ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ އެޖެންޑާކުރި ޖަލްސާ ނުބޭއްވީ ގަވާއިދާ ހިލާފަށް ކަމަށް ބުނެ ސުޕްރީމް ކޯޓަށް އެމްޑީޕީން ހުށަހަޅާފައިވާ މައްސަލައިގައި އެ ކޯޓުން ގޮތެއް ނިންމުމުގެ ކުރިން، މަޖިލީހުގެ ރިޔާސަތު ބެލެހެއްޓެވުމަށް، އެ މަޖިލީހުގެ ނައިބު ރައީސް އީވާ އަބްދުﷲ ދެކޮޅު ހެއްދެވުމުން، މަޖިލީހުގައި މިހާރު ވަނީ "މަރުތަޅު" އެޅިފަ އެވެ.
"ސުޕްރީމް ކޯޓަށް ހުށަހަޅައި މިހާރު ކުރިއަށްދާ މައްސަލ،ަ އެ ކޯޓުން ގޮތެއް ކަނޑައަޅައި ނިމުމުގެ ކުރިން ރައްޔިތުންގެ މަޖިލީހުން ވަކިގޮތެއް އިހުތިޔާރުކޮށްގެން ކުރިއަށް ދިއުމަކީ މަޖިލީހުން ކުރިންސުރެ އަމަލުކުރަމުން އަންނަ އުސޫލަށް ބަލާއިރު ކަންކުރަމުން އަންނަ ގޮތް ނޫން ކަމުގައި ގަބޫލުކުރަމެވެ،" ޖަލްސާގެ ރިޔާސަތު ބެލެހެއްޓެވުމަށް ބޭނުން ނުވެ، އަމީން އާންމު ފާތިމަތު ނިޔުޝާއަށް ފޮނުއްވި ސިޓީގައި ވިދާޅުވެފައިވެ އެވެ.
އެ މައްސަލަ ނިމުމުގެ ކުރިން ޖަލްސާތައް ކުރިއަށް ގެންދިޔުމަކީ ސުޕްރީމް ކޯޓުގައި އޮތް މައްސަލަ އަށް ފޯރުވޭ ނުފޫޒެއް ކަމަށް ވެސް އީވާ ގަބޫލުކުރައްވަ އެވެ.
ނަމަވެސް، މަޖިލީހުގެ އަމީންއާންމު ދެކެވަޑައިގަންނަވަނީ ސުޕްރީމް ކޯޓަށް ހުށަހަޅާފައިވާ މައްސަލަ ނުނިމި އޮތަސް ޖަލްސާތައް ކުރިއަށް ގެންދެވޭނެ ކަމަށެވެ. އެހެންވެ، އެކަން މިދިޔަ ހަފުތާގައި އީވާއަށް އެންގެވި އެވެ.
މިދިޔަ ބުދަ ދުވަހު ޖަލްސާްއެއް ބޭއްވުމަށް ތާވަލުކުރީ ވެސް އެގޮތަށް ނިޔުޝާ ގަބޫލު ކުރައްވާތީ އެވެ. އެ ޖަލްސާއަށް ވަޑައިގެން ދެއްވުމަށް އެދި އީވާ ސިޓީއެއް ވެސް ފޮނުވި އެވެ. އެ ދުވަހުގެ ޖަލްސާއަށް ވަޑައިނުގެން އީވާ ހުންނެވީ ސަލާމުގަ އެވެ.
ނަޝީދުގެ އިތުބާރު ނެތްކަމުގެ މައްސަލަ އީވާ ކުރިއަށް ގެންދަން ބޭނުންފުޅު ނުވެ ގިނަ ދުވަސްތަކެއް ވަންދެން ސަލާމް ފޮނުއްވުމަށް ފަހު، ސުޕްރީމް ކޯޓުގައި މައްސަލަ އޮއްވައި ޖަލްސާތައް ކުރިއަށް ގެންދަން އުޒުރުވެރިވެވަޑައިގަންނަވާ ކަމަށް ސިޓީ ފޮނުއްވީ އެއަށް ފަހު އެވެ. އެ ސިޓީ ޖަހާފައިވާ ތާރީހަކީ ނޮވެމްބަރު ހަތަރެކެވެ.
ކުރިން އީވާ ސަލާމް ފޮނުއްވަމުން ގެންދެވީ ޑެންގޫ ހުން ޖެހިގެން ކަމަށް ވިދާޅުވެފަ އެވެ.
ނަޝީދުގެ އިތުބާރު ނެތް ކަމުގެ މައްސަލަ އެޖެންޑާކުރި ޖަލްސާ ނުބޭއްވީ ގަވާއިދާ ހިލާފަށް ކަމަށް ބުނެ ސުޕްރީމް ކޯޓަށް ހުށަހަޅާފައިވާ މައްސަލައިގެ އަޑުއެހުންތައް މިއަދު ހެނދުނު 9:45 ގައި ފަށާނެ އެވެ.
ނަޝީދުގެ މައްސަލައަށް ގޮތެއް ނުނިންމައި މަޖިލީހުގައި އެހެން މަސައްކަތެއް އެޖެންޑާ ނުކުރެވޭނެ ކަމަށް އެމްޑީޕީން އަދި އެޓާނީ ޖެނެރަލް ވެސް ގަބޫލު ކުރައްވަ އެވެ. އެހެންވެ، އަންނަ އަހަރަށް ލަފާކުރާ ދައުލަތުގެ ބަޖެޓު ވެސް މަޖިލީހުގައި ބަހުސްކޮށް ކުރިޔަށް ގެންދެވޭނެ ގޮތެއް ނެތެވެ.
މުހިންމު ބައެއް ހަބަރު
ދުވަހުގެ ފޮޓޯ
4000 ފްލެޓު ލިބޭ މީހުންގެ ލިސްޓާމެދު ޝަކުވާކުރަން ޕްލޭނިން މިނިސްޓްރީއަށް ބަޔަކު ދިޔުމުން، އެ މިނިސްޓްރީގެ ސަލާމަތީކަންކަން ފުލުހުން ބަލަހައްޓަނީ. -- ފޮޓޯ: މިރާޝް ނާޝިމް/އަދަދު
