ޕެރިސް (31 އޮކްޓޯބަރު) - އާޖެންޓީނާގެ ކެޕްޓަން ލިއޮނެލް މެސީ 8 ވަނަ ފަހަރަށް ބެލޮންޑިއޯ އެވޯޑް ހޯދައިފި އެވެ.
ބެލޮންޑިއޯ އެވޯޑް ދިނުމުގެ ހަފްލާ ޕެރިހުގައި ރޭ ބޭއްވިއިރު، މި އަހަރުގެ ބެލޮންޑިއޯ އަށް މެސީއާ އެންމެ ގާތުން ވާދަކުރީ މެންޗެސްޓާ ސިޓީގެ އާލިން ހާލަންޑާއި ފްރާންސްގެ ތަރި ކިލިއަން އެމްބާޕޭއެވެ.
ކްލަބު ފުޓްބޯޅައިގައި މެސީ އަށް މާ ބޮޑު ކާމިޔާބެއް ނުލިބުނު ނަމަވެސް، މިދިޔަ އަހަރު ގަތަރުގައި އޮތް ފީފާ ވޯލްޑް ކަޕް އާޖެންޓީނާ އިން ކާމިޔާބުކުރިއިރު މެސީ ވަނީ މޮޅު ކުޅުމެއް ދައްކައިފަ އެވެ. ވޯލްޑް ކަޕްގެ އެންމެ މޮޅު ކުޅުންތެރިޔާގެ މަގާމު ވެސް ހޯދީ މެސީ އެވެ. އެ މުބާރާތުގައި މެސީ ވަނީ ހަތް ލަނޑު ޖަހައިފަ އެވެ.
ބެލޮންޑިއޯ ގަވައިދަށް ގެނައި ބަދަލާއެކު، މި އަހަރުގެ ބެލޮންޑިއޯ ހޮވުމުގައި ބަލާފައިވަނީ މިދިޔަ ސީޒަންގެ ރެކޯޑްތަކަށެވެ. މުޅި މި އަހަރުގެ ރެކޯޑްތަކަކަށް ނޫނެވެ.
"މިއީ އާޖެންޓީނާގެ މުޅި ޓީމުން ހޯދި ބޮޑު ކާމިޔާބީ އަށް ދޭ ހަދިޔާއެއް،" އެމެރިކާގެ އިންޓަ މަޔާމީ އަށް ކުޅެމުންދާ މެސީ ބުންޏެވެ.
މެސީ ،36, ގެ ކެރިއަރުގައި ހޯދި 8 ވަނަ ބެލޮންޑިއޯ ހާއްސަކުރި 2020 ވަނަ އަހަރު މަރުވި އާޖެންޓީނާގެ ލެޖެންޑް ޑިއޭގޯ މަރަޑޯނާއަށެވެ.
މެސީގެ ކެރިއަރުގައި އެންމެ ފުރަތަމަ ބެލޮންޑިއޯ ހޯދީ 2009 ވަނަ އަހަރެވެ. އޭގެ ފަހުން ޖުމްލަ 8 ބެލޮންޑިއޯ ހޯދައި، މެސީ ވަނީ ޕޯޗުގަލްގެ ކްރިސްޓިއާނޯ ރޮނާލްޑޯ އަށްވުރެ ކުރިއަށް ޖެހިލައިފަ އެވެ.
އަންހެނުންގެ ބެލޮންޑިއޯ ކާމިޔާބުކުރީ ސްޕެއިންގެ އައިޓާނާ މޮންމަޓީ އެވެ. އޭނާ އޯގަސްޓް މަހު އޮތް ވޯލްޑް ކަޕް ސްޕެއިން އަށް ކާމިޔާބުކޮށްދިނުމުގައި އޭނާ މުހިންމު ރޯލެއް އަދާކުރި އެވެ. ޔުއޭފާ އިން ހޮވި މިދިޔަ އަހަރުގެ މޮޅު ކުޅުންތެރިޔާގެ މަގާމުވެސް ހޯޑީ މޮންމަޓީ އެވެ. -- އޭއެފްޕީ
