ގެދޮރުވެރިޔާ ސްކީމުގެ ދަށުން ފުރަތަމަ ބުރުގައި ފްލެޓް ލިބޭ މީހުންގެ ދާއިމީ ލިސްޓުގައި ނަން ހިމެނިފައި ނުވާތީ އެކަމާއި ހަޅުތާޅު ކުރުމަށް ބަޔަކު ހައުސިން މިނިސްޓްރީ އަށް މިއަދު އެއްވެއްޖެ އެވެ.
ހައުސިން މިނިސްޓްރީ އަށް އެއްވި 15 ވަރަކަށް މީހުންގެ މައިގަނޑު ޝަކުވާ އަކަށްވީ، ގެދޮރުވެރިޔާ ސްކީމުގެ ދަށުން ފުރަތަމަ ބުރުގައި ފްލެޓް ލިބޭ މީހުންގެ ދާއިމީ ލިސްޓު އިއްޔެ އާންމު ކުރިއިރު، އެ މީހުންނަށް ލިބޭނެ ކަމަށް އަންދާޒާކުރާ ވަރަށް ވުރެ ޕޮއިންޓު މަދުވެފައިވުމެވެ.
ގެދޮރުވެރިޔާ ސްކީމުގެ ދަށުން ފްލެޓް ލިބޭ މީހުންގެ ވަގުތީ ލިސްޓު ކުރިން އާންމުކުރިއިރު، ޕޮައިންޓް ލިބިފައިވާ މިންވަރެއް ހާމަކޮށްފައެއް ނުވެ އެވެ. ސަރުކާރުން ނިންމާފައި އޮތީ ޝަރުތު ހަމަވާ 15،046 މީހުންނަށް ޕްލެޓް ދިނުމަށެވެ. ނަމަވެސް ފުރަތަމަ ބުރުގައި ދެނީ 4،000 ޕްލެޓްވެ.
"އަޅުގަނޑަށް ލިބޭ 79 ޕޮއިންޓް، އަޅުގަނޑު މިއައީ ލިސްޓުގައި 74 ޕޮއިންޓަށް މަދުވީ ކީއްވެތޯ އަހަން،" މިއަދު ހައުސިން މިނިސްޓްރީ އަށް އެއްވި މީހުންގެ ތެރެއިން މާލޭގައި ދިރިއުޅޭތާ 16 އަހަރުވެފައިވާ، ސިވިލް ސާވިސް މުވައްޒަފަކު ބުންޏެވެ.
މިއަދު ޝަކުވާ އައިގެން މިނިސްޓްރީ އަށް އެއްވި މީހުން، ބުނާ ގޮތުގައި ޕްލެޓަށް ޕޮއިންޓް ދޭން ކަނޑައަޅާފައިވާ އުސޫލުން ބަލައިގެން ހިސާބު ޖެހިމުން، ފުރަތަމަ ބުރުގައި އެމީހުންނަަށް ފްލެޓް ލިބެން ޖެހޭނެ އެވެ. އަދި ބައެއް މީހުން ބުނީ، އެމީހުންގެ ދިރުޅުމުގެ ހާލަތު ވެސް ނަލާފައިނުވާ ކަމަށެވެ.
ފުރަތަމަ ބުރުގައި ދޫކުރާ ފްލެޓު ދެނީ ތިން ކޮޓަރީގެ އެޕާޓްމަންޓަށް ޝަރުތު ހަމަވާ މީހުންގެ ތެރެއިން 76 އިން ފެށިގެން މަތިން މާކްސް ލިބުނު މީހުންނަށެވެ. އަދި ދެ ކޮޓަރީގެ އެޕާޓްމަންޓަށް ޝަރުތު ހަމަވާ މީހުންގެ ތެރެއިން 73 އިން ފެށިގެން މަތިން މާކްސް ލިބުނު މީހުންނަށެވެ.
އާންމުން އެއްވެ ހަމަނުޖެހުމެއް ހިންގާފާނެ ކަމަށް ބަލައި، ހައުސިން މިނިސްޓްރީ ގައި ފުލުހުން ވެސް މިއަދު ހަރަކާތްތެރިވި އެވެ. އެއްވި މީހުންނާއި ހައުސިން މިނިސްޓްރީގެ އޮފިޝަލުން ބައްދަލުކުރައްވާ ވިދާޅުވީ ލިޔުމުން ޝަކުވާ ހުށަހެޅުމަށެވެ. ދާއިމީ ލިސްޓަށް ޝަކުވާ ހުށަހެޅުމުގެ ފުރުސަތު މިއަދު ހުޅުވާލުމަށް ހައުސިން މިނިސްޓްރީން މިހާރު ވަނީ ނިންމައިފަ އެވެ.
