އިޒްރޭލަށް އަމާޒުކޮށް ގިނަ އަދަދެއްގެ މިސައިލާއި ޑްރޯން ހަމަލާއެއް ޔަމަނުގެ ހޫތީން ދީފި އެވެ.
އަންގާރަ ދުވަހުގެ ހެނދުނުގެ ވަގުތެއްގައި ރެޑް ސީ މަތިން ދަތުރުކުރި އެއްޗެހިތަކެއް ވައްޓާލާފައިވާ ކަމަށް އިޒްރޭލުގެ އަސްކަރިއްޔާއިން ވެސް ވަނީ ބުނެފަ އެވެ. އެ މިސައިލްތަކުގެ ސަބަބުން އެއްވެސް ގެއްލުމެއް ނުލިބޭ ކަމަށް އިޒްރޭލުން ބުންޏެވެ.
މި ހަމަލާތަކަކީ ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ގަތުލުއާންމުގެ ސަބަބުން ދިން ހަމަލާތަކެއް ކަމަށް ހޫތީން ބުންޏެވެ. އަދި, އެ ހަމަލާތައް ހުއްޓާ ނުލަނީސް މިސައިލް ހަމަލާތައް ވެސް ހުއްޓާނުލާނެ ކަމަށް ހޫތީން ބުންޏެވެ.
މިއީ އޮކްޓޯބަރު ހަތެއްގައި ގާޒާއަށް އިޒްރޭލުން ބޮން އަޅަން ފެށި ފަހުން ހޫތީން އިޒްރޭލަށް ދިން ތިން ވަނަ ހަމަލާ އެވެ.
މިދިޔަ ހަފްތާގެ ތެރޭގައި ވެސް ރަތްކަނޑުގައި އޮތް އެމެރިކާގެ މަނަވަރަކުން ވަނީ ޔަމަނުން ލޯންޗުކުރި މިސައިލްތަކެއް ވައްޓާލާފަ އެވެ.
އިޒްރޭލުން ވެސް ރައްދުގައި ހޫތީންނަށް އަމާޒުކޮށް ހަމަލާތަކެއް ދޭނެ ކަމަށް ބެލެވެ އެވެ. އަދި, އެކަމުގެ މަޝްވަރާތައް އެ ގައުމުގެ އަސްކަރީ ކެބިނެޓުން ކުރާނެ ކަމަށް ރިޕޯޓުތައް ބުނެ އެވެ.
