ސިޔާސީ ފިއްތުންތަކުގެ ސަބަބުން ސާބިއާގެ ޕާލިމެންޓު އެ ގައުމުގެ ރައީސް އެލެކްސެންޑާ ވުސިޗް އުވާލުމާ އެކު އެ ގައުމުގެ އާންމު އިންތިހާބު އަންނަ މަހުގެ ތެރޭގައި ބާއްވާން ނިންމައިފި އެވެ.
މީގެ ދެ އަހަރު ކުރިން އެގައުމުގައި ބޭއްވި އިންތިހާބު ކާމިޔާބުކުރީ ސާބިއަން ޕްރޮގްރެސިވް ޕާޓީންނެވެ. އެ ގައުމުގެ މަސްލަހަތު ހިމާޔަތް ކުރަން ޖެހޭ ކަމަށް ވިދާޅުވެ ވުސިޗް ވަނީ ޑިސެމްބަރު 17 ގައި ޕާލިމެންޓު އިންތިހާބައި ލޯކަލް ކައުންސިލްތަކުގެ އިންތިހާބު އޮންނާނެކަން ހާމަކުރައްވާފަ އެވެ.
މިއީ ސާބިއާގެ ރައީސްކަން ވުސިޗް ވެސް ކުރައްވާ ދެވަނަ ދައުރެވެ. މެއި މަހުގެ ތެރޭގައި އެ ގައުމުގައި ހިނގި ބަޑި ޖެހުމުގެ ދެ ހާދިސާއާ ގުޅިގެން ވުސިޗަށް ވެސް ސިޔާސީ ޕްރެޝަރު ވަނީ ބޮޑުވެފަ އެވެ. 2012 އިން ފެށިގެން އެގައުމުގައި ވެރިކަން ކުރަމުން އަންނަ ވުސިޗްގެ ޕާޓީން މީޑިއާތައް ހުއްޓުވައި އަނިޔާވެރިކަމުގެ ސަގާފަތެއް ގެންގުޅޭ ކަމަށް އެ ގައުމުގެ ރައްޔިތުން ދަނީ ބުނަމުންނެވެ.
މި ތުހުމަތުތައް ވުސިޗް އާއި އޭނާގެ ޕާޓީން ދޮގުކުރި ނަމަވެސް އިންތިހާބުގެ ނަތީޖާއިން އެ މަންޒަރު ދައްކައިދޭން ޖެހޭ ކަމަށް ރިޕޯޓުތައް ބުނެ އެވެ.
ޔޫރަޕިއަން ޔޫނިއަންގެ މެމްބަރުކަން ހޯދުމަށް ސާބިއާއިން މަސައްކަތް ކުރަމުންދާ މި ދަނޑިވަޅުގައި މި އިންތިހާބަކީ އެކަމަށް ވެސް މުހިންމު އިންތިހާބަކަށް ވެގެންދާނެ ކަމަށް މާހިރުން ދެކެ އެވެ.
