލު ޖެހިއިރު އޭނާގެ އުމުރަކީ 40 އަހަރާއި، 254 ދުވަހެވެ. މިއާ އެކު އޭނާ ވެފައިވަނީ ޗެމްޕިއަންސް ލީގުގެ މެޗެއްގައި ގޯލު ޖެހި އެންމެ މުސްކުޅި ކުޅުންތެރިޔާއަށެވެ. އަދި ޗެމްޕިއަންސް ލީގުގައި ގޯލު ޖެހި 40 އަހަރުން މަތީގެ ހަމައެކަނި ކުޅުންތެރިޔަކީވެސް ޕެޕޭ އެވެ.
ޗެމްޕިއަންސް ލީގުގައި ގޯލު ޖެހި އެންމެ ދުވަސްވީ ކުޅުންތެރިޔާގެ ރެކޯޑު ކުރިން އޮތީ އިޓަލީގެ އޭއެސް ރޯމާގެ ކުރީގެ ތަރި ފްރެންޗެސްކޯ ޓޮޓީގެ އަތުގަ އެވެ. 2014 ވަނަ އަހަރުގެ ޗެމްޕިއަންސް ލީގުގައި ސީއެސްކޭއޭ މޮސްކްވާ ކޮޅަށް ގޯލު ޖެހިއިރު ޓޮޓީގެ އުމުރަކީ 38 އަހަރާއި، 59 ދުވަހެވެ.
ޗެމްޕިއަންސް ލީގުގައި ގޯލު ޖެހި އެންމެ މުސްކުޅި ކުޅުންތެރިޔާގެ ރެކޯޑުގެ އިތުރުން ޗެމްޕިއަންސް ލީގުގައި މެޗެއް ކުޅުނު ދެ ވަނައަށް އެންމެ މުސްކުޅި ކުޅުންތެރިއަކީވެސް ޕެޕޭ އެވެ. އޮކްޓޯބަރު 25 ގައި ޕެޕޭ ޗެމްޕިއަންސް ލީގުގައި ޕޯޓޯއަށް ކުޅުނު މެޗުގަ އެވެ.
ޕޯޗުގަލްގެ ތަޖުރިބާކާރު ޑިފެންޑަރު ޕެޕޭ އަކީ ގައުމީ ޓީމުގެ ފުރަތަމަ އެގާރައިން ވެސް ކޯޗު ފުރުސަތުދޭ ކުޅުންތެރިއެކެވެ. އޭނާ މިހާރު ތައްޔާރުވަމުން އަންނަނީ ޕޯޗުގަލްއާއެކު އަންނަ އަހަރުގެ ޔޫރޯގައި ކުޅުމަށެވެ.
