އިޒްރޭލުން ފަލަސްތީނުގައި ހިންގަމުންދާ ގަތުލުއާއްމުގެ ތެރެއިން ރޭ ގާޒާގެ ތިން ހޮސްޕިޓަލަކާއި އެމްބިއުލާންސް ގާފިލާއަކަށް ހަމަލާދީ ގިނަ ބަޔަކު ޝަހީދުކޮށްލައިފި އެވެ.
އިޒްރޭލުގެ ހަމަލާތައް އަމާޒުވީ ގާޒާގައި ހުންނަ އަލް-ޝިފާ ހޮސްޕިޓަލާއި އިންޑޮނޭޝިއަން ހޮސްޕިޓަލުގެ އިތުރުން އަލް-ގުދުސް ހޮސްޕިޓަލަށެވެ.
އެގޮތުން އެންމެ ނުރައްކާތެރި ހަމަލާއެއް ދިނީ ޝިފާ ހޮސްޕިޓަލު ހުންނަ ސަރަހައްދަށެވެ. އެ ހަމަލާ، އެ ހޮސްޕިޓަލަށް މީހުން އުފުލަމުންދިޔަ އެމްބިއުލާންސް ގާފިލާއަކަށްވެސް ވަނީ އަރާފަ އެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުން މި ހަމަލާގައި ގިނަ ބަޔަކު މަރުވެ، އެތައް ބަޔަކު ވަނީ ޒަހަމްވެފަ އެވެ.
އެ ހޮސްޕިޓަލުގައި، ގެދޮރު ގެއްލިފައިވާ 20،000 އެއްހާ މީހުން ދަނީ ހިމާޔަތް ހޯދަމުންނެވެ. ދެން ހަމަލާ އަމާޒުވި އިންޑޮނޭޝިއާން އަދި ގުދުސް ހޮސްޕިޓަލަށްވެސް ވަނީ ބޮޑެތި ގެއްލުންތަކެއް ވެފަ އެވެ. މި ތިން ހަމަލާގައި މަރުވި މީހުންގެ އަދަދު 50 އިން މައްޗަށް އަރާނެ ކަމަށް ރިޕޯޓުތައް ބުނެ އެވެ.
ވޭތުވެދިޔަ 75 އަހަރު އިޒްރޭލުން ފަލަސްތީނުގައި ހިންގަމުންދާ ގަތުލުއާއްމު ވަރުގަދަކޮށް ހަނގުރާމަ އިއުލާނުކުރީ މިދިޔަ މަހު ހަތްވަނަ ދުވަހު ފަލަސްތީނުގެ ހަމާސް ޖަމާއަތުން އިޒްރޭލަށް ދިން ހަމަލާއަކާ ގުޅިގެންނެވެ. އެ ހަމަލާގައި އިޒްރޭލުން 1400 އަށްވުރެ ގިނަ މީހުން މަރާލި އެވެ.
ބަދަލުގައި ގާޒާ އެކީ ބަންދުކޮށް، ކަރަންޓާއި ފެން ކަނޑާލާ، އެހީގެ ދޮރުތައް ބަންދުކުރުމަށްފަހު އިޒްރޭލުން ދެމުންދާ ހަމަލާތަކުގައި ޝަހީދުވި މީހުންގެ އަދަދު 9،000 އަށް އަރަ އެވެ. ގާޒާގެ އިތުރުން މި އަދަދުގެ ތެރޭގައި އިޒްރޭލު ސިފައިން ހުޅަނގު އައްސޭރީގައި ޝަހީދުކުރި މީހުންވެ ހިމެނެ އެވެ.
އިޒްރޭލުން އުތުރު ގާޒާއަށް އެއްގަމު މަގުން ވަނުމަށް މަސައްކަތް ކުރަމުންދާއިރު، އިޒްރޭލުގެ ވައިގެ ހަމަލާތައް ވަނީ ހޮސްޕިޓަލުތަކަށާއި ސްކޫލުތައް އަދި މިސްކިތްތަކާއި ރެފިއުޖީ ކޭމްޕުތަކުގެ އިތުރުން ފައްޅިތަކަށް ވެސް އަމާޒުވެފަ އެވެ.
ހަމަލާތައް ހުއްޓާލާ ގާޒާއަށް އިންސާނީ އެހީ ފޯރުކޮށްދިނުމަށް ބައިނަލްއަގުވާމީ މުޖުތަމައާއި ގައުމުތަކުން ގޮވާލި ނަމަވެސް، އދ. ގެ ސަލާމަތީ ކައުންސިލަށް މިހާތަނަށް އެ މަގުސަދުގައި ހުށަހެޅި ހުރިހާ ހުށަހެޅުމެއް ވަނީ އެމެރިކާއިން ވީޓޯ ކޮށްފަ އެވެ. ހަމަލާތައް މެދުކަނޑާލުމަށް ގޮވާލާ އދ. ގެ އާއްމު މަޖިލީހުން ފާސްކުރި ގަރާރަށް ބޯ ނުލަބާނެ ކަމަށް އިޒްރޭލުން ވަނީ ބުނެފަ އެވެ.
